Read Nzema 1 Sam 22 Bible Online

1 Sam 22 - Nzema bible

1 Sam 22

¹Devidi vile suakpole Gate azo nriandile hɔveale bolɛ bɔne bie anu wɔ Adulam. Mɔɔ ɔ mediema nee ye mbusuafoɔ ne mɔ dele kɛ ɔwɔ ɛkɛ ne la bɛdoale ye.

²Awie biala mɔɔ bɛlɛsisi ye anzɛɛ tua kakɛ anzɛɛ akunlu ɛndwo mɔɔ ɛlɛkɔ zolɛ la anwo la nriandile doale ye. Bɛ dodo kɛyɛ ɛya nna, na ɔyɛle bɛ kpanyinli ɔlile bɛ ti.

³Devidi vi ɛkɛ ne la ɔhɔle Mezepa mɔɔ wɔ Mowabe maanle nu la na ɔhɔzele Mowabe belemgbunli ne kɛ, “Mesɛlɛ wɔ, maa egya nee ɔmɔ ɛwoa ɛ nwo ɛke kɔkpula mekɛ mɔɔ menwɔnwu mɔɔ Nyamenle kɛyɛ kɛmaa me la.”

⁴Yemɔti Devidi manle ye awovolɛ ne woale Mowabe belemgbunli ne anwo ɛkɛ, wɔ mekɛ tendenle ne mɔɔ ɔlile wɔ bolɛ bɔne ne anu la.

⁵Nyamenle kpɔmanvolɛ Gaade razele Devidi kɛ, “Ɛvi ɛke finde kɔ Dwuda maanle nu.” Yemɔti Devidi vindele na ɔhɔle Hɛlɛte kpɔkɛ nu.

⁶Kenle ko bie ɛnee Sɔɔlo wɔ Gebɛya; ɔde baka kpole bie mɔɔ gyi boka bie azo la abo, na ɔlɛ ye atwɛ ne ɔ sa nu, na ye mgbanyima ne mɔ ɛbɔ ɛyia ye. Bɛrahanle bɛhilele ye kɛ bɛnwu Devidi nee ɔ sa zo ne mɔ.

⁷Na Sɔɔlo zele ye sonvolɛma ne mɔ kɛ, “Bɛmɛ Bɛngyaman asa azo, bɛdie; bɛnea a ɛnee Gyɛsi ara Devidi bamaa awie biala ɛya avule nee vanye egyinli, na yeayɛ awie biala ye ɛlɔnema apenle apenle nwo zo safohyenle anzɛɛ ye ɛlɔnema ɛya ɛya nwo zo neavolɛ ɔ,

⁸mɔɔ yemɔti bɛ muala bɛbɔ kpɔkɛ kɛ bɛko bɛatia me a? Bɛ nuhua biala ɛngola ɛnga ɛngile me kɛ me kunlu ralɛ nrenya nee Gyɛsi ara ne ɛva me nwo adwenle. Me edwɛkɛ ɛngyia bɛ nuhua biala la ati, bɛngola bɛnyɛ me anzote bɔbɔ kɛ me ra ne ɛli ɛwula me sonvolɛ Devidi kɛ ɔzia me ɔhu me toonwo a yeradwu ɛnɛ a.”

⁹ Mekɛ ne anu ɛnee Yidɔmenli Dowɛge nee Sɔɔlo sonvolɛma ne mɔ a gyi ɛkɛ a, na ɔzele ye kɛ, “Menwunle kɛ Gyɛsi ara ne wɔ Ahaetɛbe ara Ahemɛlɛke anwo ɛkɛ ne wɔ Nɔɔbo.

¹⁰Ahemɛlɛke bizale Ɛdɛnkɛma debie mɔɔ ɔwɔ kɛ Devidi yɛ la, eza ɔmanle ye aleɛ na ɔvale Filisitianli Golayate konle dadeɛ ne ɔmanle ye.”

¹¹Yemɔti Belemgbunli Sɔɔlo manle bɛhɔvale Ahaetɛbe ara sɛlɛvolɛ Ahemɛlɛke nee ɔ ze awuke nu amra mɔɔ bɛdabɛ noko bɛle sɛlɛvolɛma wɔ Nɔɔbo la bɛrale.

¹²Sɔɔlo zele Ahemɛlɛke kɛ, “Ahaetɛbe ara, tie!” Ahemɛlɛke buale kɛ, “Nana, melɛtie.”

¹³Sɔɔlo bizale ye kɛ, “Duzu ati yɛɛ ɛdawɔ nee Gyɛsi ara ne bɛhɔ me ti akpamo, bɔbɔ wɔmaa ye kpanwo nee konle dadeɛ, na eza wɔbiza ɔ ti wɔ Ɛdɛnkɛma ɛkɛ ne wɔmaa ye, amaa ɔlua zolɛ ɔlɛko yeatia me, na sumunli kɛ de la yedɛ me toonwo yeradwu ɛnɛ, ɔkpondɛ me yeahu me a?”

¹⁴Ahemɛlɛke buale belemgbunli ne kɛ, “Wɔ wɔ sonvolɛma kɔsɔɔti anu, nwane bɔbɔ yɛɛ di nɔhalɛ nee Devidi, ɛ ra raalɛ ne ɔ hu ne mɔɔ le sinzavolɛma kpanyinli, na bɛdi ye eni kpole wɔ wɔ suakunlu ɛke la sɛ a?

¹⁵Na ɛnɛ ala a le kenle mɔɔ lumua mɔɔ mebiza ɔ ti wɔ Ɛdɛnkɛma ɛkɛ ne memaa ye a? Mɔɔ fane ɛ ti akpamovalɛ nwo, medame anzɛɛ egya awuke nu sonla biala ɛnze nwolɛ ɛhwee. Yemɔti, Nana, mmafa edwɛkɛ ɛhye ɛsuzu yɛ.”

¹⁶Na belemgbunli ne zele kɛ, “Ahemɛlɛke, ɛdawɔ nee ɛ ze awuke nu amra kɔsɔɔti, ɔwɔ kɛ bɛku bɛ.”

¹⁷Belemgbunli zele ye sinzavolɛma ne mɔ kɛ, “Bɛhu Ɛdɛnkɛma sɛlɛvolɛma ne mɔ kɔsɔɔti, ɔluakɛ bɛ nee Devidi vale akpamo na bɛanga bɛangile me kɛ yenriandi.” Na sinzavolɛma ne mɔ angulo kɛ bɛkɛhu Ɛdɛnkɛma sɛlɛvolɛma ne mɔ anu ko bɔbɔ.

¹⁸Sɔɔlo zele Dowɛge kɛ, “Wɔmɔ, ku bɛ!” Na Dowɛge hunle sɛlɛvolɛma abulatwɛ nee nnu ne mɔɔ ɛnee wula sɛlɛvolɛ tɛladeɛ fufule ne mɔɔ bɛfɛlɛ ye “Yifɔdo” la.

¹⁹Eza Sɔɔlo manle bɛhunle suakpole Nɔɔbo ezuavolɛ mɔɔ bɛ kɔsɔɔti asɛɛ bɛle sɛlɛvolɛma la. Bɛhunle mrenya nee mraalɛ, ngakula nee nlɔma, nlankɛ, asoaso nee mboane.

²⁰Na Ahemɛlɛke amra mrenya ne mɔ ko mɔɔ bɛfɛlɛ ye Abayata la nriandile, na ɔhɔle Devidi anwo lɔ.

²¹Ɔvale kɛ Sɔɔlo ɛmaa bɛzi bɛhu Ɛdɛnkɛma sɛlɛvolɛma kɔsɔɔti la ɔbɔle ye amaneɛ.

²²Devidi zele Abayata kɛ, “Menwunle Dowɛge wɔ ɛkɛ ne kenle ko ne ala la, ɛnee meze kɛ ɔbahɔha yeahile Sɔɔlo. Yemɔti medi ɛzonle. Ɔlua me ti yɛɛ ɛ ze awuke nu amra kɔsɔɔti ɛwu a.

²³Mmasulo, boa ɛke; ahenle mɔɔ kpondɛ me ahu me la asa ka wɔ a, ɔbahu wɔ; saa ɛde me nwo ɛke a, ɛ nwo kɔlɔnwo.”