Read O Debleskro Drom - I Bibla an o Romano Rakepen 2021 1. Mose 22 Bible Online

1. Mose 22 - O Debleskro Drom - I Bibla an o Romano Rakepen 2021 bible

1. Mose 22

¹Pal kau koowa kamas o Dewel te dikell, te shunell o Abraham ap leste o tselo djijeha, un penas ap leste: “Abraham!” Un job penas: “Kate hom.”

²Penas o Dewel: “Le tiro jek[37] tchawes, koles, kai tu o djijestar kameh, o Isaakes. Un dja leha an ko them Morija ap koi berga, hoi me tuke penau! Un mare un chatch les mange kote!”

³Koi stas o Abraham sik taissarlakro pre, kras kasht tikno chatchepaske, tchiwas ko kasht ap peskri burika[38] un las dui budepangre un peskro tchawes Isaak peha, un djas kote, kai o Dewel leske penas.

⁴Ap o triinto diwes dikas o Abraham koi platsa dur glan peste.

⁵Un penas ap peskre budepangre: “Atchenn koi burikah[39] kai! Me un miro tchawo djah ap koi berga, te mangas o Debles an. Pal kowa wah mer pale.”

⁶O Abraham las ko kasht chatchepaske, un das ko kasht peskro tchaweste te hidjrell. Job kokres las i jag un i tchuri. Jaake djan jon dui khetne dureder.

⁷Koi penas o Isaak ap peskro dadeste: “Tata!” “Hoi kameh tu, miro tchawo?” putchas o Abraham. Penas o Isaak: “Men hi jag un kasht! Kai hi ko bakro, te chatchras les o Debleske?”

⁸Koi penas o Abraham leske: “O Dewel della o bakres, te chatchras les leske, miro tchawo.” Un jon dui djan khetne dureder.

⁹Jaake wan le ap koi platsa, hoi o Dewel leske penas. Kote kras o Abraham i chatchepaskri[40] o Debleske, tchiwas ko kasht koi pre, las peskro tchawes, pandas les un tchiwas les ap ko kasht pral pre.

¹⁰Un las ko tchuri, te marell lo o tchawes.

¹¹Koi das o baro Debleskro bolepaskro dran o bolepen gole: “Abraham, Abraham!” Penas job: “Kate hom!”

¹²Penas o bolepaskro: “Tape kol tchawes gar an! Un kre les tchi! Kanna djinau me, kai shuneh o tselo djijeha ap o Debleste un kreh, hoi job penell. Tu rikral tiro jek[41] tchawes mandar gar pale.”

¹³Koi dikas pes o Abraham trujel. Pal leste hi i bakro mank i burra. Leskre shinga[42] hi an kal burra un job nai was gar win. O Abraham djas koi, las ko bakro, maras les un chatchras les o Debleske, gar peskro tchawes.

¹⁴O Abraham das koi platsa ko lab ‘O baro Dewel dikella’. Jaake well bis kai diwes penlo: ‘Ap koi berga, kai o baro Dewel dikella’.

¹⁵Un o baro Debleskro bolepaskro das i duito kopo ap o Abrahameste gole dran o bolepen

¹⁶un penas: “O baro Dewel penell: Tu kamal tiro jek tchawes mange te marell. Kowa kamal tu mange te krell. Doleske dau man ap mande sowel, te tchiwap miri soor un miri bacht ap tute. Un tutar wenna bud bud menshe. Jon wenn jaake bud har bolepangre momlia ap o bolepen hi, un har i santa pash o baro pani. Un tire tchawe, kai pal tute wenna, wenna rai pral kolende, kai kurenn pen lentsa un lenn kolengre forja krik.

¹⁸Tu kral, hoi me tuke penom. Doleske djal koi bacht, hoi dau tire menshende, dureder ap i tsele natsjone, kai ap i phub hi.”

¹⁹Pal kowa djas o Abraham pale pash peskre budepangre. Un khetne djan le an Beersheba. Un o Abraham atchas koi.

²⁰Pal kowa was o Abrahameske penlo: “I Milka, koi romni tiro phralestar Nahor, anas leske ninna mursh tchawen ap i phub:

²¹O phureder kharell Uz, o duito hi o Bus, un o triinto hi o Kemuel, kolestar i Aramarja wenna.

²²Koi pal well o Kesed, o Haso, o Pildash, o Jidlaf un o Betuel.”

²³O Betuel hi o dad i tchatar Rebekka. Kolla ochta hi i mursh tchawe, kolen o Abrahameskro phraal Nahor peskri romjatar Milka las.

²⁴Un les his ninna i wawar romni. Lakro lab his Rehuma. Koja las ninna tchawe. Kolengre laba hi: Tebach, Gaham, Tahash un Maacha.