Read Nzema 1 Sam 5 Bible Online

1 Sam 5 - Nzema bible

1 Sam 5

¹Mekɛ mɔɔ Filisitiama vale Nyamenle Ngyekyeleɛ Ɛlɛka ne la, bɛ nee ye vi Ɛbɛnizɛ hɔle Ahyedɔdo.

²Bɛvale bɛhɔwulale bɛ bozonle Deegɔn ne amonle sua ne anu na bɛziele ye Deegɔn amonle ne anwo ɛkɛ.

³Ye alehyenlɛ nu nwonlomɔ mangyee ne mɔɔ Ahyedɔdoma dwazole la, bɛnwunle kɛ Deegɔn ananze ne anye ɛbutu aze wɔ Ɛdɛnkɛma Ngyekyeleɛ Ɛlɛka ne anyunlu. Na bɛdenrɛle ye bɛziele ɔ bo zo ne bieko.

⁴Aleɛ hyenle bieko la, nwonlomɔ mangyee ne mɔɔ bɛdwazole la ɛnee Deegɔn anye ɛbutu aze wɔ Ɛdɛnkɛma Ngyekyeleɛ Ɛlɛka ne anyunlu na ɔ ti nee ɔ sa nwiɔ ne ɛbubu ɛgua anlenkɛ ne anloa na yeha ye kungunluminzi ne ala.

⁵Ɛhye ati ɛnɛ nee ɛnɛ ala Deegɔn ahɔmenle nee bɛdabɛ mɔɔ bɛsonle Deegɔn la kɔ ye amonle sua ne anu wɔ Ahyedɔdo a bɛntia ɛleka mɔɔ ɔdɔle la.

⁶Ɛdɛnkɛma duale Ahyedɔdoma kakɛ na ɔhanle bɛ ɛzulolɛ kpole. Ɔvale ewule mutulemutule ɔduale Ahyedɔdoma nee maanlema mɔɔ zua bɛ la kakɛ.

⁷Ahyedɔdoma nwunle kɛ ninyɛne ɛlɛsi ado ahɔ la, bɛzele kɛ, “Ɔnle kɛ Nyamenle Ngyekyeleɛ Ɛlɛka ne boa yɛ nwo ɛke bieko. Ye tumi ne bo yɛ nee yɛ bozonle Deegɔn bɔbɔ anwo zo.”

⁸Yemɔti bɛzoanle bɛmanle bɛhɔvale Filisitia arelemgbunli ne mɔ na bɛzele bɛ kɛ, “Yizilayɛ Nyamenle ne Ngyekyeleɛ Ɛlɛka ne kɛ bɛyɛ ye la bɛyɛ ye. Ɔboa yɛ nwo ɛke bieko a ɔnrɛyɛ boɛ.” Bɛbuale kɛ, “Bɛye ye ɛke bɛhɔ Gate.” Yemɔti bɛvale Ɛlɛka ne bɛhɔle suakpole Gate azo.

⁹Ɛdɛnkɛma duale suakpole ne azo amra kakɛ. Ɔhanle bɛ ɛzulolɛ, ɔmanle mutulemutule zanenle suakpole ne azo amra, ngakula nee mgbanyinli kɔsɔɔti.

¹⁰Yemɔti bɛyele Nyamenle Ngyekyeleɛ Ɛlɛka ne ɛkɛ bɛhɔle Ɛkelɔn. Ɛkelɔnoma nwunle Nyamenle Ngyekyeleɛ Ɛlɛka ne la, bɛzunle bɛdeɛdeanle nu bɛzele kɛ, “Bɛva Yizilayɛ Nyamenle ne Ngyekyeleɛ Ɛlɛka ne bɛra kɛ bɛbahu yɛ kɔsɔɔti.”

¹¹Yemɔti bɛzoanle bɛmanle bɛhɔvale Filisitia arelemgbunli ne mɔ na bɛzele bɛ kɛ, “Bɛye Yizilayɛ Nyamenle ne Ngyekyeleɛ Ɛlɛka ne ɛke; bɛva bɛhɔzie ɔ bo zo dɛba ne wɔ Yizilayɛ, amaa yeangu yɛ nee yɛ mbusuafoɔ.” Ahunlundetelɛ hanle suakpole ne azo amra kɔsɔɔti, ɔboalekɛ ɛnee Nyamenle ɛmaa bɛ nwo ɛhyele bɛ kpalɛ.

¹²Bɛdabɛ mɔɔ bɛanwu la nyianle mutulemutule, na menli ne zunle manle ɔyɛle alɔbɔlɛ na bɛvɛlɛle bɛ awozonle ne mɔ kɛ bɛralie bɛ.