Read O Debleskro Drom - I Bibla an o Romano Rakepen 2021 1. Mose 14 Bible Online

1. Mose 14 - O Debleskro Drom - I Bibla an o Romano Rakepen 2021 bible

1. Mose 14

¹An ko tsiro his i kurepen. Star bare raja kuran pen pantch forjengre rajentsa. Kolla bare raja his: o Amrafel, ko baro rai pral o them Shinar, o Arjoch, ko baro rai pral o them Ellasar, o Kedor-Laomer, ko baro rai pral o them Elam, o Tidal, ko baro rai pral o them Gojim.

²Kol pantch forjengre raja his: o Bera, ko rai pral o foro Sodom, o Birsha, ko rai pral o foro Gomorra, o Shinab, ko rai pral o foro Adma, o Shemeber, ko rai pral o foro Zebojim, o rai pral o foro Bela. Kowa hi kanna o foro Zoar.

³Kol pantch raja kran win, te rikrenn jon khetne un wan an i tala Siddim. Kowa hi kanna o Londo Baro Pani.

⁴Deesh-te-dui bersha his o Kedor-Laomer o baro rai pral kol pantch forjengre rajende. Un jon budran leske. An o deesh-te-triinto bersh hadan pen le pral leste un shunan buder gar ap leste.

⁵An o deesh-te-starto bersh was o baro rai Kedor-Laomer un kol wawar bare raja, kai leha khetne his. Un jon kuran pen: kol menshentsa an o foro Asterot-Karnajim — kolla his i Refajarja; kol menshentsa an o foro Ham, — kolla his i Susarja; kol menshentsa, kai djiwenna an o them, kai o foro Kirjatajim tardo hi, — kolla his i Emarja;

⁶kol menshentsa ap i berge Seir, — kolla his i Horarja. Un jon dan len bis El-Paran, hoi pash o mulo tato them tchiddo hi.

⁷Koi pal rissran pen kol star bare raja trujel un wan an ko foro En-Mishpat. Kowa hi kanna Kadesh. Un jon maran i tsele menshen an ko them, kai i Amalekarja djiwan, ninna i Amorarja, kai an Hazezon-Tamar djiwan.

⁸Kanna djan kol pantch raja pral i forja Sodom, Gomorra, Adma, Zebojim un Bela dran i forja win. Bela kharella kanna Zoar. Un jon djan pengre lurdentsa an i tala Siddim.

⁹Kote kuran pen le kol star bare rajentsa. Kolla his: o baro rai Kedor-Laomer pral o them Elam, o baro rai Tidal pral o them Gojim, o baro rai Amrafel pral o them Shinar, o baro rai Arjoch pral o them Ellasar.

¹⁰An i tala Siddim his bud chebja an i phub, kai pherdo teera his. I raja pral i forja Sodom un Gomorra pengre lurdentsa hunte nashan penge. Un bud peran an kol chebja. Un kol wawar, kai pral atchan, nashan an i berge.

¹¹Un kol star bare raja lan lauter peha, hoi jon an i forja Sodom un Gomorra hatsan. Jon lan ninna o tselo chapen dran kol forja un djan penge.

¹²O Abrameskro phraleskro tchawo Lot, kai djiwas an Sodom, koles lan jon ninna peha, un leskro tselo koowa, hoi les his.

¹³Un jek kolendar, kai peske nashas, was pash o Abrameste un penas leske halauter. O Abram his i Hebreari. An ko tsiro djiwas o Abram pash i bare ruka ko murshestar Mamre. Kowa his i Amorari. Leskre phrala his o Eshkol un o Aner. Kolla triin kran o Abrameha win, te rikrenn jon khetne, un dan pengro dadeskro wast koi pre.

¹⁴Har o Abram shunas, kai leskro phraleskro tchawo pandlo un krik anlo was, kharas job peskre murshen. Les his 318 (triin-sheel-deesh-te-ochta) tchatche mursha, kai pash leste boldo wan. Kolentsa tradas job i star bare rajen un lengre lurden bis pash ko foro Dan.

¹⁵An i rati bitchras job peskre murshen ap dui rigja. Un job un leskre mursha djan ap lende pre un dan len, un lan len palla bis pash ko foro Hoba, hoi ap i serwi rig o forestar Damaskus tchiddo hi.

¹⁶Un o Abram anas kowa pale, hoi tchoredo was, ninna peskro phraleskro tchawes, o Lot. Un leskro koowa anas job pale, ninna i tsele djuwjen un i tsele menshen.

¹⁷Jaake das o Abram o baro rajes Kedor-Laomer un kol bare rajen, kai pash leste his. Koi pal djas o Abram khere. Ap o drom khere an i tala Shawe was o rai pral o foro Sodom pash leste. Koi tala kharella ninna Rajeskri tala.

¹⁸Un o Melchisedek, ko rai pral o foro Salem, anas lenge maro un mool dran o foro. Job his i rashai ko Deblestar, kai hi o Dewel pral halauter.

¹⁹Un job sharas o Abrames un penas: “Tu, Abram, ap tute hi tchiddo i soor un i bacht ko Deblestar, kai hi o Dewel pral halauter un kras o bolepen un i phub.

²⁰Un sharedo well o Dewel pral halauter, kai das kolen an tire wasta, kai tuha kuran pen.” Un o Abram das les o deshto kotar halauterestar, hoi job pale anas.

²¹Un o rai pral Sodom penas ap o Abram: “De man mire menshen pale! Ko wawar, hoi hatsal, rikreh nashte.”

²²Koi penas o Abram ap leste: “Me dau man sowel glan o baro Debleste, kai hi o Dewel pral halauter, un kras o bolepen un i phub:

²³Kek kotar thab, witar kek dori, hoi i kircha khetne pandella, lau tutar. Te peness tu gar, tu kral man brawelo.

²⁴Me rikrau tchi, kokres kowa, hoi i mursha chan. Un kol mursha, kai mantsa djan, o Aner, o Eshkol un o Mamre, kolla lenn pengro kotar peha.”