Read O Debleskro Drom - I Bibla an o Romano Rakepen 2021 1. Mose 28 Bible Online

1. Mose 28 - O Debleskro Drom - I Bibla an o Romano Rakepen 2021 bible

1. Mose 28

¹Koi das o Isaak o Jakobes gole un penas: “Dja o Debleha! Ma le i romni dran o them Kanaan!

²Dja an o them Paddan-Aram, an o kheer tiro dakro dadestar Betuel. Le tuke kote i tchai tiri dakro phralestar, o Laban.

³O sorelo Dewel tchiwell peskri soor un peskri bacht ap tute un dell tut bud tchawe, te wenn tutar bud natsjone!

⁴Koi bacht un koi soor, hoi o Dewel tchiwas ap o Abrahameste, mu well ap tute un ap tire menshende! Tu leh kau them, kai tu kanna i wi-themari hal — ko them, hoi o Dewel o Abrahameste das.”

⁵Un o Isaak mukas o Jakobes te djal. Un job djas an o them Paddan-Aram pash o Laban. Koleskro dad his o Aramari Betuel. O Labaneskri pheen his i Rebekka, koi dai o Jakobestar un o Esaestar.

⁶O Esau dikas, kai o Isaak o Debleskri bacht pral o Jakobeste win rakras un les an o them Paddan-Aram bitchras, te lell job peske kote i romni. Un job shunas, kai o Isaak o Jakobeske soreles penas: ‘Ma le i romni dran o them Kanaan.’

⁷Job dikas ninna, kai o Jakob shunas ap peskro dadeste un ap peskri date un djas an o them Paddan-Aram.

⁸Koi haiwas o Esau, kai leskre romja, kai wan dran o them Kanaan, gar latcho his glan peskro dadeskre jaka.

⁹Un o Esau djas pash o Abrahameskro tchaweste Ismael, un las peske koleskri tchat, i Machalat. Koja was leskri triinti romni. Lakro phraal his o Nebajot.

¹⁰O Jakob djas dran ko foro Beersheba un kras pes ap ko drom, kai djal an o them Haran.

¹¹Har o kham tele djas, was job ap i platsa un atchas i rati koi. Job las jek bar, hoi kote tchiddo his, tchiwas les tel leskro shero un tchiwas pes tele.

¹²Koi das lo suni: Job dikas i treppa ap i phub tardo. Koja djas bis an o bolepen. Un o Debleskre bolepangre djan pre un tele.

¹³Un o baro Dewel his tardo pral pre un penas: “Me hom o baro Dewel, ko Dewel tiro papestar Abraham un ninna o Isaakeskro Dewel. Kau them, kai tu tchiddo hal, dau tut un tire tchawen, kai pal tute wenna.

¹⁴Jon wenna jaake bud har i tchik, hoi ap i phub hi. Un krau lengro them baro un buchlo ap hake rigja. Un koi bacht, hoi dau tute un tire tchawende, djal dureder ap i tsele menshende, kai ap i phub hi.

¹⁵Tu djiness, me hom tuha un dau garda ap tute, kote, kai tu djah. Un anau tut pale an kau them. Me mukau tut gar, bis te krom halauter, hoi tuke penom.”

¹⁶Koi djangras o Jakob dran o sopen pre un penas: “Tchatchepah, o baro Dewel hi ap koi platsa. Un me djinom kowa gar.”

¹⁷Un job daras un penas: “Har darenes hi kai platsa, — hi tchatchepah o Debleskro kheer un o wudar an o bolepen.”

¹⁸Taissarlakro stas o Jakob pre, las ko bar, hoi tel leskro shero tchiddo his, tchiwas les pre, un tchoras djet koi pre.

¹⁹Un job das kol platsa ko lab ‘Betel’[51]. Glan ko tsiro his o lab ko forestar ‘Lus’.

²⁰Un o Jakob das pes sowel un penas: “Hi o baro Dewel mantsa un dell garda ap mande ap miro drom, kai me djau, un dell man chapaske un an-ripaske,

²¹jaake te wap pale mishto an miro dadeskro kheer, hi job miro Dewel.

²²Un kau bar, hoi tchiwom pre, kowa mu well i Debleskro kheer. Un halauterestar, hoi tu man deh, dau me tut o deshto kotar pale.”