Read ძველი ქართულით რიცხვნი 33 Bible Online

რიცხვნი 33 - ძველი ქართულით bible

რიცხვნი 33

¹და ესე არიან საბანაკონი ძეთა ისრაჱლისათანი, რაჟამს გამოვიდეს იგინი ქუეყანით ეგჳპტით ძალითურთ ჴელითა მოსესითა და აჰრონისითა.

²და დაწერა მოსე სლვაჲ მათი და სადგურები მათი სიტყჳთა უფლისათა. და ესე არს სადგურები სლვისა მათისაჲ.

³და იძრნეს რამესეთ თუესა პირველსა, მეათხუთმეტესა დღესა თთჳსა მის პირველისასა, ხვალისაგან ზატიკსა გამოვიდეს ძენი ისრაჱლისანი ჴელითა მაღლითა წინაშე ყოველთა ეგჳპტელთა.

⁴და ეგჳპტელნი დაჰფლვიდეს ყოველთა მათ, რომელნი მოსრნა უფალმან მათგანნი, ყოველი პირმშოჲ ქუეყანასა ეგჳპტისასა და შორის ღმერთთა მათთა ყო უფალმან შურისგებაჲ.

⁵და იძრნეს ძენი ისრაჱლისანი ჰრამესეთ და დაიბანაკეს სოკქოთს.

⁶და იძრნეს სიკქოთით და დაიბანაკეს უთანს, რომელ არს ნაწილი უდაბნოჲსაგანი.

⁷და იძრნეს უთანით და დაიბანაკეს პირსა ზედა ეთრონისასა, რომელ არს მართლ ბეელსეპფონსა და დაიბანაკეს წინაშე მაგდოლასა.

⁸და იტრნეს მართლ იოროთით და განჴდეს საშუვალ ზღუასა უდაბნოდ და ვიდოდეს გზასა სამ დღისასა სავალსა უდაბნოსა ემათისასა და დაიბანაკეს განსამწარებელსა.

⁹და იძრნეს განსამწარებელით და მოვიდეს ელიმდ. და ელიმს იყო ათორმეტი წყაროჲ წყლისაჲ და სამეოცდაათი ძირ - დანაკისკუდი და დაიბანაკეს მუნ წყაროსა მას ზედა.

¹⁰და იძრნეს ელიმით და დაიბანაკეს ზღუასა ზედა ერუთრასა.

¹¹და იძრნეს ზღჳთ ერჳთრაჲთ და დაიბანაკეს უდაბნოსა სინაჲსასა.

¹²და იტრნეს უდაბნოჲთ სინაჲთ და დაიბანაკეს აფეკს.

¹³და იტრნეს აფეკაჲთ და დაიბანაკეს ელუჳსს.

¹⁴და იძრნეს ელჳსით და დაიბანაკეს ჰრაფიდინს. და არა იყო მუნ წყალი სასმელად ერისა მისთჳს.

¹⁵და იტრნეს ჰრაფიდინით და დაიბანაკეს უდაბნოსა სინასა.

¹⁶და იძრნეს უდაბნოჲთ სინაჲთ და დაიბანაკეს სამარობანს გულისთქმისასა.

¹⁷და იძრნეს სამარობნით გულისთქმისაჲთ და დაიბანაკეს ასეროთს.

¹⁸და იძრნეს ასეროთით და დაიბანაკეს ჰრათმას.

¹⁹და იძრნეს ჰრათმაჲთ და დაიბანაკეს ჰრემონ ფარესს.

²⁰და იძრნეს ჰრემონ ფარესით და დაიბანაკეს ლებუნას.

²¹და იძრრნეს ლებუნაჲთ და დაიბანაკეს რესას.

²²და იძრნეს რესაჲთ და დაიბანაკეს მაკელლათას.

²³და იძრნეს მაკელლათაჲთ და დაიბანაკეს საფარს.

²⁴და იტრნეს საფარით და დაიბანაკეს ქარას. და იძრნეს ქარაჲთ და დაიბანაკეს მაკედოთს.

²⁵და იძრნეს მაკედოდით და დაიბანაკეს თაათს.

²⁶და იძრნეს თაათით და დაიბანაკეს თათს.

²⁷და იძრნეს თათით და დაიბანაკეს თარას.

²⁸და იძრნეს თარაჲთ და დაიბანაკეს მათეკას.

²⁹და იტრნეს მათეკაჲთ და დაიბანაკეს ასემუნას.

³⁰და იძრნეს ასემუნაჲთ და დაიბანაკეს მასურუთს.

³¹და იტრნეს მასურუთით და დაიბანაკეს ბანაიკამს.

³²და იძრნეს ბანაიკამით და დაიბანაკეს მთასა გადგადსა.

³³და იძრნეს მთით გადგადით და დაიბანაკეს იეტაბათას.

³⁴და იტრნეს იეტაბათაჲთ, დაიბანაკეს ებრუნას.

³⁵და იძრნეს ებრუნაჲთ და დაიბანაკეს გესიონ გაბერს.

³⁶და იძრნეს გესიონ გაბერით და დაიბანაკეს უდაბნოსა სინაჲსასა, ესე არს კადე.

³⁷და იტრნეს კადეთ და დაიბანაკეს ორსა მთასა მახლობელად ქუეყანასა ედომისასა.

³⁸და აღვიდა აჰრონ მღდელი ბრძანებითა უფლისაჲთა და მოკუდა მუნ მეორმეთცესა წელსა გამოსლვასა ძეთა ისრაჱლისათასა ქუეყანით ეგჳპტით, თთუესა მეხუთესა თთჳსასა.

³⁹და აჰრონ იყო ასოცდასამ წლის, რაჟამსა მოკუდებოდა ორს მთასა.

⁴⁰და ესმა ქანაანის მეფესა არადისასა. და იგი დაშენებულ იყო ბღუარით კერძო ქუეყანასა ქანანისასა, რაჟამს შევიდოდეს ძენი ისრაჱლისანი.

⁴¹და იტრნეს ორით მთით და დაიბანაკეს სელმუნას.

⁴²და იძრნეს სელმუნაჲთ და დაიბანაკეს ფინუნს.

⁴³და იძრნეს ფინონით და დაიბანაკეს ობოთს.

⁴⁴და იძრნეს ობოთით და დაიბანაკეს წიაღ საზღუართა ზედა მოაბისათა.

⁴⁵და იძრნეს გესით და დაიბანაკეს დებონგათს.

⁴⁶და იტრნეს დებონგადით და დაიბანაკეს გელმონს დაბლათაიმს.

⁴⁷და იძრნეს გელმონ დაბლათაჲმით და დაიბანაკეს მთათა ზედა აბარიმისასა მართლ ნაბავსა.

⁴⁸და იძრნეს მთით აბარიმით და დაიბანაკეს დასავალით კერძო მოაბსა, იორდანესა ზედა იერიქოჲთ კერძო.

⁴⁹და დაიბანაკეს იორდანესა ზედა საშუვალ ესიმოთსა მაბელ სატტიდმდე, რომელ არს დასავალით მოაბსა.

⁵⁰და ეტყოდა უფალი მოსეს დასავალით მოაბსა, იორდანესა ზედა, იერიქოჲთ კერძო.

⁵¹და თქვა: ეტყოდეთ ძეთა ისრაჱლისათა და არქუ მათ: თქუენ წიაღხვალთ იორდანესა ქუეყანად ქანანისად.

⁵²და წარსწყმიდნეთ ყოველნი დამკჳდრებულნი ქუეყანასა მას პირისაგან თქუენისა.

⁵³და მოსპოთ ყოველი ბანაკები მათი და ყოველი კერპები დასხმულები იგი მათი წარსწყმიდოთ.

⁵⁴და ყოველი ძეგლები მათი მოსპოთ და წარსწყმიდნეთ ყოველნი იგი მკჳდრნი მის ქუეყანისანი და დაეშენნეთ მას შინა, რამეთუ თქუენ მიგეც ქუეყანაჲ იგი მათი ნაწილად წილითა ნათესავად-ნათესავთა თქუენთა. უმრავლესთაჲ განამრავლოთ სამკჳდრებელი მათი და უმცირესთაჲ დაამციროთ სამკჳდრებელი მათი, რომელსაცა აღმოჴდეს სახელი მისი მუნ, მისი იყოს, ნათესავად-ნათესავად ტომთა თქუენთა დაიმკჳდრეთ.

⁵⁵უკუეთუ არა წარსწყმიდნეთ მკჳდრნი იგი მის ქუეყანისანი პირისაგან თქუენისა.

⁵⁶და იყუნენ, რომელნი-იგი დაუტევნეთ მათგანნი, ჩნდენ თუალთა თქუენთა და ისარ გუერდთა თქუენთა და გემტერნენ თქუენ ქუეყანასა ზედა, რომელსა მკჳდ იყუნეთ. და იყოს, ვითარ-იგი ჯერ იყოს ყოფად მათა, გიყოთ თქუენ.