Read Nzema 1 Sam 23 Bible Online

1 Sam 23 - Nzema bible

1 Sam 23

¹Bɛrahanle bɛhilele Devidi kɛ, Filisitiama nee Kiayelama ɛlɛko na bɛlɛwua bɛ abɛlɛ mɔɔ bɔ zo mɔɔ bɛbu la amuala.

²Yemɔti Devidi bizale Ɛdɛnkɛma kɛ, “Me nee Filisitiama ɛhɔho ɔ?” Ɛdɛnkɛma zele Devidi kɛ, “Kɔ kɔho tia Filisitiama na die Kiayela.”

³Na Devidi asa zo ne zele ye kɛ, “Nea, Dwuda maanle ye anu bɔbɔ yɛsulo, na Kiayela yɛɛ akee yɛkɔ yɛ nee Filisitiama ahɔho a?”

⁴Yemɔti Devidi eza bizale Ɛdɛnkɛma bieko, na Ɛdɛnkɛma zele ye kɛ, “Dwazo kɔ Kiayela, ɔluakɛ mebaye Filisitiama meamaa wɔ.”

⁵Devidi nee ɔ sa zo ne mɔ hɔle Kiayela na bɛ nee Filisitiama hɔhonle, bɛhunle bɛ somaa ne ala na bɛzoale bɛ nlankɛ ne mɔ kɔsɔɔti bɛhɔle. Na Devidi liele Kiayela ezuavolɛ ne ngoane.

⁶Mekɛ mɔɔ Ahemɛlɛke ara Abayata nriandi ahɔ Devidi anwo lɔ wɔ Kiayela la, ɔvale sɛlɛvolɛ tɛladeɛ fufule ne mɔɔ bɛfɛlɛ ye Yifɔdo la ko.

⁷Bɛhɔhanle bɛhilele Sɔɔlo kɛ Devidi ɛra Kiayela. Na ɔzele kɛ, “Nyamenle ɛye Devidi ɛmaa me, ɔluakɛ ɔdaye ɔ ngome yedo ɔ nwo efiade kɛ yera sua mɔɔ bɛlie nwolɛ bane na ɔlɛ nlenkɛ mgbole mɔɔ mbulalɛ gua bɛ nzi la azo a.”

⁸Yemɔti Sɔɔlo hanle ye ɛlɔnema ne kɔsɔɔti guale adenle zo, kɛ bɛkabɔ bɛayia Kiayela na bɛahye Devidi nee ye ɛlɔnema ne.

⁹Devidi dele kɛ Sɔɔlo nee ye ɛlɔnema ɛlɛba ɔ nwo zo la, ɔzele sɛlɛvolɛ Abayata kɛ, “Fa yifɔdo ne bɛla.”

¹⁰Akee Devidi zele kɛ, “O Ɛdɛnkɛma, Yizilayɛ Nyamenle, wɔ sonvolɛ ye ɛde kɛ Sɔɔlo ɛboɔboa ɔ nwo kɛ ɔba Kiayela yearazɛkye sua ye wɔ medame me ti.

¹¹Ɛnea a Kiayela ezuavolɛ baye me amaa ye ɔ? Kɛmɔ wɔ sonvolɛ ye ɛde la, ɛnea a Sɔɔlo bara amgba ɔ? O Ɛdɛnkɛma, Yizilayɛ Nyamenle, mesɛlɛ wɔ, ka kile me.” Ɛdɛnkɛma zele kɛ, “Ɛhɛe, ɔbara.”

¹²Na Devidi zele kɛ, “Ɛnea a Kiayela ezuavolɛ ye baye me nee me ɛlɔnema amaa Sɔɔlo ɔ?” Ɛdɛnkɛma zele kɛ, “Bɛbaye wɔ bɛamaa.”

¹³Na Devidi nee ye ɛlɔnema ne mɔɔ kɛyɛ ɛya nsia la vile Kiayela na bɛvale bɛ ti bɛbɔle nu. Mɔɔ Sɔɔlo dele kɛ Devidi vi Kiayela ɛye ɔ nwo la, ɔgyakyile Kiayela ɛhɔlɛ ne.

¹⁴Devidi veale fienemgbole ne mɔɔ zua Zefe la anu wɔ awoka ne mɔ azo. Sɔɔlo bɔle mɔdenle kpondɛle ye biala, na Nyamenle anye Devidi ammaa ye ɛlɛ.

¹⁵Devidi nwunle kɛ Sɔɔlo kpondɛ kɛ ɔku ye. Ɛnee Devidi wɔ Hɔlɛhye mɔɔ wɔ fienemgbole ne mɔɔ zua Zefe la anu.

¹⁶Na Dwɔnatan hɔle ɔ nwo lɔ na ɔhɔzile ye ahonle kɛ, “Wɔ adenle biala anu, Nyamenle bazinza wɔ.”

¹⁷Ɔhanle ɔzɔle zolɛ kɛ, “Mmasulo, ɔluakɛ egya Sɔɔlo asa ɛnrɛha wɔ ɛnrɛhu wɔ ɛlɛ. Ɔze ye wienyi kɛ ɛbali Yizilayɛ belemgbunli na medame noko meadɛnla ɛ sa fema zo.”

¹⁸ Na bɛ mu nwiɔ bɛvale Ɛdɛnkɛma bɛbɔle bɛ nwo ɛwɔkɛ kɛ bɛkɛyɛ mediema dahuu. Devidi woale Hɔlɛhye, na Dwɔnatan ziale hɔle sua nu.

¹⁹Menli bie vi Zefe hɔle Sɔɔlo anwo lɔ wɔ Gebɛya hɔzele ye kɛ, “Devidi vea yɛ maanle ne anu wɔ Hɔlɛhye wɔ Hakaela Boka, wɔ Dwuda fienemgbole ne nyiakɛ.

²⁰Nana, yɛze kɛ ɛ nye ɛbolo kɛ ɛkpondɛ ye wɔahye ye; yemɔti bɛla, na yɛbabɔ mɔdenle biala mɔɔ kɛyɛ boɛ la yɛamaa ɛ sa aha ye.”

²¹Na Sɔɔlo zele kɛ, “Ɛdɛnkɛma ɛyila bɛ kɛ bɛyɛ nyele ɛhye bɛmaa me a.

²²Bɛhɔ, bɛhɔnlea ye boɛ; bɛnlea ɛleka fɔɔnwo mɔɔ ɔvea la, ɔluakɛ mede kɛ ɔ nwo yɛ ɛvɛlɛ.

²³Bɛhɔ na bɛhɔnleɛnlea ɛleka mɔɔ ɔyɛ a ɔfeɛvea la kpalɛ, na bɛrabɔ me amaneɛ, na me nee bɛ ahɔ. Na saa amgba ɔwɔ Dwuda maanle ne anu ɛdeɛ a, yemɔ ɛleka biala mɔɔ ɔwɔ la, me sa baha ye meahye ye.”

²⁴Yemɔti bɛziale bɛlumuale Sɔɔlo anyunlu wɔ Zefe. Ɛnee Devidi nee ye ɛlɔnema ne wɔ Meeyɔn fienemgbole ne anu, wɔ bɔnza bie mɔɔ awie fee ɛngɔ ɛkɛ na ɔwɔ Dwuda fienemgbole ne nyiakɛ la anu.

²⁵Sɔɔlo nee ye ɛlɔnema ne zile nu kɛ bɛkakpondɛ ye. Devidi dele nwolɛ bie; yemɔti ɔhɔle awoka bie anu wɔ Meeyɔn fienemgbole ne anu lɔ.

²⁶Sɔɔlo dwule boka ne foa ko la, ɛnee Devidi nee ye ɛlɔnema ne noko wɔ ye foa ko. Devidi nwunle kɛ Sɔɔlo nee ye ɛlɔnema ne ɛkpumgbu bɛ kpalɛ na asɛɛ bɛhye bɛ, yemɔti ɔ nee ye ɛlɔnema ne hanle bɛ nwo ndɛndɛ kɛ bɛye bɛ nwo zo.

²⁷Mekɛ ne anu ala yɛɛ ɛbɔfoɔ razele Sɔɔlo kɛ, “Ka ɛ nwo bɛla sua nu ndɛndɛ, ɔluakɛ Filisitiama ɛrava maanle ne.”

²⁸Yemɔti Sɔɔlo gyakyile Devidi ɛvoanlɛ na ɔziale ɔhɔle kɛ ɔ nee Filisitiama kaho. Ɔlua ɛhye ati bɛvɛlɛle boka zɔhane Avinlitetelɛ Boka.

²⁹Devidi vile ɛkɛ ne hɔle afea wɔ Ɛngidae maanzinli nu.