Read Nzema 1 Sam 25 Bible Online

1 Sam 25 - Nzema bible

1 Sam 25

¹Akee Samoɛle wule; Yizilayɛma kɔsɔɔti zunle ye na bɛziele ye wɔ ye sua zo Releema. Ɛhye anzi, Devidi hɔle Pɛlan fienemgbole ne anu.

²Nrenya bie wɔ Meeyɔn, bɛfɛlɛ ye Neebale. Ɔbɔ Kalɛbe abusua ne bie yɛɛ ɔlɛ azɛlɛ bie zua sua Kamɛle. Ɔle sukoavolɛ kpole kpalɛ; ɔlɛ mboane apenle nsa yɛɛ mbɔnkye apenle ko. Ɔ ye Abegeli le raalɛ anwofɛlɛko na eza ɔle nrɛlɛbɛvolɛ, na ɔ hu ɛdeɛ, ɔnle nrenya kpaziwɔkɛ biala, yɛɛ eza ɔnlɛ subane.

⁴Ɛnee Neebale ɛlɛpepɛ ye mboane ne mɔ anwo enrinli wɔ Kamɛle, na Devidi dele ye wɔ fienemgbole ne anu lɔ.

⁵Yemɔti ɔzoanle mgbavolɛ bulu na ɔzele bɛ kɛ, “Bɛhɔ Neebale ɛkɛ ne wɔ Kamɛle bɛhɔbiza ye ahye.

⁶Bɛkɔ a bɛze ye kɛ Devidi se, ‘Anzonudwolɛ ɛha wɔ, anzonudwolɛ ɛha wɔ awuke nu amra na anzonudwolɛ ɛha debie biala mɔɔ ɛlɛ la.

⁷Mede kɛ ɛlɛpepɛ wɔ mboane ne mɔ anwo enrinli. Memaa wɔade kɛ mekɛ mɔɔ wɔ mboaneneavolɛma ne nee yɛ de Kamɛle ɛke la, yɛanyɛ biala ɛtane, awie biala anva ɔ sa anga bɛ debie biala.

⁸Ɛdawɔ mumua ne biza bɛ na bɛbaha nɔhalɛ ne bɛahile wɔ. Yɛwɔ ɛvolɛ nu, yemɔti Devidi se ɛlie yɛ gyɛlɛɛnye. Yɛsɛlɛ wɔ, debie biala mɔɔ ɛfa ɛmaa wɔ sonvolɛma nee ɛ gɔnwo kpalɛ Devidi a ɔyɛ anyenzɔlɛ la, fa maa yɛhɔ.’ ”

⁹Devidi soanvolɛma ne hɔhanle nrɛlaleɛ ne hilele Neebale na bɛhendɛle kɛ bɛdie mualɛ.

¹⁰Neebale zele Devidi soanvolɛma ne mɔ kɛ, “Devidi! Yemɔ a le nwane? Gyɛsi ara nrenya a le nwane? Metɛtele ye duma bɔbɔ ɛlɛ. Kenle nsa ye, sonvolɛma dɔɔnwo vi bɛ menle mɔ anwo ɛnriandi.

¹¹Mame, menrɛva me kpanwo nee me nzule nee me nane mɔɔ meku ye meamaa menli mɔɔ pepɛ me mboane nwo enrinli la menrɛmaa menli mɔɔ menze ɛleka mɔɔ bɛvi la.”

¹²Yemɔti soanvolɛma ne ziale vale edwɛkɛ ne hɔbɔle Devidi amaneɛ.

¹³Na Devidi zele ɔ sa zo ne mɔ kɛ, “Awie biala ɛzɔ ye konle dadeɛ ne anu boɛ.” Awie biala vale ye dadeɛ ne, Devidi ɔdaye ɔvale ye ɛdeɛ ne, ɔgyakyile menli ɛya nwiɔ ɔ nzi kɛ bɛnlea bɛ ninyɛne ne mɔ, na ɔvale ɛya nna ɔlile ɔ nzi.

¹⁴Na mgbavolɛ ne mɔ ko hanle hilele Neebale aye Abegeli kɛ, “Nea, Devidi zoanle soanvolɛma manle bɛvi fienemgbole ne anu bɛrale yɛ menle ɛkɛ ne rabizale ye ahye, na ɔbɔle bɛ aholoba.

¹⁵Menli ne yɛle menli kpalɛ manle yɛ; bɛanyɛ yɛ ɛtane, yɛɛ mekɛ tendenle ne mɔɔ yɛ nee bɛ dɛnlanle fienemgbole ne anu la, yɛ debie biala fee amminli.

¹⁶Bɛbɔle yɛ nwo bane nɔɔzo nee ewiazo wɔ mekɛ mɔɔ ɛnee yɛlɛnea yɛ mboane ne mɔ la.

¹⁷Mesɛlɛ wɔ, dwenle ɛhye anwo ɛsesebɛ na bu nwolɛ amaamuo kpalɛ. Ɔluakɛ ɛhye kola twe munzule maa yɛ menle ne nee ye awuke nu amra; yɛɛ ɔnlɛ subane noko bɔbɔ mɔɔ bɛka ye edwɛkɛ a ɔfa a.”

¹⁸Ndɛndɛ ne ala Abegeli vale kpanwo ahunguma ɛya nwiɔ, nwanye nwoma ahodoku nwiɔ, mboane mɔɔ bɛbia bɛ la nnu, ma ngyehye kilo bulu nee nsuu, vanye ma welera aziakɛ ɛya ko, yɛɛ keeki mɔɔ bɛva feege ma bɛyɛ la ɛya nwiɔ, na bɛkyekyele bɛ wɔ asoaso nzi.

¹⁹Akee ɔzele ye mgbavolɛ ne mɔ kɛ, “Bɛva bɛlumua me nyunlu, medame me gyakɛ gyi adenle zo melɛba.” Na yeambɔ ɔ hu amaneɛ.

²⁰Abegeli de ye asoaso ne azo ɔlɛkɔ, na ɔbule amie ko bie wɔ boka ne agye nu la, ɔnwunle kɛ ɔ nee Devidi nee ye ɛlɔnema ɛlɛyia.

²¹Ɛnee Devidi ɛlɛdwenle nwolɛ kɛ, “Na duzu ati bɔbɔ yɛɛ membɔle sonla zɔhane agyadeɛ ne anwo bane wɔ fienemgbole ne anu a? Ye debie sinli bɔbɔ amminli. Moalɛ kpole ɛhye mɔɔ menvale memboale ye la nwolɛ kakɛ mɔɔ yeva yedua me la ɛne.

²²Menli zɔhane mɔ, saa meangu bɛ meambɔ bɛ bo zo kolaa na maanle nu atete a, Nyamenle ɛhu me.”

²³Mɔɔ Abegeli nwunle Devidi la, ɔvi ye asoaso ne azo ɔdwule aze ndɛndɛ, ɔhɔbutule Devidi anyunlu ɛkɛ na ɔbɔle ɔ ti aze ɔmanle ye.

²⁴Ɔdule ɔdɔle ɔ gyakɛ anu na ɔzele ye kɛ, “Yɛmenle, mesɛlɛ wɔ, tie me. Medi ɛhye anwo ɛzonle.

²⁵Mmadwenle Neebale nyɛleɛ ne anwo, ɔluakɛ ɔlɛ ahonle, yɛɛ ye duma mumua ne kile ye subane, koasea ɔ. Yɛmenle, mɔɔ wɔ soanvolɛma ne mɔ rale la, ɛnee menle ɛkɛ.

²⁶Ɛdɛnkɛma a ɛhwe wɔ ɛzia mɔɔ yeammaa wɔanli nzenralɛ wɔangu wɔ kpɔvolɛma a. Meka tease Ɛdɛnkɛma kɛ wɔ kpɔvolɛma nee awie biala mɔɔ kulo kɛ ɔsɛkye wɔ la, bɛbadua bɛ kakɛ kɛ bɛdua Neebale la.

²⁷Mesɛlɛ wɔ, die ahyɛlɛdeɛ ɛhye mɔɔ wɔ sonvolɛ raalɛ ye ɛva ɛrɛlɛ wɔ la, na fa maa wɔ mgbavolɛ mɔɔ li ɛ nzi la.

²⁸Mesɛlɛ wɔ, ɛtane biala mɔɔ meyɛ la, fa kyɛ me. Ɛdɛnkɛma bamaa wɔali belemgbunli, ɛ bo zo amra noko bali belemgbunli, ɔboalekɛ ɛlɛko wɔamaa ye, na melɛ dodo biala mɔɔ ɛbali la, munzule ɛnrɛdo wɔ ɛlɛ.

²⁹Saa awie se kɛ ɔku wɔ a, Ɛdɛnkɛma wɔ Nyamenle ne bava wɔ avea gyɛlɛɛnye, kɛmɔ sonla sinza ye agyadeɛ mɔɔ sonle bolɛ la. Na mɔɔ fane wɔ kpɔvolɛma ne mɔ anwo, ɔbavuandi bɛ yeagua kɛ bɛto totoabɔ la.

³⁰Akee mɔɔ Ɛdɛnkɛma kɛwie debie kpalɛ biala mɔɔ yeva yebɔ wɔ ɛwɔkɛ la yɛ na yezie wɔ Yizilayɛ belemgbunli yewie la,

³¹debie biala ɛnle ɛkɛ mɔɔ kɛmaa ɛkɛli nyane anzɛɛ kɛmaa ɛ nwo kɛbubu wɔ, kɛ wɔanga mogya mɔɔ ɛnze nwolɛ bie la wɔangua anzɛɛ wɔanli nzenralɛ a. Na akee saa Ɛdɛnkɛma wie wɔ yila a, anrɛɛ mmamaa ɛ rɛle fi me.”

³²Na Devidi zele Abegeli kɛ, “Ayɛlɛyelɛ ɛha Ɛdɛnkɛma, Yizilayɛ Nyamenle ne, mɔɔ zoanle wɔ kɛ ɛnɛ demua ye ɛ nee me ɛyia la.

³³Yɛyɛ Ɛdɛnkɛma mo kɛ yemaa wɔ nrɛlɛbɛ kpalɛ ɛhye, yɛɛ nyilalɛ ɛha ɛdawɔ mumua ne kɛ wɔammaa meanli nzenralɛ meanga mogya meangua a.

³⁴Ɛdɛnkɛma ɛgogo me ahonle, yeammaa meanzɛkye bɛ. Meka Yizilayɛ tease Nyamenle ne kɛ, saa ɛ nwo anyɛ ndɛ ɛ nee me anyia a, anrɛɛ toonwo mɔɔ aleɛ kahye la, ɛnee Neebale menli ne mɔ ɛdɔ amolɛ nu, mɔɔ ko bɔbɔ ɛnrɛha a.”

³⁵Akee Devidi liele Abegeli ahyɛlɛdeɛ ne na ɔzele ye kɛ, “Kɔ sua nu anzonudwolɛ nu; medie ɛ ne, na mekponle wɔ modolɛ ne azo.”

³⁶Abegeli ziale hɔle sua nu na ɔhɔdole kɛ Neebale ɛdo ɛkponle kpole bie kɛ asɛɛ belemgbunli bie la, ɔ nye ɛlie na yebo kpole kpalɛ. Yemɔti yeanga ɛhwee yeangile ye hɔkpulale ye alehyenlɛ nu.

³⁷Aleɛ hyenle na Neebale anye zo tetele ye la, ɔ ye hanle mɔɔ zile la amuala hilele ye, na ɛkɛ ne ala ɔgolole ɔguale na ɔdwidwele.

³⁸Ye kenle bulu ne azo Ɛdɛnkɛma manle ɔwule.

³⁹Devidi dele kɛ Neebale ɛwu la, ɔhanle kɛ, “Ayɛlɛyelɛ ɛha Ɛdɛnkɛma kɛ yeli Neebale aholoba ne mɔɔ ɔbɔle me la anwo nzenralɛ na yeammaa medame, ye sonvolɛ anyɛ ɛtane a. Ɛdɛnkɛma ɛmaa Neebale ɛtane ne ɛbɔ ɔ ti.” Na Devidi zoanle manle bɛhɔbizale Abegeli agyalɛ.

⁴⁰Devidi soanvolɛma ne rale Abegeli anwo ɛkɛ ne wɔ Kamɛle na bɛzele ye kɛ, “Devidi ɛzoa yɛ kɛ yɛrava wɔ yɛrɛla na ɛrayɛ ɔ ye.”

⁴¹Abegeli dwazole na ɔbɔle ɔ ti aze na ɔhanle kɛ, “Mele ye sonvolɛ mɔɔ ɛboɔboa ɔ nwo kɛ ɔkɛwowo ye sonvolɛma agyakɛ anwo a.”

⁴²Ɔdwazole ɔvole ye asoaso ne azo; ɔvale ye sonvolɛ mraalɛ nnu ne na ɔ nee Devidi sonvolɛma ne hɔle na ɔhɔgyale Devidi.

⁴³Devidi ɛnee ɛgya Ahenoam mɔɔ vi Gyɛzɛli la, yemɔti bɛ mu nwiɔ bɛyɛle ye mraalɛ.

⁴⁴ Sɔɔlo vale Maekale mɔɔ ɛnee le Devidi aye la manle Leeyehye ara Paletae mɔɔ vi Galem la gyale.