Read O Debleskro Drom - I Bibla an o Romano Rakepen 2021 1. Mose 1 Bible Online

1. Mose 1 - O Debleskro Drom - I Bibla an o Romano Rakepen 2021 bible

1. Mose 1

¹Glan i rah rah tsiro kras o Dewel o bolepen un i phub.

²Har i phub kerdo was, his tchi koi pre. Kek djipen his koi. His rati un sorelo pani his pral halauter. Un o Debleskro ducho his pral o pani.

³Un o Dewel penas: “Mu well diwes!” Koi was diwes.

⁴O Dewel dikas, kai ko diwes mishto hi. Un o Dewel das jek tsiro o diweske un jek tsiro i ratsjake.

⁵Un o Dewel das o diwes ko lab ‘diwes’ un ap i rati penas job ‘rati’. Jaake was rati un pale taissarlakro. Kowa his o ersto diwes.

⁶Un o Dewel penas, te well o bolepen, un pani koi pral un pani koi tel. Un jaake was kowa.

⁷O Dewel kras o bolepen. Un pani his koi pral, un pani his koi tel ap i phub.

⁸Un o Dewel das o bolepen o lab ‘bolepen’. Un was rati un pale taissarlakro. Kowa his o duito diwes.

⁹Un o Dewel penas, te well ko pani ap i phub khetne ap jek rig, te well o truk them diklo. Un jaake was kowa.

¹⁰Un o Dewel penas: “Ko truk them kharella ‘phub’.” Un kowa, kai o pani khetne hi, kharas lo ‘baro pani’. Un o Dewel dikas, kai kowa mishto hi.

¹¹Un o Dewel penas: “Mu well hako senlepen dran i phub win, an koleste hi tikno djob dren, jaake te well lestar pale newo senlepen. Mu wenna ninna ruka dran i phub win, kolendar hakeno peskre rukengre[1] hidjrella. An kolende hi tikno djob, jaake te well lendar pale newe ruka baro.” Un jaake was kowa.

¹²Un dran i phub was senlepen win. Hako senlepen mukas peskro tikno djob bares te well, jaake te well lestar pale newo senlepen. Ninna ruka wan baro. Hako ruk hidjras peskre rukengre, an kolende tikno djob hi, jaake te wenn lendar pale newe ruka baro. Un o Dewel dikas, kai kowa mishto hi.

¹³Un was rati un pale taissarlakro. Kowa his o triinto diwes.

¹⁴Un o Dewel penas, te wenn momlia an o bolepen, hoi sikrenna: Kanna hi diwes, un kanna hi rati. Kolla sikrenna ninna: Kanna well nijal, kanna well o wend. Kanna well i baro diwes, kanna i newo bersh.

¹⁵Jon hi an o bolepen tardo, te denn le momeli ap i phub. Un kowa was jaake.

¹⁶Un o Dewel kras kol dui bare momlia: o kham, te well lo rai pral o diwes, un o tchon[2], te well lo rai pral i rat, un ninna i wawar bolepangre momlia.

¹⁷Un o Dewel tchiwas len an o bolepen, te denn le momeli ap i phub.

¹⁸Jon hi rai pral o diwes un pral i rat, te dell jek tsiro o diweske un i wawar tsiro o ratsjake. Un o Dewel dikas, kai kowa mishto hi.

¹⁹Un was rati un pale taissarlakro. Kowa his o starto diwes.

²⁰Un o Dewel penas, te wenn bud vieche[3] an o pani un bud tchirkle an o bolepen.

²¹Jaake kras o Dewel bare panjengre viechen, un ninna hako wawar viecho[4], hoi an o pani hi, ninna hake tchirkle. Un o Dewel dikas, kai kowa mishto hi.

²²Un o Dewel rakras latche laba pral lende win un penas: “Lenn bud terne, te wenn bud tumendar an o baro pani un bud tchirkle an o bolepen.”

²³Un was rati un pale taissarlakro, o pantchto diwes.

²⁴Un o Dewel penas, te dell i phub hake viechenge o djipen: i diwje viechenge un kolenge, kai gar diwje hi, ninna i tsele tikne vieche. Un jaake was kowa.

²⁵Un o Dewel kras hake diwje viechen un hake viechen, kai gar diwje hi, ninna i tsele tikne viechen ap i phub. Un job dikas, kai kowa mishto hi.

²⁶Un o Dewel penas: “Kanna krah menshen. Jon wenn jaake har mer. Jon hi rai pral i matchende an o baro pani un pral i tchirklende an o bolepen, pral i diwje viechende un pral kolende, kai gar diwje hi, ninna pral i tikne viechende, hoi djan pral i phub.”

²⁷Un o Dewel kras i menshen jaake har job hi. Awa, jaake har job hi, kras lo len: o murshes un i djuwjat.

²⁸Un o Dewel rakras latche laba pral lende win un penas: “Anenn bud tchawen ap i phub, te well i phub tumendar pherdo! Un awenn rai pral i phub! Awenn rai pral i matchende an o baro pani, pral i tchirklende an o bolepen, un pral hake viechende, hoi ap i phub hi!”

²⁹Un o Dewel penas: “Shunenn, tumer nai chan halauterestar, hoi well baro ap i phub un an koleste tikno djob hi. Ninna i tsele rukengre, kai tikno djob an lende hi, dau tumen te chal.

³⁰I tsele viechen, kai djiwenn ap i phub, ninna i tsele tchirklen un tikne viechen dau me o tselo senlepen te chal.” Un jaake was kowa.

³¹Un o Dewel dikas halauter, hoi job kras, un tchatchepah halauter his mishto. Un was rati un pale taissarlakro. Kowa his o shobto diwes.