Read O Debleskro Drom - I Bibla an o Romano Rakepen 2021 1. Mose 19 Bible Online

1. Mose 19 - O Debleskro Drom - I Bibla an o Romano Rakepen 2021 bible

1. Mose 19

¹Har i rati was, wan i dui bolepangre an o foro Sodom. Koi his o Lot an o baro wudar ko forestar beshdo. Har o Lot len dikas, stas lo pre, djas pash lende un mukas pes glan lende ap i phub te perell.

²Un penas: “Mire raja, awenn an miro kheer! Me mangau tumen, atchenn i rati pash mande! Thowenn tumare herja! Un djan taissarlakro tumaro drom!” “Na-a”, penan le, “mer kamah i tseli rati win te atchell.”

³Job mukas gar tele, te mangell lo len, bis te djan jon leha an leskro kheer. Un job kras lenge i chapen un pekas lenge maro, kai kek shutlo jarro dren hi. Un jon chan.

⁴Har jon kaman pen tele te tchiwell, wan i mursha o forestar Sodom pash o Loteskro kheer khetne. I tsele mursha dran o foro, kol terne un kol phure his tardo trul ko kheer,

⁵un dan pal o Lot gole un putchan lestar: “Kai hi kol mursha, kai i rati pash tute wan? De len mende, te kras dinelo koowa lentsa!”

⁶Koi djas o Lot win pash lende glan o wudar. Un kras o wudar pal peste pandlo.

⁷Un penas: “Kamle mala, ma krenn lentsa sawo djungelo koowa!

⁸Dikenn, man hi dui tcha. Kol wan kek murshestar an-tapedo. Kolen anau tumenge win. Krenn lentsa, hoi tumer kamenna! Me mangau tumen, ma taprenn kal murshen an, kai pash mande an miro kheer wan!”

⁹Jon dan gole: “Dja tuke! Tu hal i wi-themari un kameh tut rai pral mende te krell. Kanna shun, mer kamah tuha djungleder koowa te krell har kolentsa, kai pash tute an o kheer hi.” Un jon djan ap o Lot pengri tseli sorjah, un kaman o wudar pre te phagell.

¹⁰Koi tserdan kol dui mursha o Lotes pash pende an o kheer dren, un pandan o wudar tele.

¹¹Palle kran le, te wenn kol tsele mursha korelo, kai glan o kheer tardo hi. Lauter, tikne un bare, dikan buder tchi. Jaake nashte hatsan jon buder gar o wudar.

¹²Kol dui mursha, kai pash o Lot an o kheer his, putchan lestar: “Hi tut kate an kau foro gomme jek tire menshendar: i tchakro rom, mursh tchawe un tcha, wawar menshe? An len sik win dran ko foro!

¹³Bud djungelo koowa was glan o baro Debleskre kanda, hoi i menshe an kau foro kran. Doleske bitchras men o baro Dewel, te kras kau foro paash.”

¹⁴Koi djas o Lot win, un penas ap kol murshende, kai romedinerenn leskre tchen: “Stenn pre! Djan sik dran kau foro! O baro Dewel kamell lauteren an kau foro temerl dell!” An lengre jaka his job har jek, kai rakrell narwelo koowa.

¹⁵Sik taissarlakro penan i bolepangre ap o Lot: “Kre sik! Ste pre, le tiri romjat un tire dui tchen, kai pash tute hi! Un dja dran kau foro, te wess tu gar maredo, te lenn i menshe an kau foro pengri phagi.”

¹⁶O Lot las peske bud tsiro. Koi tapran kol mursha les, leskri romjat un leskre dui tchen pash o wast un anan len win dran o foro. O baro Dewel kamas gar, te merenn le.

¹⁷Har jon glan o foro his, penas ko jek bolepaskro ap o Lot: “Naash, te atchess tu djido! Ma dik pal tute! Ma atch tardo kate an kau them pash o pani Jordan! Naash ap kol berge, te wess tu gar maredo!”

¹⁸“Ach, na-a, miro Rai”, penas o Lot.

¹⁹“Tu sikral, kai hal mange latcho. Un tiro kamlepen hi bares mange, te mukeh man te djiwell. Kol berge hi dur. Me nashte nashau gar kote. Koi bibacht nai lell man palla, te merap me.

²⁰Dik! Koi hi i foro gar dur. Koi nashau me, te atchap djido. Ko hi i tikno foro.”

²¹“Mishto”, penas job ap o Loteste. “Me shunau ap tute an ko koowa. Me dau i menshen an ko foro gar mulo.

²²Kanna naash sik kote! Me nashte krau tchi, bis te tu an ko foro hal.” Dran kowa hi o lab ko forestar Zoar[33].

²³Har o Lot an o foro Zoar was, djas o kham pral i phub pre.

²⁴Koi mukas o baro Dewel jag un jagakri khand[34] pral i forja Sodom un Gomorra te perell dran o bolepen.

²⁵Jaake chatchras job kol forja un ko tselo them pash o pani Jordan. I tsele menshe an kol forja un o tselo senlepen ap ko them was chatchedo.

²⁶Un o Loteskri romni dikas pal peste. Dran late was i loneskro bar.

²⁷Taissarlakro stas o Abraham pre un djas kote, kai job o wawar diwes pash o baro Debleste tardo his.

²⁸Un o Abraham dikas tele ap kol forja Sodom un Gomorra un pral ko tselo them pash o pani Jordan, un dikas i bari jagakro ducho pre te djal har dran i baro bob.

²⁹Har o Dewel chatchras kol forja an ko them pash o pani Jordan, kai o Lot khere his, bistras job o Abrahames gar un anas o Lotes win dran kol forja.

³⁰O Lot trashas, te atchell lo an o foro Zoar. Doleske djas job peskre dui tchentsa dran ko foro an i berge. Un job djiwas peskre dui tchentsa an i grotta.

³¹His i diwes, koi penas koi phureder tchai ap koi terneder tchate: “Maro dad hi phuro. Un kek mursha hi buder an kau them, te romedinerenn men, jaake har i tsele menshe krenna.

³²Djineh hoi? Mer dah maro dadeste mool te pijell, un tchiwah men pash leste, te well men tchawe lestar, te meras gar win.”

³³Un an koi rati dan le pengro dadeste mool te pijell. Un i phureder tchai djas pash lakro dadeste un tchiwas pes pash leste. Job haiwas gar, har joi pes pash leste tchiwas, witar gar, har joi lestar pre stas.

³⁴Un o wawar diwes, koi penas i phureder tchai ap o terneder tchate: “Shun, me tchiwom man taissar rati pash miro dadeste. Kai rati dah les pale mool te pijell. Koi tchiweh tut tu pash leste, te well men tchawe maro dadestar, te meras gar win.”

³⁵Koi dan jon rati pengro dades mool te pijell. Un i terneder tchai djas un tchiwas pes pash leste. Ninna kau kopo haiwas job gar, har joi pes pash leste tchiwas, witar gar, har joi lestar pre stas.

³⁶Koi wan kol dui pengro dadestar Lot an wawar koowa.

³⁷Un i phureder tchai anas i tchawes ap i phub. Koles das joi ko lab Moab. Kolestar wenna kol menshe, kai hi kau diwes i Moabarja.

³⁸Un i terneder tchai anas ninna i tchawes ap i phub. Koles das joi ko lab Ben-Ammi. Kolestar wenna kol menshe, kai hi kau diwes i Ammonarja.