Read Nzema 1 Sam 7 Bible Online

1 Sam 7 - Nzema bible

1 Sam 7

¹ Yemɔti Keleate Gyialemma ravale Ɛdɛnkɛma Ngyekyeleɛ Ɛlɛka ne na bɛ nee ye hɔle Abenadabe mɔɔ de boka ne azo la sua nu. Bɛdule ɔ ra Ɛlieza bɛziele ɛkɛ bɛmanle Ɛdɛnkɛma na bɛzele ye kɛ ɔnlea zolɛ.

²Ɛdɛnkɛma Ngyekyeleɛ Ɛlɛka ne woale Keleate Gyialem hyɛle kpalɛ, ɔlile ɛvolɛ kɛyɛ abulanwiɔ. Mekɛ ɛhye anu, Yizilayɛma kɔsɔɔti vale ɛzunlɛ zɛlɛle Ɛdɛnkɛma moalɛ.

³Samoɛle zele Yizilayɛma kɛ, “Saa bɛfa bɛ ahonle kɔsɔɔti bɛazia bɛara Ɛdɛnkɛma ɛkɛ ne a ɛnee bɛkpo bɛ maanle gyɛne nu nyamenle ne mɔ kɔsɔɔti nee bɛ bozonle raalɛ Asetate ananze ne ɛzonlenlɛ. Bɛdu bɛ nwo kɔsɔɔti bɛmaa Ɛdɛnkɛma na bɛzonle ɔ ngomekye na ɔkɛlie bɛ ɔkɛvi Filisitiama asa anu.”

⁴Yemɔti Yizilayɛma vuandinle Beeyale ne mɔ nee Asetate ananze ne mɔ guale na bɛzonlenle Ɛdɛnkɛma angomekye.

⁵Akee Samoɛle zele Yizilayɛma kɛ, “Bɛ kɔsɔɔti bɛhɔyia Mezepa na mebazɛlɛ Ɛdɛnkɛma meamaa bɛ.”

⁶Yemɔti bɛhɔyiale Mezepa; bɛguale nzule aze bɛmanle Ɛdɛnkɛma na bɛhyele ɛhɔne kenle ko ne na bɛzele kɛ, “Yɛyɛ ɛtane yɛtia Ɛdɛnkɛma.” (Mezepa ɛkɛ ne yɛɛ Samoɛle dɛnlanle ziele Yizilayɛma a.)

⁷Mɔɔ Filisitiama dele kɛ Yizilayɛma ɛyia nu wɔ Mezepa la, Filisitia arelemgbunli ne mɔ vale ɛlɔnema kɛ bɛkadoa bɛ bɛ nee bɛ aho. Yizilayɛma dele nwolɛ bie na ɛzulolɛ hanle bɛ.

⁸Bɛzele Samoɛle kɛ, “Kɔ zolɛ sɛlɛ Ɛdɛnkɛma yɛ Nyamenle ne maa ɔlie yɛ ɔvi Filisitiama asa anu.”

⁹Samoɛle hunle boane ralɛ mɔɔ tɛno nyɛfonlɛ la yelale ye mumua ne bɔle azu manle Ɛdɛnkɛma. Akee ɔzɛlɛle Ɛdɛnkɛma kɛ ɔboa Yizilayɛma na Ɛdɛnkɛma diele ye nzɛlɛlɛ ne.

¹⁰Mekɛ mɔɔ Samoɛle wɔ zolɛ ɔlɛbɔ azu ne la, Filisitiama rale Yizilayɛma anwo zo, na ɛkɛ ne ala Ɛdɛnkɛma kpakyele ɛsɛnlɛmanye guale Filisitiama anwo zo manle bɛ nye zo danle bɛ, na bɛvale sulosulo bɛbɔle asande bɛguale ɛbɔ nu.

¹¹Yizilayɛma vi Mezepa vindele na bɛbelele bɛzile Filisitiama zo toonwo bɛhɔdwule Bɛtekaa. Bɛhunle awie biala mɔɔ bɛdole ye adenle nu la.

¹²Akee Samoɛle vale bolɛ kpɔnlanle Mezepa nee Hyɛn avinli na ɔvɛlɛle ye “Ɛbɛnizɛ”[6] na ɔzele kɛ, “Ɛdɛnkɛma ɛboa yɛ toonwo a, yeradwu ɛnɛ a.”

¹³Yemɔti Yizilayɛma lile Filisitiama anwo zo konim na Filisitiama anva bɛ edwɛkɛ andoa bɛ bieko wɔ mekɛ mɔɔ Samoɛle de aze la.

¹⁴Yizilayɛma liele azuamgbole mɔɔ bɔ ye Ɛkelɔn kɔdwu Gate mɔɔ Filisitiama lile bɛ nwo zo konim vale la amuala. Yemɔti Yizilayɛma asa hanle bɛ maanle ne kɔsɔɔti. Na anzonudwolɛ rale Yizilayɛma nee Keenama avinli.

¹⁵Samoɛle ziele Yizilayɛ maanle ne toonwo ɔhɔle ewule nu.

¹⁶Ɔde aze la ɛvolɛ biala ɔkpɔsa bɛ nwo zo; ɔkɔ Bɛtɛle, Gelegale nee Mezepa na ɔsiezie manzonle manzonle mɔɔ wɔ azuamgbole ɛhye mɔ azo la amuala.

¹⁷Ɔwie a akee ɔsia ɔkɔ ye sua zo Releema na ɔkɔtoto ɛkɛ ne noko boɛ. Ɔzile azukponle wɔ Releema ɔmanle Ɛdɛnkɛma.