Read Nzema 1 Sam 29 Bible Online

1 Sam 29 - Nzema bible

1 Sam 29

¹Filisitiama boɔboale bɛ ɛlɔnema kɔsɔɔti anloa wɔ Efɛke. Yizilayɛma noko boɔboale bɛ nloa wɔ azudenle ne mɔɔ wɔ Gyɛzɛli Bɔnza ne anu la anloa.

²Filisitia arelemgbunli ne mɔ nee bɛ ɛlɔnema ekpunli ɛya ɛya nee ekpunli apenle apenle ne mɔ guale adenle zo. Devidi nee ye ɛlɔnema li Belemgbunli Ekehye anzi.

³Na Filisitia safohyenlema ne bizale kɛ, “Duzu a Hibuluma ɛhye mɔ yɛ ye wɔ ɛke a? ” Ekehye buale safohyenlema ne kɛ, “Yizilayɛ Belemgbunli Sɔɔlo sonvolɛ ne mɔɔ bɛfɛlɛ ye Devidi la ɛne. Ɔ nee me ɛradɛnla gyɛlɛɛnye mekɛ dɔɔnwo, yɛɛ sumunli kɛ bɛkpole ye bɛmanle me la, metɛtele ɔ nwo edwɛkɛ ɛtane nretee bɔbɔ ɛlɛ.”

⁴Filisitia safohyenlema ne vale Ekehye anwo ɛya kpole na bɛzele ye kɛ, “Maa ɔzia ɔhɔ sua ne mɔɔ ɛvale ɛmanle ye la azo. Yɛ nee ye kɔ konle ne a, ɔnrɛyɛ boɛ. Saa konle ne kyele zolɛ na wɔannea a ɔkɛpɛ ɔ nwo ɔ nee yɛ kɛho. Ɔluakɛ adenle kpalɛ biala ɛnle ɛkɛ mɔɔ ɔkola ɔfa zolɛ ɔ nee ye belemgbunli ne yɛ ko kɛ ɛhye anu ala. Ɔpepɛ yɛ ti yeahɔ na ɔ nee ye belemgbunli ne bɛ avinli azɛ.

⁵ Tɛ Devidi ɛhye a bɛbɔ ye duma bɛto edwɛne bɛsi ɔ nloa agole kɛ, ‘Sɔɔlo ɛhu apenle, na Devidi ɛhu apenle apenle bulu, la ɔ?’ ”

⁶Belemgbunli Ekehye vɛlɛle Devidi na ɔzele ye kɛ, “Meka Ɛdɛnkɛma kɛ wɔli nɔhalɛ wɔmaa me bɔkɔɔ. Ɔhale me ngome a anrɛɛ mese ɛmaa yɛhɔ konle ne, ɔluakɛ sumunli kɛ ɛ nee me radɛnlanle la, metɛnwunle ɛtane biala mɔɔ wɔyɛ me toonwo a yeradwu ɛnɛ demua ye a. Noko akee arelemgbunli mɔɔ ɛha la ɛnlie ɛndo nu kɛ ɛ nee yɛ kɛhɔ.

⁷Yemɔti sia kɔ sua nu anzonudwolɛ nu, amaa Filisitia arelemgbunli ne mɔ annyia ɛ nwo edwɛkɛ biala anga.”

⁸Na Devidi zele Ekehye kɛ, “Duzu ɛtane yɛɛ meyɛ a? Kɛmɔ ɛdawɔ wɔha la, sumunli kɛ me nee wɔ radɛnlanle la, saa ɛtɛnwunle ɛtane biala mɔɔ meyɛ la a, ɛnee duzu ati yɛɛ me nee me menli nee me belemgbunli ɛnrɛhɔ konle ne na menrɛho menrɛtia ye kpɔvolɛma ɛ?”

⁹Na Ekehye buale ye kɛ, “Wɔ me nyunlu a ɛdi nɔhalɛ bɔkɔɔ kɛ Nyamenle soanvolɛ. Noko akee Filisitia safohyenlema ne se bɛ nee wɔ kɔ konle ne a, ɔnrɛyɛ boɛ.

¹⁰Yemɔti, nwonlomɔ anrɛɛ dwazo ndɛ, saa maanle nu tete ala a, fa menli mɔɔ nee wɔ lua la sia kɔ.”

¹¹Yemɔti nwonlomɔ mangyee ne ala Devidi nee ye ɛlɔnema ne ziale hɔle Gyɛzɛli.