Read O Debleskro Drom - I Bibla an o Romano Rakepen 2021 1. Mose 27 Bible Online

1. Mose 27 - O Debleskro Drom - I Bibla an o Romano Rakepen 2021 bible

1. Mose 27

¹O Isaak was phuro un nai dikas buder tchi. Un job kharas peskro phureder tchawes, o Esau, un penas ap leste: “Miro tchawo!” “Ake hom”, penas kowa.

²Un o Isaak penas ap leste: “Dik, me wom phuro. Djinau gar hawo diwes me merau.

³Le tire faile un tiro bogo! Un dja win ap o them! Un de mange i vieches karje!

⁴Un kre mange i latcho chapen, jaake har me kowa kamau. Un an les mange, te chap un te rakrap nai glan miro merepen o Debleskri bacht pral tute win.”

⁵Har o Isaak peskro tchaweha Esau rakras, shunas i Rebekka kowa. Un o Esau djas win, te dell lo i vieches karje, te anell lo kowa khere.

⁶Koi penas i Rebekka ap peskro tchaweste Jakob: “Djineh tu? Me shunom, har tiro dad penas ap tiro phraleste Esau:

⁷‘An mange i vieches, un kre mange i latcho chapen, te chap un te rakrap o baro Debleskri bacht pral tute win glan miro merepen.’”

⁸“Kanna, miro tchawo”, penas i Rebekka dureder, “shun ap mande un kre, hoi tuke penau.

⁹Dja pash i viechende un an mange dui latche terne busja. Kolendar kamau i latcho chapen tiro dadeske te krell, jaake har job kowa kamella.

¹⁰Kowa an tiro dadeske, te chal lo les, un rakrell o Debleskri bacht win pral tute glan leskro merepen.”

¹¹Koi penas o Jakob ap peskri date Rebekka: “Tu djineh, kai miro phrales, o Esau, bud balla ap peste hi. Ap mande hi gar bud balla.

¹²Nashte well, kai miro dad taprell man an. Palle homs i chocheno glan leste un anaus bari bibacht ap mande un kek bacht.”

¹³Koi penas leskri dai ap leste: “Koi bibacht mu well ap mande, miro tchawo. Shun ap mande! Dja un an mange kol viechen!”

¹⁴Un job djas, las dui busja un anas len peskri dake. Un joi kras i latcho chapen, jaake har leskro dad kowa kamas.

¹⁵Un i Rebekka las kutch ripja peskro phureder tchawestar Esau, hoi pash late an o kheer his. Un riwas len lakro terneder tchaweske Jakob an.

¹⁶Kol felle kol busjendar tchiwas joi trul leskre mussja un trul leskri meen, kai kek balla his.

¹⁷Un joi das peskro tchaweste Jakob ko latcho chapen un ko maro, hoi joi kras.

¹⁸Un job djas dren pash peskro dadeste un penas: “Miro dad!” Kowa penas: “Ake hom. Koon hal tu, miro tchawo?”

¹⁹Koi penas o Jakob ap peskro dadeste: “Me hom o Esau, tiro phureder tchawo. Me krom, hoi tu mange penal. Ste kanna pre un besh tut un cha ko mass, hoi anom tuke, jaake te rakress nai o Debleskri bacht pral mande win.”

²⁰Koi putchas o Isaak peskro tchawestar: “Har hatsal kowa jaake sik, miro tchawo?” “O baro Dewel, tiro Dewel, das man bacht”, penas o Jakob.

²¹Koi penas o Isaak ap o Jakobeste: “Am pash mande, miro tchawo, te taprap tut an, te djinap, kai hal tchatchepah miro tchawo Esau.”

²²Kanna djas o Jakob glan peskro dadeste Isaak. Un o Isaak tapras les an un penas: “Te rakreh, shunau o Jakobes. Kal mussja hi o Esaeskre mussja.”

²³Job prindjras les gar. Ap leskre mussja his bud balla har ap i mussja leskro phralestar Esau.

²⁴Har job kamas o Debleskri bacht pral leste win te rakrell, putchas lo pale: “Hal tu miro tchawo Esau?” “Awa, me hom kowa”, penas o Jakob.

²⁵Kanna penas o Isaak: “Miro tchawo, an mange ko chapen, te chap ko massestar, hoi anal mange, jaake te rakrap nai o Debleskri bacht pral tute win.” Un o Jakob anas kowa leske, te chal lo. Un job chas. Un anas leske ninna mool, te pijell lo. Un job pijas.

²⁶Pal kowa penas o Isaak ap leste: “Am pash mande un de man i tchum, miro tchawo!”

²⁷Koi was o Jakob pash leste un tchumras les. Koi sungas job leskre koola un rakras o Debleskri bacht pral leste win un penas: Dik, o sungepen miro tchawestar hi har ko sungepen i phubjatar, kai o baro Dewel tchiwas peskri soor pre.

²⁸Mu dell tut o Dewel brishin dran o bolepen un bud chapaske dran i phub, bud djob un mool.

²⁹Menshe dran wawar themma hunte budrenn tuke un witsrenn pen tele glan tute. Wess rai pral tire phralende. Un tiri dakre tchawe hunte witsrenn pen tele glan tute. Kolla kai penenna, te well tut bibacht, ap kolende well bibacht. Un kolla, kai penenna, te well tut bacht, ap kolende well bacht.

³⁰Har o Isaak kol latche laba pral o Jakobeste rakras un o Jakob win djas peskro dadestar, was leskro phraal, o Esau, khere.

³¹Un job kras ninna i latcho chapen, anas les peskro dadeske un penas ap leste: “Miro dad, ste pre un cha ko massestar, hoi anom tuke, jaake kai nashte rakress o Debleskri bacht pral mande win!”

³²Koi penas leskro dad Isaak ap leste: “Koon hal tu?” “Me hom o Esau, tiro phureder tchawo”, penas job.

³³Koi was i bari daar ap o Isaakeste. Un job putchas: “Koon his kowa, kai das i viecho karje un anas mange o chapen, un me chom? Koi pal wal tu. Me rakrom o Debleskri bacht win pral koleste, kai anas mange o chapen. Un koi bacht atchell ap leste. Me nashte lau lat gar pale.”

³⁴Har o Esau shunas kol laba peskro dadestar, das lo i bari gole i choljatar un dukatar, un penas ap peskro dadeste: “Rake o Debleskri bacht pral mande win, ninna pral mande, tata!”

³⁵Koi penas leskro dad: “Tiro phraal was chochepah pash mande un las peske i Debleskri bacht, hoi tuke his.”

³⁶Koi penas o Esau: “Leskro lab hi tchatchepah Jakob. Job chochras man kanna dui kope. Job las mandar kowa, hoi loms me, ko phureder tchawo. Un kanna las lo peske ninna o Debleskri bacht, hoi mange wals.” Un palle putchas job: “Hi tut kek latche laba mange?”

³⁷Koi penas o Isaak ap o Esau: “Shun, me krom, kai job o rai pral tute hi. Un leskre tsele phralen krom, te wenn jon leskre budepangre. Dom les ninna djob un mool. Hoi nai krau kanna tuke, miro tchawo?”

³⁸“Tata”, penas o Esau, “nai rakreh tu gar dui kope i bacht win? Rake ninna i Debleskri bacht pral mande win!” Un o Esau rowas soreles.

³⁹Koi penas leskro dad Isaak ap leste: Shun, kote, kai djiweh, dell o bolepen kek brishin, witar gar anell i phub bud chapaske.

⁴⁰Tu djiweh kolestar, hoi tiro charo anella tuke, un hunte budress tiro phraleske. I diwes wella, kai hadeh tut ap leste, un mukeh les buder gar rai pral tute te well.

⁴¹Kol latche laba, hoi o Isaak pral o Jakobeste rakras, kran, te was o Esau chojedo ap o Jakobeste. Doleske penas o Esau ap peste: “Ko tsiro wella sik, kai rowenn le pral miro dadeskro merepen. Te hi lo mulo, dau miro phrales mulo.”

⁴²Har i Rebekka shunas, hoi lakro phureder tchawo Esau kamell te krell, mukas li lakro terneder tchawes Jakob te kharell un penas ap leste: “Shun, tiro phraal Esau kamell tut mulo te dell.

⁴³Kanna, shun ap mande, miro tchawo. Kre tut ap o drom, dja tuke sik un dja pash miro phraleste Laban an o foro Haran.

⁴⁴Atch i tsiro pash leste, bis te djal tiro phraleskri choli krik,

⁴⁵un job bistras, hoi tu les kral. Palle bitchrau jekes, kai anell tut pale. Hoske nashrap me tumen dujen ap jek diwes?”

⁴⁶Un i Rebekka penas ap o Isaakeste: “Kol dui chalja, kol Hetarja, kolen o Esau romedineras, krenn mange miro djipen pharo. Te romedinerell ninna o Jakob i tchat dran kau them, i Hetaretsa, wals feteder, te merap.”