Read ძველი ქართულით პირველი ნეშტთა 3 Bible Online

პირველი ნეშტთა 3 - ძველი ქართულით bible

პირველი ნეშტთა 3

¹და ესენი იყუნეს ძენი დავითისნი, რომელნი ესხნეს მას ქებრონს: პირმშო ამონ აქინამასაგან იეზრაიტელისა; მეორე - დალუა, აბიგეასგან კარმელისა.

²მესამე - აბესალომ, ძე მოქასი, ასულისა თოლმისი, მეფისა გესურისა; მეოთხე - ადონია, ძე ანგითისი.

³მეხუთე - საფატია აბიტალისგან; მეექუსე იეთრამ, აგალისგან, ცოლისა მისისა.

⁴ესენი ესხნეს ქებრონს; და იმეფა მუნ შჳდ წელ და ექუს თთუე და ოცდაათცამეტ წელ მეფობდა იერუსალჱმსა.

⁵და ესენი ესხნეს მას იერუსალჱმს: სამაა, სობაბ, ნათან და სოლომონ ბერსაბესგან, ასულისა ამელისა,

⁶იებაარ, და ელისაუ.

⁷და ელიფალეტ, და ნაგებ, და ნაფეკ, და ნაფია,

⁸და ელისამა, და ელიათადა და სოქაინ,

⁹ყოველნი ესე ძენი დავითისნი ცხრა გარეშე ძეთა ხარჭთა მისთასა,- და თამარ, დაჲ მათი.

¹⁰და ძენი სოლომონისნი: რობოამ, აბია, ძე მისი, ასა, ძე მისი, იოსაფატ, ძე მისი,

¹¹იორამ, ძე მისი, ოზია, ძე მისი,

¹²ამასია, ძე მისი, აზარია, ძე მისი, იოვას, ძე მისი, იოთამ, ძე მისი,

¹³აქაზ, ძე მისი, ეზეკია, ძე მისი, მანასე, ძე მისი,

¹⁴ამონ, ძე მისი, იოსია, ძე მისი,

¹⁵და ძენი იოსიასი: პირმშო იოაქაზ, მეორე - იოაკიმ, მესამე - სედეკია, მეოთხე - სალუმ.

¹⁶და ძენი იოვაკიმისანი: იექონია, ძე მისი, და სედეკია, ძე მისი.

¹⁷და ძენი იოქონისნი: ასირ, სალათიელ, ძე მისი.

¹⁸მელქირამ, და ფადია, და სენესარ, და იეკენია, და იოსამოთ და ნადაბია.

¹⁹და ძენი სალათიელისნი: ზორობაბელ და სემეა. და ძენი ზორაბაბელისნი: მოსალამოს და ანანია და სალომითი, დაჲ მათი.

²⁰და ასება, და ოლ, და ბარაქია, და ასადია, და სობედ, - ხუთნი ესე.

²¹და ძენი ანანიასნი: ფალატია და იესეი, ძე მისი, და რაფაია, ძე მისი, ორნა, ძე მისი, აბდია, ძე მისი, სექენია, ძე მისი.

²²და ძე სექენიასი: სამეა. და ძენი სამეასნი: ქატუს, და იოელ, და ბარია, და ნოადია და საფატ, ექუსნი ესე.

²³და ძენი ნოადიასნი: ელიონე, და ეზეკია და ეზრიკამ, სამნი.

²⁴და ძენი ელიეოასნი: ოდუია, და ელიასიბ, და ფალაგია, აკკუბ, და იონან, და დალეა, და ანანია, - შჳდნი.