Read Nzema 1 Sam 18 Bible Online

1 Sam 18 - Nzema bible

1 Sam 18

¹Mɔɔ Devidi nee Sɔɔlo wiele bɛ adwelie ne di la, Dwɔnatan, Sɔɔlo ara nrenya ne hulole Devidi, na ɔhulole ye kɛ ɔdaye ɔ nwo la.

²Na ɔvi kenle ko ne Sɔɔlo ammaa Devidi angɔ ɔ ze sua nu.

³Dwɔnatan nee Devidi yɛle agɔnwolɛyɛlɛ ngyekyeleɛ, ɔluakɛ ɛnee ɔkulo Devidi kɛ ɔdaye ɔ nwo la.

⁴Na Dwɔnatan yele ɔdaye ye tɛladeɛ mɔɔ ɔwula la ɔmanle Devidi wulale, ɔvale ye konle tɛladeɛ ne, ye dadeɛ ne, ye ɛda ne nee ye akyeso ne kɔsɔɔti ɔmanle Devidi.

⁵Ɛzoanlɛ nee gyima biala mɔɔ Sɔɔlo vale manle Devidi la, ɔyɛle bɛ muala gyɛlɛɛnye; yemɔti Sɔɔlo yɛle ye safohyenle wɔ ye ɛlɔne ne anu. Awie biala, bɔbɔ Sɔɔlo sonvolɛma ne akunlu dwole fɔɔnwo wɔ Devidi gyinlabelɛ ne anwo.

⁶Mɔɔ Devidi hunle Filisitianli ne na bɛsia bɛara sua nu la, mraalɛ kɔsɔɔti mɔɔ wɔ Yizilayɛ azuamgbole ne mɔ azo la vindele vale akɛya ɛwozolɛ, edwɛnedolɛ yɛɛ agolezilɛ rayiale Belemgbunli Sɔɔlo.

⁷ Wɔ fɛlɛkolilɛ ne anu bɛdole edwɛne bɛzele kɛ, “Sɔɔlo ɛhu apenle apenle, na Devidi ɛhu apenle apenle bulu.”

⁸Sɔɔlo vale ɛya kpole, ɔluakɛ edwɛne ne agbɔkɛ ne mɔ anyɛ ye fɛ. Ɔzele kɛ, “Bɛva apenle apenle bulu bɛmaa Devidi, yɛɛ mame, bɛva apenle apenle ala a bɛmaa me a. Duzu bieko yɛɛ ɔwɔ kɛ ɔnyia a? Me belemgbunli maanle ne ala.”

⁹Na ɔvi kenle ko ne Sɔɔlo nyianle Devidi anwo adwenle ɛtane na ɔvuale ɔ ti.

¹⁰Aleɛ hyenle la Nyamenle manle sunsum ɛtane bie dwule Sɔɔlo anwo zo, na ɔdeɛdeanle nu mgbane mgbane wɔ ye sua ne anu. Devidi bɔle ye sanwule ne, kɛmɔ ɔbɔ ye dɛba ne ala la. Mekɛ zɔhane ɛnee Sɔɔlo lɛ ye atwɛ ne ɔ sa nu.

¹¹Ɔvale adwenle kɛ, “Mebɛtɛ Devidi wɔ bane ne anwo.” Yemɔti ɔdole atwɛ ne fane nwiɔ na Devidi yele ɔ nwo ɛkɛ fane nwiɔ ne.

¹²Sɔɔlo sulo Devidi kpole, ɔluakɛ Ɛdɛnkɛma Sunsum ne ɛva Devidi na Sɔɔlo ɛdeɛ ne ɛvi ɔ nwo.

¹³Yemɔti Sɔɔlo yele ye ɔ nwo ɛkɛ ne na ɔyɛle ye ɛlɔnema apenle safohyenle. Ɔ nee ye ɛlɔnema ne hɔle konle dɔɔnwo,

¹⁴na ɔlile bɛ muala anu konim, ɔluakɛ Ɛdɛnkɛma nee ye lua.

¹⁵Mɔɔ Sɔɔlo nwunle kɛ debie biala anu Devidi ko tɔ zolɛ la, ɔ nwo yɛle ye ɛzulolɛ kpole.

¹⁶Na Yizilayɛma nee Dwudama ɛdeɛ bɛ kɔsɔɔti bɛhulole Devidi edwɛkɛ, ɔboalekɛ saleɛ doa ye.

¹⁷Akee Sɔɔlo zele Devidi kɛ, “Me ra raalɛ kpanyinli Milabe ɛne. Mefa ye meamaa wɔagya; debie mɔɔ hyia wɔ afoa nu la a le kɛ ɛkɛzi ahonle ɛkɛli nɔhalɛ ɛkɛmaa me na ɛkɛho ɛkɛmaa Ɛdɛnkɛma.” (Ɛnee Sɔɔlo adwenle a le kɛ, “Medame mumua ne menrɛhu ye; ɔle kpalɛ kɛ Filisitiama kɛhu ye.”)

¹⁸Devidi buale kɛ, “Na mame bɔbɔ a le nwane, yɛɛ wɔ Yizilayɛ maanle ye anu, egya sua nu amra bɔbɔ a le nwane mɔ, kɛ medame menwɔyɛ belemgbunli ara raalɛ ɔ hu a?”

¹⁹Na mekɛ ne dwule mɔɔ ɔwɔ kɛ bɛfa Sɔɔlo ara raalɛ Milabe bɛmaa Devidi gya la, akee bɛvale ye bɛmanle nrenya fofolɛ mɔɔ bɛfɛlɛ ye Edeleɛle mɔɔ vi Mɛhola la.

²⁰Sɔɔlo ara raalɛ Maekale hulole Devidi kpole. Mɔɔ bɛhanle bɛhilele Sɔɔlo la ɔ nye liele nwolɛ somaa.

²¹Sɔɔlo hanle ye ɔ ti anu kɛ, “Mefa ye meamaa Devidi; mefa meazua ye ɛhane, amaa Filisitiama ahu ye.” Yemɔti eza Sɔɔlo zele Devidi kɛ, “Memaa wɔagya me ra raalɛ ne.”

²²Sɔɔlo zele ye sonvolɛma ne kɛ bɛdɛ bɛgua Devidi anzo nu kɛ, “Nea, belemgbunli anye die ɛ nwo kpole, yɛɛ ye sonvolɛma kɔsɔɔti kulo wɔ edwɛkɛ, yemɔti gya ɔ ra raalɛ ne.”

²³Sonvolɛma ne dɛle guale Devidi anzo nu toonwo bɛmanle ɔzele kɛ, “Medame mumua ne, membɔnle nzule, membɔnle nza; bɛnea a ɔle debie ekyi kɛ menwɔgya belemgbunli ara raalɛ ɔ?”

²⁴Sonvolɛma ne zele Sɔɔlo kɛ, “Devidi edwɛkɛ mɔɔ ɛha la ɛne.”

²⁵Na Sɔɔlo zele kɛ, “Bɛhɔze Devidi kɛ, belemgbunli ɛmkpondɛ agyalɛ ne anwo debie biala. Ɔkpondɛ kɛ ɔsenra ye kpɔvolɛma ne, yemɔti mɔɔ ɔkpondɛ la a le Filisitiama ɛya ko mrenyanu ati nwoma ne mɔ.” (Sɔɔlo kpondɛ kɛ ɔyɛ ɛhye amaa Filisitiama anyia Devidi ahu ye.)

²⁶Mɔɔ Sɔɔlo sonvolɛma ne hanle edwɛkɛ ɛhye hilele Devidi la, ɔyɛle ye fɛ kpole kɛ ɔbagya belemgbunli ara raalɛ ne a. Ɔka ekyii na atɔfolɛlielɛ mekɛ ne adwu la,

²⁷Devidi vale ye ɛlɔnema ne hɔle hɔhunle Filisitiama ɛya nwiɔ, ɔpepɛle bɛ mrenyanu ati nwoma ne mɔ ɔrɛlɛle belemgbunli ne, amaa yeanyia adenle yeagya ɔ ra raalɛ ne. Sɔɔlo vale ɔ ra raalɛ Maekale manle Devidi gyale.

²⁸Noko mɔɔ Sɔɔlo nwunle kɛ Ɛdɛnkɛma nee Devidi lua na Yizilayɛma kɔsɔɔti kulo ye edwɛkɛ la,

²⁹ɔzulole ye kpole kpalɛ, na ɔyɛle Devidi anwo ɛlɔne.

³⁰Filisitiama rale fane dɔɔnwo kɛ bɛ nee Yizilayɛma baho, na mekɛ biala Devidi lile bɛ nwo zo konim. Ɔlile konim dɔɔnwo ɔdɛlale Sɔɔlo mgbanyima mɔɔ nea ɛlɔnema anwo zo la kɔsɔɔti. Yemɔti Devidi duma nee ye nganeɛ dwule maanle ti nee maanle bo.