Read Nzema 1 Sam 4 Bible Online

1 Sam 4 - Nzema bible

1 Sam 4

¹Mekɛ ne anu, Filisitiama boɔboale bɛ ɛlɔnema anloa kɛ bɛ nee Yizilayɛma baho. Yemɔti Yizilayɛma noko dule bɛ bo kɛ bɛ nee bɛ kaho. Yizilayɛma yɛle azokoɛleɛ wɔ Ɛbɛnizɛ yɛɛ Filisitiama noko yɛle bɛ azokoɛleɛ wɔ Efɛke.

²Filisitiama tetale Yizilayɛma na bɛhonle ɛsesebɛ bɛlile Yizilayɛma anwo zo konim; bɛhunle Yizilayɛma apenle nna wɔ konle ne anu.

³Yizilayɛ ɛlɔnema mɔɔ hale la ziale rale bɛ azokoɛleɛ ne la, bɛ mgbanyima ne bizale kɛ, “Duzu ati a ɛnɛ Ɛdɛnkɛma ɛmaa Filisitiama ɛli yɛ nwo zo konim a? Bɛmaa yɛhɔ Hyaelo yɛhɔva Ɛdɛnkɛma Ngyekyeleɛ Ɛlɛka ne yɛrɛla ɛke, amaa yearadɛnla yɛ avinli na yealie yɛ yeavi yɛ kpɔvolɛma tumi ne abo.”

⁴ Yemɔti bɛzoanle menli bɛmanle bɛhɔle Hyaelo bɛhɔvale Ngyekyeleɛ Ɛlɛka ne mɔɔ Tumivolɛ Ɛdɛnkɛma de ye ebia nu wɔ tease abɔdeɛ ne mɔ avinli anwuma la rale. Yilae amra mrenya nwiɔ ne, Hɔfenae nee Fenɛhaze boka nwolɛ a bɛrale a.

⁵Mekɛ mɔɔ bɛ nee Ɛdɛnkɛma Ngyekyeleɛ Ɛlɛka ne dwule azokoɛleɛ ɛkɛ ne la, Yizilayɛma ne wudole kpole bie manle azɛlɛ kpusule.

⁶Mɔɔ Filisitiama dele ɛwudolɛ kpole ne la, bɛzele kɛ, “Na ɛwudolɛ kpole ɛhye mɔɔ vi Hibuluma azokoɛleɛ ne ba la abo a le duzu?” Na bɛdele kɛ Ɛdɛnkɛma Ngyekyeleɛ Ɛlɛka ne ɛdwu azokoɛleɛ ɛkɛ ne.

⁷Ɛzulolɛ kpole hanle bɛ; na bɛzele kɛ, “Nyamenle bie ɛra bɛ azokoɛleɛ ɛkɛ. Yɛwie bɔkɔɔ. Debie zɛhae bie ɛtɛsile yɛ nwo zo ɛlɛ.

⁸Yɛwie! Nwane a kɛhola kɛlie yɛ kɛvi nyamenle anwo ɛzulolɛ ɛhye mɔ asa anu a? Bɛmɛ a bɛhunle Yigyibitima bɔkɔɔ wɔ fienemgbole ne anu la.

⁹Yemɔti Filisitiama, bɛzi ahonle. Bɛho kɛ mrenya na anrɛɛ yɛkɛyɛ ahanra yɛkɛmaa Hibuluma kɛ mɔɔ ɛnee bɛle bɛmaa yɛ la. Yemɔti bɛho bɛhile kɛ bɛle mrenya.”

¹⁰Na Filisitiama honle ɛsesebɛ lile Yizilayɛma anwo zo konim bɛmanle bɛguale ndwɛlɛ aze. Bɛbiale Yizilayɛma mogya takaa; bɛhunle Yizilayɛ ɛlɔnema ne anu apenle ngoko abulasa.

¹¹Bɛvale Nyamenle Ngyekyeleɛ Ɛlɛka ne donvula na bɛhunle Yilae amra mrenya nwiɔ ne.

¹²Nrenya bie mɔɔ vi Bɛngyaman abusua ekpunli ne anu la vi ɛlɔne ne anloa nriandile hɔdwule Hyaelo kenle ko ne. Nyane mɔɔ ɛnee ɔlɛdi la manle ɔsuosuanle tɛladeɛ mɔɔ ɔwula la anu na ɔvale ndɛtɛlɛ ɔyɛle ɔ ti zo.

¹³Mɔɔ nrenya ne dwule suakpole ne azo la ɛnee Yilae de ebia nu wɔ adenle ne foa ko na ɔ nye gyi adenle zo, ɔluakɛ ɛnee ye adwenle kɔsɔɔti gyi Nyamenle Ngyekyeleɛ Ɛlɛka ne azo. Mɔɔ nrenya ne bɔle ye amaneɛ ne wiele la, ɛzulolɛ kpole hanle ezuavolɛ ne na bɛdeɛdeanle nuhua.

¹⁴Yilae dele alɛra ne mɔɔ menli ne ɛlɛyɛ la, ɔbizale kɛ, “Alɛra ɛhye abo a le duzu?” Nrenya ne nriandile rale Yilae anwo ɛkɛ na ɔvale amaneɛ ne ɔbɔle ye.

¹⁵Ɛnee Yilae ɛli ɛvolɛ abulahɔnla nee mɔtwɛ; akee yeyɛ ɛrelera na ɔ nye ɛyɛ, yemɔti ɔnnwu debie kpalɛ.

¹⁶Na nrenya ne zele Yilae kɛ, “Ɛnɛ kenle ko ye ala yɛɛ mevi ɛlɔne ne anloa menriandi mera a.” Yilae bizale ye kɛ, “Me ra, kɛ konle ne zile wiele ye ɛ?”

¹⁷Nrenya ne buale ye kɛ, “Yizilayɛma ɛgua ɛbɔ nu wɔ Filisitiama anyunlu, konle ne sinli nyunlu yɛle ɛzulolɛ; ɛ mra nwiɔ ne, Hɔfenae nee Fenɛhaze ɛdɔ amolɛ nu, bɛhu yɛ ɛlɔnema ne bɔkɔɔ, yɛɛ bɛva Nyamenle Ngyekyeleɛ Ɛlɛka ne donvula.”

¹⁸Yilae dele amaneɛ ne mɔɔ fane Nyamenle Ngyekyeleɛ Ɛlɛka ne anwo la, ɔvi ebia ne mɔɔ ɔde nu la anu ɔdɔle aze alɛnranyunlu wɔ anlenkɛ kpole ne foa ko; ɔ kɔme bule na ɔwule. Ɔluakɛ ɛnee yeyɛ ɛrelera na ɔ nwo ɛyɛ ɛnlomboɛ. Yilae ziele Yizilayɛma ɛvolɛ abulanla.

¹⁹Yilae ara Fenɛhaze aye ne ɛnee ɛva ɛkolɛ na ɔka ekyii ye awolɛ mekɛ dwu. Mɔɔ ɔdele kɛ bɛva Nyamenle Ngyekyeleɛ Ɛlɛka ne donvula na ɔ hu ɔ ze Yilae nee ɔ hu Fenɛhaze ɛwu la, ɔwole mgbemgbene nu.

²⁰Mekɛ mɔɔ ɔkpondɛ yeaha bɛ sa nu la, mraalɛ mɔɔ ɛlɛdie ye awolɛ la zele ye kɛ, “To wɔ ɛbolɛ azule nu na wɔwo ralɛ nrenya.” Na yeangyea ɔ nye bɔbɔ yɛɛ yeambua.

²¹Ɔdonle kakula ne Ayekabɔdo,[5] na ɔhanle kɛ, “Yizilayɛ ɛminli ye anyunlunyia ne,” ɔluakɛ bɛva Nyamenle Ngyekyeleɛ Ɛlɛka ne donvula yɛɛ ɔ hu nee ɔ hu ɔ ze ɛwu.

²²Ɔzele kɛ, “Nyamenle anyunlunyia ne ɛvi Yizilayɛ, ɔboalekɛ bɛva Nyamenle Ngyekyeleɛ Ɛlɛka ne donvula.”