Read O Debleskro Drom - I Bibla an o Romano Rakepen 2021 1. Mose 37 Bible Online

1. Mose 37 - O Debleskro Drom - I Bibla an o Romano Rakepen 2021 bible

1. Mose 37

¹O Jakob djiwas an ko them Kanaan, kai ninna leskro dad djiwas.

²Kowa hi ko liil, kai tchinlo hi pral o Jakobeskre tchawende. O Josef, i terno mursh, — job his deesh-te-efta bersha phuro, — das jak ap i bakrende khetne peskre phralentsa. Kolla his i tchawe leskro dadeskre romjendar, i Bilha un i Silpa. Un te kran leskre phrala tchilatcho koowa, penas lo kowa pengro dadeske.

³O Josef was boldo, har leskro dad Israel phuro his. Un o Israel kamas les budeder har peskre tsele wawar tchawen un kras leske i shukar ripen.

⁴Har leskre phrala dikan, kai lengro dad les budeder kamas har len, wan le tchilatcho ap pengro phraleste un rakran nai buder gar latches leha.

⁵Un o Josef das suni, un penas kowa peskre phralenge. Koi wan jon tchilatcheder ap leste.

⁶“Shunenn, hoi dom suni”, penas lo ap lende.

⁷“Mer pandam djob khetne ap i hachetikri phub. Un ap jek kopo stas miri djob pre un atchas tardo. Un tumari djob was un his trul miri djob tardo un witsras pes tele glan miri djob.”

⁸Koi penan leskre phrala ap leste: “Kameh te wess rai pral mende? Kameh tchatchepah te wess o pralstuno mendar?” Un jon his leske budeder tchilatcho pral leskri suni un leskro rakepen.

⁹Un job das i wawar suni un penas kowa peskre phralenge: “Shunenn, me dom i wawar suni. Kau kopo witsras pes o kham un o tchon[64] un deesh-te-jek bolepangre momlia glan mande tele.”

¹⁰Har job kowa peskro dadeske un peskre phralenge penas, tchingras leskro dad ap leste un penas: “Hoi dal tu suni? Hunte witsrap man me, tiri dai un tire phrala glan tute tele?”

¹¹Un leskre phrala dikan tchilatche jakentsa ap leste. Leskro dad rikras kol laba an peskro dji.

¹²His i diwes, koi his leskre phrala ap o them pash o foro Sichem, te denn le garda ap pengro dadeskre bakrende.

¹³Un o Israel penas ap o Josefeste: “Tire phrala denn garda ap i bakrende pash o foro Sichem. Kamau te bitchrap tut pash lende.” “Mishto”, penas o Josef, “me krau, hoi peneh.”

¹⁴Koi penas o Israel: “Dja koi un dik, har lenge un i bakrenge djala. Un pen les mange!” Jaake bitchras job les dran o telstuno them Hebron. Un job was pash o foro Sichem.

¹⁵Koi hatsas les i rom, har job ap o them trujel nashas. Un ko rom putchas lestar: “Hoi rodeh tu?”

¹⁶“Me rodau mire phralen”, penas o Josef. “Pen mange, kai jon ap i bakrende garda denna!”

¹⁷“Jon djan dureder”, penas ko rom. “Me shunom, har jon penan: ‘Mer kamah an Dotan te djal.’” Koi djas o Josef koi, kai leskre phrala hi un hatsas len an Dotan.

¹⁸Har i phrala dikan, kai o Josef wella, lan jon penge glan, te denn le les mulo.

¹⁹Jek penas ap o wawareste: “Kote well kowa, kai dell narwelo koowa suni.

²⁰Awenn, mer dah les mulo un witsrah les an i gruba un penah, kai i diwjo viecho les chas. Jaake dikah mer, hoi leskre sunja molenna.”

²¹Har shunas o Ruben kowa, kamas job les win te lell dran lengre wasta, te well job gar maredo, un penas ap lende: “Mer dah les gar mulo!

²²Mukenn les djido! Witsrenn les an kai gruba, kai an o mulo them! Un krenn leske tchi!” Job penas kowa, te lell lo les win dran lengre wasta, te anell job les pale pash leskro dadeste.

²³Har o Josef pash pengre phralende was, riwan jon leskro ripen win — kowa shukar ripen, hoi ap leste his.

²⁴Un lan o Josefes un witsran les an i gruba. Koi his kek pani dren.

²⁵Palle beshan pen le tele un chan. Dur glan lende dikan le Ismaelarja. Kolla wan dran ko them Gilead un djan an o them Egiptia. Len his khamele. Kolla hidjran kutch rukengro djet, hoi sungella mishto.

²⁶Koi penas o Juda ap peskre phralende: “Hoi molell menge, te dah mer maro phrales mulo un anah doosh ap mende, te nashell leskro rat?

²⁷Awenn, mer bikrah les ap i Ismaelarja. Jaake mukah mer les djido. Job hi maro phraal un maro mass un rat.” Un jon shunan ap leste.

²⁸Har i parepangre dran o them Midian pashel wan, tserdan les o Josefeskre phrala dran i gruba win, un bikran les ap i Ismaelarja, un lan lendar biish rupene kotja. Un jon anan o Josefes an o them Egiptia.

²⁹Har was o Ruben pale pash i gruba un dikas, kai o Josef buder gar dren his, kras job peskre ripja paash i dukatar.

³⁰Un job was pale pash peskre phralende un penas: “Ko tchawo hi buder gar koi. Hoi krap me kanna?”

³¹Koi lan jon o Josefeskro ripen, maran i busni un tchiwan ko ripen an o rat.

³²Palle bitchran le ko ripen lengro dadeske un mukan leske te penell: “Mer hatsam kowa. Dik, hi kowa gar o ripen tiro tchawestar?”

³³Un o Jakob prindjras ko ripen un penas: “Kowa hi miro tchaweskro ripen. I diwjo viecho dandras les an kotja un chas les pre.”

³⁴Un o Jakob kras peskre ripja paash i dukatar. Un tchiwas i gono trul peste un rowas i rah tsiro pral peskro tchaweste.

³⁵Un leskre tsele tchawe un tcha wan pash leste, te rakrenn le leha latches. Un job kamas gar, te well leskri duk krik lino. “Na-a” penas job, “miro dji rowella, bis te merau un wau pash miro tchaweste.” Jaake rowas leskro dad pral o Josefeste.

³⁶Un i parepangre dran o them Midian bikran o Josefes an o them Egiptia ap jekeste kol rajendar, kai an o baro rajeskro kheer hi. Leskro lab his Potifar. Job his o pralstuno kolendar, kai denn garda ap o baro rajeste pral o them Egiptia.