Read O Debleskro Drom - I Bibla an o Romano Rakepen 2021 1. Mose 18 Bible Online

1. Mose 18 - O Debleskro Drom - I Bibla an o Romano Rakepen 2021 bible

1. Mose 18

¹Un o baro Dewel mukas pes te dikell o Abrahamestar pash kol bare ruka ‘Mamre’, har o diwes tato his un o Abraham glan peskro plachteno kheer beshdo his.

²Ap jek kopo dikas job triin murshen. Kolla his i kotar glan leste tardo. Har job len dikas, stas lo pre, nashas pash lende un mukas pes glan lende ap i phub te perell.

³Un penas: “Miro rai! Te hal tu mange latcho, dja mandar gar dureder! Me mangau tut: Atch kai!

⁴Tumenge well pani anlo, te thowenn tumare herja. Un beshenn tumen tel ko ruk!

⁵Me lau tumenge maro, te wenn pale soreles. Pal kowa nashte djan dureder, har tumer kamenna. Jaake wan gar tchitcheske pash mande.” Un jon penan: “Kre jaake, har tu penal!”

⁶Koi nashas o Abraham sik an o plachteno kheer pash i Sara un penas: “Le sik triin khore parno jarro un kre merklia!”

⁷Un job nashas pash i grumjende, un rodas peske i latchi terni grumni win. Un das lat o budepaskreste, te krell job sik i latcho chapen.

⁸Un o Abraham las latcho khil, thud un ko mass. Un tchiwas lauter glan lende tel ko ruk. Un job atchas glan lende tardo, har jon chan.

⁹Koi putchan jon lestar: “Kai hi tiri romni Sara?” “Kote an o plachteno kheer”, penas job.

¹⁰Koi penas jek kol trinendar ap leste: “Tchatchepah, wawar bersh an kau tsiro wau me pale pash tute. Koi hi tiri romjat, i Sara, i tchawo.” Un i Sara his tardo pal leste, pal o wudar ko plachteno kherestar, un shunas lengro rakepen.

¹¹O Abraham un i Sara his hake dui phuro. Un i Sara djinas, kai nai lell li buder kek tchawe.

¹²Koi sanas joi peske un penas: “Kanna hom me phuro. Un miro rai, miro rom, hi ninna phuro! Har nai lau me i ternepen?”

¹³Koi penas o baro Dewel ap o Abrahameste: “Hoske sanas i Sara un penas: ‘Kanna, kai phuro hom, lau me i ternepen?’

¹⁴Dell tchi, hoi o baro Dewel gar haiwella. Wawar bersh an kau tsiro, wau me pale pash tute. Koi hi lat i tchawo.”

¹⁵Koi las i Sara daar un das buchoste un penas: “Me som gar!” “Na-a, tu sal”, penas o Dewel.

¹⁶Un i mursha stan pre un djan penge. Un o Abraham djas i kotar lentsa. Un jon dikan ap ko them, kai o foro Sodom tardo hi.

¹⁷Koi penas o baro Dewel peske: “Penap me o Abrahameske gar, hoi me kamau te krell? Na-a!

¹⁸Me dom les miro lab: Job well o dad jaake bud menshendar, te well lendar i bari un soreli natsjona. Un koi bacht, hoi dau leste, djal dureder ap i tsele natsjone, kai ap i phub hi.

¹⁹Me rodom les mange win, te penell lo peskre tchawenge un kolenge, kai pal leste wenna, te rikrenn pen le ap miro drom un krenn, hoi mishto un tchatcho hi, te nai mukap me halauter ap o Abrahameste te well, hoi me leske penom.”

²⁰Un o baro Dewel penas: “Bud djungelo koowa was pral i forja Sodom un Gomorra rakedo, kai jon an baro tchilatchepen djiwenna.

²¹Doleske kamau me tele te djal, te dikap: Hi kowa ninna tchatcho, hoi rakedo was? Un te hi wawartchandes, kamau kowa ninna te djinell.”

²²Un kol dui mursha rissran pen trujel un djan an o foro Sodom. O baro Dewel atchas glan o Abrahameste tardo.

²³Un o Abraham djas pash leste un penas: “Kameh tu tchatchepah lauteren temerl dell, kolen, kai kek tchilatchepen kran — khetne kolentsa, kai tchilatcho hi?

²⁴Te hi an ko foro 50 (paash-sheel) menshe, kai krenn, hoi mishto un tchatcho hi, kameh tu kolen ninna te marell? Te hatseh kote 50 (paash-sheel) menshen, kai kek tchilatchepen kran, de o fores kek phagi!

²⁵Ko nashte kreh tu gar, te dess kolen temerl, kai kek tchilatchepen kran — khetne kolentsa, kai tchilatcho hi. Jaake te djal koleske, kai an o tchatchepen tardo hi, har koleske, kai tchilatcho hi. Tu hal o tchatchepaskro rai pral i tseli phub. Kameh tu tchomone te krell, hoi gar mishto un tchatcho hi?”

²⁶Koi penas o baro Dewel: “Te hatsau me 50 (paash-sheel) menshen an o foro Sodom, kai krenna, hoi mishto un tchatcho hi, dau o tselo fores kek phagi.”

²⁷Penas o Abraham: “Shun, miro rai, me lom man khetne, te rakrap tuha, kai me tchik un tchi moldo hom.

²⁸Hoi kameh te krell, te hi pantch kol 50 (paash-sheel) menshendar gar an o tchatchepen tardo? Kameh dran kol pantchende ko tselo foro te marell?” Koi penas job: “Te hatsau me 45 (star-deesh-te-pantch) menshen kote, kai an o tchatchepen tardo hi, kamau ko foro tchi te krell.”

²⁹Un o Abraham rakras pale leha un penas: “Te hatseh lendar kote 40 (star-deesh), hoi kameh te krell?” Penas o Dewel: “Te hi kote 40 (star-deesh) menshe, kai krenna, hoi mishto un tchatcho hi, kamau ko foro tchi te krell.”

³⁰Un o Abraham penas: “Miro rai, ab gar chojedo, te rakrau pale tuha. Hoi, te hatseh kote 30 (trijanda)?” Penas job: “Te hatsau 30 (trijanda), kamau ko foro tchi te krell.”

³¹Koi penas o Abraham: “Shun miro rai, me lom man khetne, te rakrap pale tuha. Hoi, te hatseh kote 20 (biish)?” Penas job: “Te hi kote 20 (biish), kamau ko foro tchi te krell.”

³²Koi penas o Abraham: “Miro rai, me mangau tut, ab gar chojedo! Me kamau gomme jek kopo tuha te rakrell. Hoi, te hatseh kote deesh?” Penas job: “Te hi kote deesh, kamau ko foro tchi te krell.”

³³Un o baro Dewel heras pre, te rakrell lo o Abrahameha un djas peske. Un o Abraham djas pale khere.