Read Nzema 1 Sam 20 Bible Online

1 Sam 20 - Nzema bible

1 Sam 20

¹Devidi vi Naeyo mɔɔ wɔ Releema la nriandile hɔle Dwɔnatan anwo lɔ. Ɔbizale ye kɛ, “Duzu a meyɛ a? Duzu fɔlɛ a medi a? Duzu ɛtane a meyɛ metia ɛ ze mɔɔ yemɔti ɔlɛkpondɛ me yeahu me a?”

²Dwɔnatan buale ye kɛ, “Nyamenle ɛkpa ɛgua; ɛnrɛwu. Nea, egya ɛnrɛyɛ debie biala, kpole o, ekyi o, wɔ mekɛ mɔɔ ɔtɛfetele zolɛ ɔtɛkilele me la. Na duzu ati yɛɛ ɔwɔ kɛ egya fea me edwɛkɛ nu a? Ɔnle nɔhalɛ.”

³Devidi buale kɛ, “Ɛ ze ze ye wienyi kɛ ɛkulo me edwɛkɛ, yemɔti yedwenle nwolɛ kɛ, ‘Menrɛmaa Dwɔnatan ɛnrɛde nwolɛ bie, anrɛɛ ɔkɛli nyane.’ Na nɔhalɛ nu, meka Ɛdɛnkɛma nee ɛdawɔ kɛ me ngoane mɔɔ ɛha la le ezinra zɛhae.”

⁴Dwɔnatan zele Devidi kɛ, “Debie biala mɔɔ ɛkɛbiza la, menwɔyɛ menwɔmaa wɔ.”

⁵ Devidi zele Dwɔnatan kɛ, “Ɛhyema le Siane Fofolɛ Ɛvoyia na ɔnle kɛ ɔkpa me ti. Ɔwɔ kɛ mekɔ belemgbunli sua nu me nee ye kɔkpula yɛ sa. Na saa ɔyɛ wɔ ɛhulolɛ a, ɛnee maa me adenle maa menriandi mengɔnvea fienemgbole ne anu lɔ toonwo kenle nsa ne azo nɔsolɛ nu.

⁶Saa wɔ papa nwu kɛ meamba na ɔbiza me bo zo a, ka kile ye kɛ, ‘Devidi zɛlɛle me adenle kɛ ɔbɔ hwii yeahɔ ye sua zo Bɛtelɛhɛm,’ ɔluakɛ ye abusua ne ɛlɛbɔ bɛ ɛvolɛ abusua azu ne.

⁷Saa ɔkponle zolɛ a, ɛnee ɔkile kɛ melɛ ngoane. Saa ɔfa ɛya a ɛnee ɔkile kɛ yezi pi kɛ ɔku me.

⁸Me diema, wɔ ɛwɔkɛ ne mɔɔ ɛhanle ndane ɛbɔle me la, di zolɛ na nwu me anwunvɔne wɔ ɛhye anwo. Na saa ɛnea na fɔlɛlilɛ bie wɔ me afoa nu a, ɛnee ɛdawɔ mumua ne ku me. Duzu ati yɛɛ ɔwɔ kɛ ɛfa me ɛkɔmaa wɔ papa kɛ ɔhu me a?”

⁹Dwɔnatan zele kɛ, “Nyamenle ɛkpa ɛgua; saa meze kɛ egya ɛva adwenle kɛ ɔku wɔ a, anrɛɛ ɛnea a menrɛha menrɛhile wɔ ɔ?”

¹⁰Devidi bizale Dwɔnatan kɛ, “Saa wɔ papa ammaa wɔ mualɛ kpalɛ a, kɛ ɔkɛyɛ na meade ɛ?”

¹¹Dwɔnatan zele Devidi kɛ, “Bɛla, maa yɛhɔ fienemgbole nu lɔ.” Yemɔti bɛ mu nwiɔ bɛhɔle fienemgbole ne anu lɔ.

¹²Akee Dwɔnatan zele Devidi kɛ, “ Ɛdɛnkɛma, Yizilayɛ Nyamenle ne ɛli yɛ daselɛ. Ɛhyema bekezɛ anzɛɛ ye alehyenlɛ nu bekezɛ ala me nee egya badendɛ. Saa ɔlɛ ɛ nwo adwenle kpalɛ a, mebado wɔ nrɛlaleɛ.

¹³Saa ɔlɛ ɛ nwo adwenle ɛtane biala na meammaa wɔande, na eza meanlie wɔ ngoane a, Ɛdɛnkɛma ɛdua me kakɛ ɛgua me bie zo. Ɛdɛnkɛma nee wɔ ɛlua, kɛmɔ ɔ nee egya lua la.

¹⁴Me diema, medie medi kɛ saa mede ngoane nu a, ɛkɛli nɔhalɛ ɛkɛmaa me, kɛmɔ Ɛdɛnkɛma kpondɛ la. Saa mewu noko a,

¹⁵ ɛnee di nɔhalɛ ne maa me abusua ne dahuu. Saa Ɛdɛnkɛma ye wɔ kpɔvolɛma fi aleɛabo a,

¹⁶maa ɛwɔkɛ mɔɔ yɛbɔ yɛ nwo la anu ɛmia. Saa ɛmaa agɔnwolɛyɛlɛ ne tete a, Ɛdɛnkɛma ɛdua wɔ kakɛ.”

¹⁷Dwɔnatan manle Devidi bɔle ɛwɔkɛ bieko kɛ ɔkulo ye, ɔluakɛ ɛnee Dwɔnatan kulo Devidi kɛ ɔdaye ɔ nwo.

¹⁸Na Dwɔnatan zele ye kɛ, “Kɛmɔ ɛhyema le Siane Fofolɛ Ɛvoyia la, saa wɔamba ɛkponledolɛ ne bie a, awie biala banwu ye, ɔluakɛ wɔ ebia ne bagyinla ɛkɛ ne mgbane.

¹⁹Ye kenle nsa ne azo bɔbɔ yɛɛ bɛbanwu ye kpalɛ a, yemɔti nriandi kɔvea ɛleka mɔɔ ɛkenle edwɛkɛ ne hyelele zolɛ la ɛhɔveale la, wɔ awolɛ edukue ne anzi.

²⁰Mebado ɛda ɛkɛ ne fane nsa kɛ asɛɛ mefa meazukoa anyendenrɛlɛ la.

²¹Na mebazoa me sonvolɛ ne kɛ ɔhɔkpondɛ ɛda mbaka ne mɔ. Saa meka mekile me sonvolɛ ne kɛ, ‘Nea, ɛda mbaka ne mɔ wɔ wɔ foa ko ɛke, kɔva’ a, ɛnee finde bɛla, na meka Ɛdɛnkɛma kɛ munzule biala ɛnrɛnyia wɔ.

²²Na saa meka mekile me sonvolɛ ne kɛ, ‘Nea, ɛda mbaka ne mɔ wɔ ɛ nyunlu lɔ’ a, ɛnee kɔ moa, ɔluakɛ Ɛdɛnkɛma a se ɛhɔ a.

²³Na ɛwɔkɛ ne mɔɔ yɛbɔ yɛ nwo la, Ɛdɛnkɛma ɔdaye ɔbaboa yeamaa yɛali zolɛ dahuu.”

²⁴Yemɔti Devidi hɔveale fienemgbole ne anu. Siane Fofolɛ Ɛvoyia ne dwule la, Belemgbunli Sɔɔlo radɛnlanle aze kɛ bɛdi debie.

²⁵Ɔdɛnlanle ebia ne mɔɔ zua bane ne mɔɔ dahuu ɔtɛnla nu la anu, Dwɔnatan dɛnlanle ebia ne mɔɔ nee belemgbunli anye bɔ zolɛ la azo, yɛɛ Abenɛɛ dɛnlanle Sɔɔlo foa ko, na Devidi ebia ɛdeɛ ne awie biala andɛnla zolɛ.

²⁶Kenle ko ne Sɔɔlo anga ɛhwee, ɔdwenlenle kɛ edwɛkɛ bie mɔɔ ɛmmaa Devidi anwo ɛnde la ɛzi ɔ nwo zo.

²⁷Siane Fofolɛ Ɛvoyia ne kenle mɔɔ tɔ zolɛ nwiɔ la ɛkponledolɛ ne abo, Devidi ebia ne eza dɔle mgbane. Na Sɔɔlo bizale ɔ ra Dwɔnatan kɛ, “Duzu ati a anoma nee ɛnɛ, Gyɛsi ara Devidi amba ɛkponledolɛ ye bie a?”

²⁸Dwɔnatan buale Sɔɔlo kɛ, “Devidi zɛlɛle me adenle kɛ ɔkɔ Bɛtelɛhɛm.

²⁹Ɔse, ‘Maa me adenle maa mengɔ, ɔluakɛ yɛ abusua ne ɛlɛbɔ azu, na me mediema ne mɔ ɛhɛla me kɛ membɛla. Yemɔti, saa mezɔ ɛ nye a, ɛnee maa mengɔnwu bɛ.’ Ɛhye ati a ɔnle belemgbunli ɛvoyialilɛ ye abo a.”

³⁰Sɔɔlo vale Dwɔnatan anwo ɛya kpole na ɔyɛle ye aholoba kɛ, “Raalɛ kpamgbanvolɛ ra! Menwu ye wienyi kɛ wɔva ɛ nwo wɔbɔnle Devidi na ɛlɛgua ɛdawɔ nee ɛ nli sonlamgbane ne bɛ nyunlu aze.

³¹Nwu ye wienyi kɛ, sumunli kenle ala mɔɔ Devidi de ngoane nu la, ɛnrɛnyia belemgbunli ɛnrɛli ye ɛlɛ wɔ maanle ɛhye anu. Maa bɛhɔva ye bɛrɛla ndɛndɛ na menye ye zo!”

³²Dwɔnatan bizale ɔ ze kɛ, “Duzu ati bɔbɔ yɛɛ ɔwɔ kɛ ɛku Devidi a? Duzu bɔbɔ yɛɛ yeyɛ a?”

³³Na ɛkɛ ne ala Sɔɔlo dole atwɛ kɛ ɔku Dwɔnatan. Ɛhye manle Dwɔnatan nwunle ye wienyi kɛ ɔ ze ɛvua ɛtafe zolɛ kɛ ɔku Devidi.

³⁴Ɛya hunle Dwɔnatan kpole manle ɔvile ɛkponledolɛ ne abo ɔdwazole. Yeanli Siane Fofolɛ Ɛvoyia ne kenle mɔɔ tɔ zolɛ nwiɔ la aleɛ ne, ɔluakɛ ɛnee ɔlɛdi Devidi anwo nyane kɛ ɔlua ɔ ti ɔ ze ɛbɔ ye aholoba ɛgua ɔ nyunlu aze a.

³⁵Aleɛ hyenle nwonlomɔ la, Dwɔnatan vale kakula ko ɔ nee ye hɔle fienemgbole ne anu, kɛmɔ ɔ nee Devidi bɛhanle bɛziele la.

³⁶Ɔzele kakula ne kɛ, “Meto ɛda na nriandi kɔkpondɛ ɛda mbaka ne mɔ.” Mɔɔ kakula ne ɛlɛnriandi ahɔ la, ɔdole ɛda ne ɔmanle ɛda baka ne dɛlale ye hɔdɔle ɔ nyunlu moa nehane.

³⁷Na mɔɔ kakula ne dwule ɛleka mɔɔ ɛda baka ne hɔdɔle la, Dwɔnatan deanle nu zele ye kɛ, “Ɛda baka ne wɔ ɛ nyunlu moa lɔ.

³⁸Mmagyinla ɛkɛ ne! Ka ɛ nwo!” Kakula ne sesale ɛda mbaka ne mɔ na ɔziale ɔrale Dwɔnatan anwo ɛkɛ.

³⁹Kakula ne yemɔ ɔnze nwolɛ bie; Dwɔnatan nee Devidi a te nyɛleɛ ne abo a.

⁴⁰Na Dwɔnatan vale ye ninyɛne ne mɔ manle kakula ne na ɔzele ye kɛ, “Fa kɔ sua zo.”

⁴¹Kakula ne hɔle ala la, yɛɛ Devidi vi ɛleka mɔɔ ɔvea la vindele a. Ɔrabutule, ɔbɔle ɔ ti aze fane nsa, na ɔ nee Dwɔnatan bɛmetanle bɛ nwo bɛyɛle bɛ nwo atuu na bɛ mu nwiɔ bɛzunle. Na ɛnee Devidi nyane ɛdeɛ mɔɔ ɔlɛdi la bo zolɛ.

⁴²Na Dwɔnatan zele Devidi kɛ, “Kɔ anzonudwolɛ nu; sumunli kenle ala mɔɔ yɛ mu nwiɔ yɛkyekye na yɛli amonle wɔ Ɛdɛnkɛma anyunlu la, Ɛdɛnkɛma ɔdaye ɔbanlea kɛ ɛdawɔ nee medame, ɛ bo zo amra nee me bo zo amra bali ɛwɔkɛ ne azo dahuu.” Devidi vale ɔ ti bɔle nu, na Dwɔnatan ɔdaye ɔziale ɔhɔle sua nu.