Read O Debleskro Drom - I Bibla an o Romano Rakepen 2021 1. Mose 35 Bible Online

1. Mose 35 - O Debleskro Drom - I Bibla an o Romano Rakepen 2021 bible

1. Mose 35

¹Un o Dewel penas ap o Jakobeste: “Kre tut ap o drom, dja an o foro Betel! Atch kote un kre kote i chatchepaskri[61], te chatchress mange viechen. Me hom ko Dewel, kai mukas pes tutar te dikell, har tu tiro phralestar Esau krik nashal.”

²Koi penas o Jakob ap peskri familja un ap lauterende, kai pash leste his: “Tchiwenn tumendar krik kol deblen dran barra un kashta, hoi tumer an-mangenna! Thowenn tumen un riwenn tumen djudje ripja an!

³Awenn, djas an o foro Betel. Kote krau i chatchepaskri o Debleske, kai shunas man ap ko diwes, kai an i bibacht homs. Ko Dewel his pash mande ap miro drom bis kanna.”

⁴Un jon dan o Jakobeste pengre tsele deblen dran barra un kashta, hoi jon an-mangan, un i tsele kanengre, hoi an lengre kanda his. Un o Jakob paskras len tel o baro ruk pash o foro Sichem.

⁵Un jon kran pen ap o drom. Un o Dewel tchiwas i daar ap kol menshende, kai djiwan an i forja trul lende. Un kolla lan len gar palla.

⁶Jaake was o Jakob lauterentsa, kai pash leste his, an o them Kanaan an o foro Lus. Ko foro kharell kanna Betel.

⁷Har o Jakob peskro phralestar krik nashas, mukas pes o Dewel kote lestar te dikell. Doleske kras job kote i chatchepaskri o Debleske, kai wenn vieche leske chatchedo. Un das koi platsa ko lab ‘El-Betel’.

⁸Kote meras i Debora, koi djuwel, kai das garda ap i Rebekka, har his joi tikno. Un i Debora was paskedo tel ko baro ruk, kai pash o foro Betel tardo his. Un o Jakob das kol rukes o lab ‘ropaskro ruk’.

⁹Har o Jakob dran o them Paddan-Aram an o foro Betel was, mukas pes o Dewel pale lestar te dikell un rakras latche laba pral leste win.

¹⁰Un penas: “Tu khareh Jakob. Kanna khareh tu buder gar Jakob. Kanna well tiro lab Israel.” Jaake las o Jakob ko lab Israel.

¹¹Un o Dewel penas ap leste: “Me hom o sorelo Dewel. Me dau tut bud tchawe. Jaake bud menshe wenna tutar, kai lendar jek bari natsjona un bud wawar natsjone wenna. Ninna bare raja hi mank tire menshende.

¹²Un ko them, hoi dom o Abrahameste un o Isaakeste, dau tute ninna un tire menshende.”

¹³Un o Dewel djas peske kotar, kai job o Jakobeha rakras.

¹⁴Un ap koi platsa, kai o Dewel rakras leha, tchiwas o Jakob i bar pre. Un tchoras mool un djet koi pre o Debleske.

¹⁵Un job das koi platsa ko lab Betel.

¹⁶Pal kowa mukan le ko foro Betel un djan an o foro Efrata. Un ap o drom anas i Rachel i tchawes ap i phub. Un lat his bare duka.

¹⁷Har lakre duka baro his, penas koi chatchepaskri gadji ap late: “Ma traash! Ninna kowa hi i mursh tchawo.”

¹⁸I Rachel his ap o merepen tchiddo. Har joi meras, das joi kol tchawes ko lab Ben-Oni[62]. Leskro dad das les ko lab Ben-Jamin[63].

¹⁹Un i Rachel meras un was paskedo ap o drom pash o foro Efrata. Kowa hi kanna Betlehem.

²⁰Un o Jakob, kai kharella ninna Israel, tchiwas i bar pre kote, kai li paskedo hi. Kowa nashte well diklo bis kai diwes.

²¹Un o Israel djas dureder un tchiwas peskro plachteno kheer pre wergel koi platsa Migdal-Eder.

²²An ko tsiro har o Israel an ko them djiwas, djas o Ruben pash o Jakobeskri wawar romjate, i Bilha, un tchiwas pes pash late. Un o Jakob shunas kowa. O Jakobes his deesh-te-dui tchawe.

²³I tchawe, kolen i Lea ap i phub anas his o Ruben, ko phureder tchawo o Jakobestar. Pal leste was o Simeon, o Levi, o Juda, o Issachar un o Sebulon.

²⁴I tchawe, kolen i Rachel ap i phub anas his o Josef un o Benjamin.

²⁵I tchawe, kolen i Bilha ap i phub anas, his o Dan un o Naftali. I Bilha his koi budepaskretsa, kai his i Rachelake koi.

²⁶I tchawe, kolen i Silpa ap i phub anas, his o Gad un o Asser. I Silpa his koi budepaskretsa, kai his i Leake koi. Kolla his o Jakobeskre tchawe, kai bolde wan an o them Paddan-Aram.

²⁷Un o Jakob was pash peskro dadeste Isaak an Mamre pash o foro Kirjat-Arba. Kowa hi kanna Hebron, kai ninna o Abraham un o Isaak djiwan.

²⁸Un o Isaak his 180 (sheel-te-ochta-deesh) bersh phuro.

²⁹Un job meras un was paskedo. Les his i lengsto djipen un meras an o mishto phurepen. Un leskre tchawe, o Esau un o Jakob, paskran les.