Read Nzema 1 Sam 2 Bible Online

1 Sam 2 - Nzema bible

1 Sam 2

¹ Hana zɛlɛle zele kɛ: “Ɛdɛnkɛma ɛmaa me nye ɛlie; Ɛdɛnkɛma ɛmaa me anwosesebɛ kpole! Na yemaa mezele me kpɔvolɛma, me nye ɛlie somaa, ɔboalekɛ wɔboa me.

²“Awie ɛnle nwuanzanwuanza kɛ wɔmɔ Ɛdɛnkɛma angome ala, awie ɛnle ɛkɛ kɛ ɛ ngomekye ala; boavolɛ biala ɛnle ɛkɛ kɛ wɔmɔ yɛ Nyamenle ne ala.

³Bɛmmaka mgbole ko; bɛmmatu bɛ nloa anu ko. Ɔluakɛ Ɛdɛnkɛma le Nyamenle mɔɔ ze debie biala a, ɔbu nyɛleɛ biala anwo mgbonda.

⁴Anwosesebɛ ɛda ne mɔ ɛbubu, menli mɔɔ le bɛtɛɛ la nyia anwosesebɛ dahuu.

⁵Menli mɔɔ anrɛɛ lɛ ye di la ɛnɛ di ɛkpa na bɛali, menli mɔɔ ɛhɔne ku bɛ la ɛnɛ ɛnzu ɛhɔne. Mota raalɛ ne ɛwo awoba nsuu, na mɔɔ ɛwo somaa la asa ɛhondo aze.

⁶Ɛdɛnkɛma a ku a yɛɛ ɔdaye a ɔmaa ngoane a; ɔmaa menli kɔ mɔwuamra sua zo, na ɔfa bɛ ɔsia ɔba file zo.

⁷Ɔmaa bie mɔ di ehyia na bie mɔ nyia bɛ nwo, ɔbɛlɛ bie mɔ aze na ɔkpogya bie mɔ zo.

⁸Ɔye ehyianvolɛma ɔfi bɛ nyane nu, ɔye anwunvɔnema ɔfi bɛ amaneɛnwunlɛ nu. Ɔyɛ bɛ arelemgbunli agɔnwo mɔ na ɔmaa bɛdi bɛ eni dɔɔnwo. Azɛlɛ ye adiabo ne le Ɛdɛnkɛma ɛdeɛ; zolɛ yɛɛ yezie ewiade a.

⁹“Ɔsinza menli mɔɔ di nɔhalɛ maa ye la, na ɔmaa amumuyɛma minli esike nu, ɔluakɛ tɛ sonla ɔdaye ye anwosesebɛ yɛɛ ɔfa ɔdi konim a.

¹⁰Bɛbazɛkye Ɛdɛnkɛma kpɔvolɛma; ɔbadea bɛ nu wɔ anwuma anwuma lɔ. Ɛdɛnkɛma babua aleɛabo amra ndɛne. Ɔbamaa ye belemgbunli ne anwosesebɛ, ɔbamaa ye belemgbunli ne ali konim.”

¹¹Akee Ɛlekana ziale hɔle Releema na kakula Samoɛle hale Hyaelo wɔ sɛlɛvolɛ Yilae anwo ɛkɛ ne na ɔzonlenle Ɛdɛnkɛma.

¹²Nvasoɛ biala amba Yilae amra ne mɔ anwo zo. Bɛambu Ɛdɛnkɛma bie.

¹³Amaamuo mɔɔ sɛlɛvolɛ ne fa bu menli ne la a le kɛ, saa bɛlɛbɔ azu bɛamaa awie a, sɛlɛvolɛ ne sonvolɛ ne ba wɔ mekɛ mɔɔ azubɔdeɛ ne gyi senle zo la, na ɔfa faka agye nsa

¹⁴ɔwula ɛzɛne anzɛɛ siase anzɛɛ danesɛne ne mɔɔ gyi senle ne azo ɛlɛwu gbodogbodo la anu; debie biala mɔɔ faka ne nee ye kɛvinde la le sɛlɛvolɛ ne ɛdeɛ. Ɛhye yɛɛ bɛvale bɛyɛle Yizilayɛma wɔ Hyaelo a.

¹⁵Eza saa bɛbava nane ɛnlome bɛayela bɛabɔ azu a ɛnee sɛlɛvolɛ ne sonvolɛ ne base ahenle mɔɔ nee azubɔdeɛ ne ɛra kɛ bɛva bɛbɔ azu ne la kɛ, “Sɛlɛvolɛ ne ɛnrɛlie nane mɔɔ bɛdo la, yemɔti fa amolɛ ne bie maa mengɔmaa ye na ɔdaye yeadondo.”

¹⁶Saa ahenle mɔɔ lɛ azubɔdeɛ ne la se ye kɛ, “Maa bɛlumua bɛyela nane ɛnlome ne kolaa na wɔava dɔɔnwo biala mɔɔ ɛdawɔ ɛkulo la” a, sonvolɛ ne se ye kɛ, “Kyɛkyɛ, fa maa me kɛkala, saa tɛ ye zɔhane a medame mebava bie.”

¹⁷Yemɔti Yilae amra ne mɔ ɛtane ne yɛle kpole bole zolɛ wɔ Ɛdɛnkɛma anye zo, ɔboalekɛ bɛambu Ɛdɛnkɛma azubɔlɛ ninyɛne ne mɔ bie.

¹⁸Kakula nrenya Samoɛle wulale “Lenen” ɛzonlenlɛ tɛladeɛ aguzo.

¹⁹Ɛvolɛ biala saa ɔ ze nee ɔ nli kɔ kɛ bɛkabɔ bɛ ɛvolɛ azu ne a, ɔ nli kɔmaa ye tɛladeɛ ekyi ko mɔɔ yenwo ye woladapi la.

²⁰Saa bɛwie a Yilae yila Ɛlekana nee ɔ ye na ɔse Ɛlekana kɛ, “Ɛdɛnkɛma ɛmaa ɛ nee ɛ ye ɛhye ɛbɔ ɛdane ɛva ɛzie ko ye mɔɔ wɔdu wɔzie ɛkɛ wɔmaa ye la agyakɛ anu.” Akee saa bɛwie a bɛsia bɛkɔ bɛ sua zo.

²¹Ɛdɛnkɛma lole Hana manle ɔnyianle mralɛ mrenya nsa bieko nee mralɛ mraalɛ nwiɔ. Kakula Samoɛle kawie nyi la ɛnee yebe Ɛdɛnkɛma ɛzonlenlɛ nu.

²²Akee Yilae ɛyɛ kpanyinli. Ɔdele ɛbɛla mɔɔ ɛnee ɔ mra ne mɔ ɛlɛbɔ amaa Yizilayɛma la amuala. Eza ɔdele kɛ ɔ mra ne mɔ nee mraalɛ mɔɔ sonle Ɛdɛnkɛma Ɛdanlɛ Sua ne anlenkɛ ne anloa la da.

²³Na ɔzele bɛ kɛ, “Duzu ati yɛɛ bɛbɔ ɛbɛla zɛhae a? Awie biala baka bɛ munzule ɛbɛla mɔɔ bɛlɛbɔ la kile me.

²⁴Me mra, kyɛkyɛ, bɛgyakyi nyɛleɛ ɛhye. Ɔle munzule ɛbɛla, ɔle dumanzɛkyelɛ mɔɔ Ɛdɛnkɛma menli ne ɛlɛbɔ ye nolo wɔ bɛ avinli a.

²⁵Saa sonla fo ɔ gɔnwo a, Nyamenle a di ɔ ti edwɛkɛ maa ye a, na saa sonla fo Ɛdɛnkɛma a ɛnee nwane a di ɔ ti mgbɔdalɛ a?” Noko Yilae amra ne mɔ andie bɛ ze aneɛ, ɔluakɛ ɛnee ɔle Ɛdɛnkɛma ɛhulolɛ kɛ ɔku bɛ.

²⁶ Kakula Samoɛle ɛdeɛ, ɔnyinle na ɔzɔle Ɛdɛnkɛma nee menli anye.

²⁷Nyamenle kpɔmanvolɛ bie vale Ɛdɛnkɛma nrɛlaleɛ rɛlɛle Yilae kɛ, “Ɛdɛnkɛma se, ‘Mekɛ mɔɔ bɛ nlenya Aalɔn nee ye abusua ne wɔ akɛlɛ ɛzonlenlɛ nu wɔ Yigyibiti belemgbunli ne abo la, menyele me nwo mengilele bɛ.

²⁸ Menyele ye abusua ɛdeɛ ne menvile Yizilayɛ mbusua ekpunli ne mɔ amuala anu kɛ bɛmɛ yɛɛ bɛyɛ me sɛlɛvolɛma, bɛzonle wɔ azukponle ne anwo, bɛyela ɛyɛlɛ bɛbɔ azu na bɛwula Yifɔdo[4] bɛrɛla me nyunlu a. Eza memanle bɛ adenle kɛ bɛva azukponle ne azo azubɔdeɛ ne mɔ mɔɔ Yizilayɛma kɛva kɛra la bie.

²⁹Duzu ati yɛɛ bɛkɛyɛ adidikpoku wɔ azubɔlɛ nane nvɛyeba kpalɛ ne mɔ mɔɔ me menli ne kɛva kɛmaa me la anwo na ɛkɛli ɛ mra ne mɔ eni ɛkɛdɛla me a?

³⁰Zɔhane ati, medame, Yizilayɛ Ɛdɛnkɛma Nyamenle, mese: membɔle ɛwɔkɛ kɛ wɔ abusua ne nee ɛ bo zo amra bayɛ me sɛlɛvolɛma dahuu ɛdeɛ na kɛkala, mese wɔ kɛ ɔnrɛyɛ zɔhane bieko. Mebali menli mɔɔ di me eni la eni; na menrɛbu bɛdabɛ mɔɔ bɛkpo me la ɛhwee.

³¹Tie, mekɛ ɛlɛba mɔɔ mebahu mgbavolɛ mɔɔ wɔ wɔ abusua ne anu la nee ɛ bo zo amra amuala a, amaa bɛ nuhua ko bɔbɔ anyɛ ɛrelera.

³²Ɛbali nyane na anyebolo badɔ ɛ nwo wɔ nyilalɛ mɔɔ mebava meamaa Yizilayɛma mɔɔ ɛha la anwo, noko, wɔ sua nu amra ɛdeɛ, sonla ko bɔbɔ ɛnrɛyɛ ɛrelera ɛlɛ.

³³Mebagyakyi ɛ bo zo amra ne anu ko mɔɔ ɔbazonle me kɛ me sɛlɛvolɛ. Ɔ nye bazi na yeaminli anyelazo muala, yɛɛ ɛ bo zo amra mɔɔ ɛha la kɔsɔɔti bawu dadeɛ nloa.

³⁴ Saa ɛ mra mrenya nwiɔ ne, Hɔfenae nee Fenɛhaze gulu nu wu kenle ko a yɛɛ ɛkɛnwu kɛ edwɛkɛ biala mɔɔ meha la bayɛ zɔhane a.

³⁵Mebaye sɛlɛvolɛ mɔɔ bali nɔhalɛ amaa me na yeayɛ debie biala mɔɔ menwɔze ye kɛ ɔyɛ la. Mebamaa ye nlɔnra mɔɔ dahuu bazonle me wɔ belemgbunli ne mɔɔ mebaye ye la abo a.

³⁶Ɛ bo zo amra mɔɔ kɛha la bahɔ sɛlɛvolɛ zɔhane ɛkɛ ahɔzɛlɛ ezukoa nee aleɛ, na bɛabodo ye kɛ ɔmaa bɛboa ye na bɛanyia debie bɛali.’ ”