Read Nzema 1 Sam 17 Bible Online

1 Sam 17 - Nzema bible

1 Sam 17

¹Filisitiama boɔboale bɛ ɛlɔnema ne anloa wɔ Soko mɔɔ wɔ Dwuda la. Bɛyɛle azokoɛleɛ wɔ Yifɛse Damem wɔ Soko nee Azika avinli.

²Sɔɔlo nee Yizilayɛma noko boɔboale bɛ nloa na bɛyɛle bɛ azokoɛleɛ wɔ Yila Bɔnza, na bɛboɔboale bɛ nwo kɛ bɛ nee Filisitiama ko.

³Filisitiama gyinlanle boka ko azo yɛɛ Yizilayɛma noko gyinlanle boka ko noko azo, yɛɛ bɔnza ne la bɛ avinli.

⁴Nrenya bie, bɛfɛlɛ ye Golayate, ɔvi Gate, na yemɔ yɛɛ ɔgyi Filisitia ɛlɔnema ne ati a. Ɔvi Filisitiama avinli ɔvindele. Ye tendenle kɛyɛ mita nsa.

⁵Ɔzo kɔbele kyɛlɛ, ɔwula kɔbele konle tɛladeɛ mɔɔ ye ɛnlomboɛ kɛyɛ kilo abulanlu nee ko;

⁶ɔ gyakɛ enyinlike ne le kɔbele, yɛɛ kɔbele atwɛ gyela ɔ bati.

⁷Ye atwɛ ne baka ne kpole le kɛ ndanlɛnwolɛ melahyinli mgbunla, ɔ ti le bulalɛ, yɛɛ ye ɛnlomboɛ kɛyɛ tone nu kilo nsuu. Ye sonvolɛ ne mɔɔ soa ye enyinlike ne la lumua ɔ nyunlu.

⁸Golayate vindele radeanle nu zele Yizilayɛma kɛ, “Duzu ati yɛɛ bɛra bɛ nee yɛ baho a? Mame, mele Filisitianli, na bɛmɛ, bɛle Sɔɔlo ahanra! Bɛdabɛ bɛye bɛ sonla mɔɔ le katakyie la bɛmaa ɔ nee me yɛva konle ne yɛbɔ zolɛ.

⁹Saa ɔkola ɔ nee me gyinla ko, ɔdi konim, na ɔku me a yɛkɛyɛ yɛ nwo ahanra yɛkɛmaa bɛ; na saa medame noko medi ɔ nwo zo konim, na meku ye a, bɛdabɛ noko bɛkɛyɛ yɛ ahanra.”

¹⁰Filisitianli ne zɔle zolɛ kɛ, “Yizilayɛ ɛlɔnema, saa bɛle mrenya a ɛnee bɛye katakyie bɛmaa ɔvinde me nyunlu ɛke na me nee ye ɛbɔ ye zolɛ.”

¹¹Mɔɔ Sɔɔlo nee Yizilayɛma kɔsɔɔti dele Filisitianli ne adubɛnloanu ne la, bɛ ahonle dule na bɛ rɛle bɔle.

¹²Devidi ɔ ze a le Gyɛsi. Gyɛsi bɔ Yifelaem abusua ekpunli ne bie yɛɛ ɔvi Bɛtelɛhɛm mɔɔ wɔ Dwuda la. Ɔlɛ mralɛ mrenya mɔtwɛ. Mekɛ mɔɔ Sɔɔlo di ye belemgbunli ne la, ɛnee Gyɛsi akee ɛyɛ kpanyinli.

¹³Gyɛsi amra mrenya mgbanyinli nsa ne wɔ Sɔɔlo ɛlɔnema ne anu. Ɔ mra mrenya nsa ne mɔɔ hɔle konle ne bie la aluma ɛne: Yilayabe, ɔ nzi ralɛ Abenadabe, yɛɛ Abenadabe anzi ralɛ Hyama.

¹⁴Devidi a le kazima a. Mgbanyinli nsa ne nee Sɔɔlo hɔle konle ne anloa la

¹⁵ɛnee ɔyɛ a Devidi sia kɔ Bɛtelɛhɛm kɔnea ɔ ze mboane ne mɔ.

¹⁶Golayate ragyinlanle ɛleka ko ne ala nwonlomɔ nee nɔsolɛ biala toonwo kenle abulanla zele Yizilayɛma kɛ bɛye sonla bɛmaa ɔ nee ye ɛho.

¹⁷Kenle ko Gyɛsi zele Devidi kɛ, “Fa ma ngyehye ye kilo bulu nee kpanwo ahunguma bulu ye ka ɛ nwo fa kɔmaa ɛ mediema mrenya ne mɔ wɔ konle azokoɛleɛ nehane;

¹⁸eza fa ‘kyiisi’ bulu ye kɔmaa sonla ne mɔɔ nea ɛlɔnema ne anwo zo la. Nea kɛ ɛ mediema ne mɔ anwo si de la na fa debie fi bɛ nwo lɔ bahile me kɛ amgba ɛnwunle bɛ na bɛte kpɔkɛ.

¹⁹Belemgbunli Sɔɔlo nee ɛ mediema ne mɔ nee Yizilayɛma kɔsɔɔti wɔ Yila Bɔnza bɛ nee Filisitiama ɛlɛko.”

²⁰Aleɛbahye ne ala Devidi vale mboane ne mɔ wulale awie asa anu, na ɔvale aleɛ ne ɔzile nu ɔhɔle, kɛmɔ ɔ ze Gyɛsi zele ye la. Ɔdwule azokoɛleɛ ne la ɛnee ɛlɔnema ne ɛdu ɛdenrɛ ɛlɛto konle edwɛne ahɔ konle ne anloa.

²¹Yizilayɛ ɛlɔnema ne nee Filisitia ɛlɔnema ne gyinlanle ye ekpunli ekpunli, bɛ nye bɔ zolɛ.

²²Devidi vale ninyɛne ne wulale safohyenle ne mɔɔ nea ninyɛne zo la asa anu, na ɔnriandile ɔhɔle ɛlɔnema ne anu ɔhɔbizale ɔ mediema ne mɔ ahye na ɔbizale bɛ agbɔkɛ nu.

²³Mɔɔ ɔ nee bɛ ɛlɛtendɛ la, Golayate vi Filisitiama avinli ragyinlanle ɔ bo zo ne na ɔdeanle nu kɛ ɔkpondɛ nrenya aye ɔ nyunlu nee ye araho. Ɔhehanle edwɛkɛ mɔɔ ɔkeha ye dɛba la. Na Devidi dele.

²⁴Mɔɔ Yizilayɛma ne nwunle Golayate la, bɛ ahonle dule na bɛnwenwenle.

²⁵Yizilayɛma ne zele kɛ, “Bɛnwu nrenya ɛhye mɔɔ ɛvinde la? Nɔhalɛ, yera ɔbagolo Yizilayɛma anwo. Belemgbunli Sɔɔlo ɛbɔ ɛwɔkɛ kɛ awie biala mɔɔ kɛhu ye la, ɔkɛmaa ye anwonyia kpole kpalɛ; eza ɔkɛva ɔ ra raalɛ ne ɔkɛmaa ye agyalɛ na eza ɔkɛmaa ɔ ze awuke nu amra fanwodi wɔ Yizilayɛ maanle ne anu.”

²⁶Devidi bizale menli mɔɔ gyigyi ɔ nwo ɛkɛ ne la kɛ, “Duzu ahyɛlɛdeɛ a sonla mɔɔ kɛhu Filisitianli ye na ɔkɛlie Yizilayɛma ɔkɛvi anyiemgba ɛhye anu la banyia a? Ɔluakɛ, Filisitianli ɛhye mɔɔ ɛnze Nyamenle la a le nwane, mɔɔ ɔdaye bɔbɔ ɔwɔ kɛ ɔko ɔtia tease Nyamenle ne ɛlɔnema a?”

²⁷Na menli ne hanle ɛwɔkɛ mɔɔ bɛbɔ bɛdo ɛkɛ ne kɛ sonla mɔɔ kɛhu ye la kɛnyia la hilele ye.

²⁸Mɔɔ Devidi ka edwɛkɛ ɛhye ahile menli ne la, ɔ diema kpanyinli Yilayabe dele; ɔvale Devidi anwo ɛya kpole na ɔzele ye kɛ, “Duzu ati a wɔra ɛke a? Nwane asa anu a wɔva mboane ne mɔ wɔwula wɔ fienemgbole ne anu a? Ɛle kakula wuwimɔ. Wɔra kɛ ɛbanlea konle ne sinlinyunlu ɔ?”

²⁹Na Devidi bizale ye kɛ, “Duzu a meyɛ a? Tɛ edwɛkɛ mgbane a membizale a?”

³⁰Ɔhakyile ɔ nye sonla fofolɛ nwo na ɔbizale ye edwɛkɛ ko ne ala, na mualɛ ko ne ala a bɛvale bɛmanle ye a.

³¹Mɔɔ bɛdele Devidi ngehanleɛ ne la, bɛbɔle Sɔɔlo amaneɛ, na Sɔɔlo zoanle manle bɛhɔvale ye.

³²Devidi hanle hilele Sɔɔlo kɛ, “Awie biala mmasulo Golayate; medame, wɔ sonvolɛ, me nee Filisitianli ne baho ye mrenyazo.”

³³Sɔɔlo zele Devidi kɛ “Kyɛkyɛ, ɛ nee Filisitianli ne ɛnrɛhola ko, ɔluakɛ sumunli ye mbɛda nu yeho toonwo a yeradwu ɛnɛ a, na wɔmɔ, ɛle konle nu adɔma.”

³⁴Na Devidi zele Sɔɔlo kɛ, “Wɔ sonvolɛ, menea egya mboane; mekɛ biala mɔɔ awenade anzɛɛ bedi kɛhye bie la,

³⁵mefoa ye toonwo mekye ye, meboda ye, na mesa ye medie. Na saa yeamkponle na ɔba me nwo zo a mesɔ ɔ kɔmenza, memia ye toonwo meku ye.

³⁶Wɔ sonvolɛ ɛhu awenade nee bedi mɔ, na Filisitianli ɛhye mɔɔ ɛnze Nyamenle la bawu kɛ awenade anzɛɛ bedi ne mɔ ko ala la, ɔluakɛ yeanli tease Nyamenle ne ɛlɔnema ne eni.

³⁷Ɛdɛnkɛma mɔɔ liele me vile awenade nee bedi ne mɔ asa anu la balie me avi Filisitianli ɛhye asa anu.” Sɔɔlo zele Devidi kɛ, “Kɔ, Ɛdɛnkɛma nee wɔ ɛhɔ.”

³⁸Akee Sɔɔlo vale ɔdaye mumua ne ye konle tɛladeɛ wulale Devidi, ɔvale ye konle kɔbele kyɛlɛ ne ɔzoale ye, na ɔvale ye mbulalɛ tɛladeɛ ne ɔwulale Devidi.

³⁹Devidi vale Sɔɔlo konle dadeɛ ne zianle ɔ nwo. Ɔhyehyɛle ɔ nwo bɔkɔɔ ɔwiele la, yeangola ɔ gyakɛ ko bɔbɔ tu. Na ɔzele Sɔɔlo kɛ, “Metɛfale konle ninyɛne ɛhye mɔ bie metɛsieziele me nwo ɛlɛ, yemɔti mefa mekɔ konle ne a, ɔnrɛyɛ boɛ.” Na Devidi kpolokpolole bɛ guale.

⁴⁰Ɔvale ye kpɔma ne mɔɔ ɔfa ɔka ye mboane ne la na ɔsesale awolɛ (awozane) nnu wɔ azudenle ne anu ɔguale ye mboaneneavolɛ kodoku ne anu; ɔvale ye totoabɔ ne, na akee ɔhɔle kɛ ɔkayia Golayate.

⁴¹Golayate dudule agyakɛ bikyele Devidi; ye sonla ne mɔɔ zo ye konle ninyɛne ne la li ɔ nyunlu. Ɔrale ɔ nyunlu kpalɛ,

⁴²na ɔnwunle Devidi la, ɛnee ɔnnwu debie mɔɔ Devidi zɔho a; ɔnwunle ye ala kɛ ɔle kpavolɛ na ɔ nwo yɛ fɛ.

⁴³Ɔzele Devidi kɛ, “Ɛdwenle kɛ mele twea mɔɔ yemɔti ɛ nee me baho a ɛnee ɛfa baka a?” Na Golayate vale ye nyamenle ne wale Devidi amonle.

⁴⁴Ɔzele Devidi kɛ, “Bɛla maa menva wɔ nwonane memaa anwomanyunlu nloma nee ɛbɔkunlu nanemgbole ɛli.”

⁴⁵Devidi buale Filisitianli ne kɛ, “Wɔmɔ, ɛ nee konle dadeɛ, atwɛ yɛɛ akuma a ɛra a, na mame, me nee Tumivolɛ Ɛdɛnkɛma, Yizilayɛ ɛlɔnema Nyamenle ne mɔɔ ɛmbu ye la a rale a.

⁴⁶Ɛnɛ kenle ye, Ɛdɛnkɛma baye wɔ awula me sa nu, mebabɔ wɔ meado aze na meapɛ ɛ ti. Mebava Filisitia ɛlɔnema ne avunli meamaa anwomanyunlu nloma nee ɛbɔkunlu nanemgbole ali, amaa aleɛabo amra kɔsɔɔti anwu kɛ Yizilayɛma lɛ Nyamenle,

⁴⁷na menli mɔɔ ɛyia ɛke la kɔsɔɔti anwu kɛ Ɛdɛnkɛma ɛnva dadeɛ nee atwɛ a die ye menli a, ɔluakɛ konle ne le ye ɛdeɛ, na Ɛdɛnkɛma baye bɛ kɔsɔɔti amaa yɛ.”

⁴⁸Golayate dule ɔ bo bieko kɛ ɔkayia Devidi, na Devidi nriandile waa hɔle Filisitiama ɛlɔne ne anyunlu hɔyiale ye.

⁴⁹Devidi yele bozane ko ye kodoku ne anu, ɔvale ɔwulale ye totoabɔ ne anu, ɔdole ɔbɔle Golayate. Bolɛ ne yiale ɔ nwoma azo na ɔminle ɔhɔle nu. Golayate dule dɔle aze mutule nu.

⁵⁰ Yemɔti, Devidi vale totoabɔ mgbane hunle Golayate na ɔlile ɔ nwo zo konim. Devidi anva dadeɛ, ɔvale ɔ sa mgbane.

⁵¹Akee Devidi nriandile hɔvole gyinlanle Golayate anwo zo, ɔhwenle Golayate mumua ne dadeɛ ne wɔ ye boa ne anu, na ɔvale ɔpɛle Golayate ati. Mɔɔ Filisitiama nwunle kɛ bɛhu bɛ sonla anwo ɛzulolɛ ne mɔɔ li bɛ ti la, bɛguale ɛbɔ nu.

⁵²Na Yizilayɛma nee Dwudama vale fɛlɛkolilɛ nee ɛwudolɛ voanle Filisitiama ndinlizo toonwo bɛhɔdwule Gate yɛɛ Ɛkelɔn nlenkɛ mgbole ne mɔ anloa. Adenle ne mɔɔ vi Gate kɔ Ɛkelɔn nee Hyeeyaleeyem la anu yɛle avunli ngome.

⁵³Akee Yizilayɛma gyakyile bɛ ɛvoanlɛ na bɛziale bɛrale Filisitiama azokoɛleɛ ne, bɛravulovulale bɛ ninyɛne ne mɔ kɔsɔɔti bɛhɔle.

⁵⁴Na Devidi vale Golayate ati ne hɔle Gyɛlusalɛm, na ɔgyakyile Golayate konle ninyɛne ne mɔ wɔ ɔdaye ye ɛdanlɛ sua ne anu.

⁵⁵Mɔɔ Sɔɔlo nwunle kɛ Devidi ɛlɛkɔ ɔ nee Filisitianli ne ahɔho la, ɔbizale Abenɛɛ mɔɔ nea ye ɛlɔnema ne mɔ anwo zo la kɛ, “Nwane ara a le kpavolɛ ɛhye?” Abenɛɛ buale ye kɛ, “Nana, metane wɔ kɛ menze.”

⁵⁶Na belemgbunli ne zele kɛ, “Ɛnee kɔ kɔbiza.”

⁵⁷Yemɔti mɔɔ Devidi hunle Filisitianli ne wiele na ɔziale ɔrale la, Abenɛɛ vale ye hɔle Sɔɔlo ɛkɛ ne. Ɛnee Devidi lɛ Filisitianli ne ati ne ɔ sa nu.

⁵⁸Na Sɔɔlo bizale ye kɛ, “Kpavolɛ, ɛ ze a le nwane?” Devidi buale ye kɛ, “Wɔ sonvolɛ nrenya Gyɛsi mɔɔ vi Bɛtelɛhɛm la ara nrenya a le me.”