Read O Debleskro Drom - I Bibla an o Romano Rakepen 2021 1. Mose 38 Bible Online

1. Mose 38 - O Debleskro Drom - I Bibla an o Romano Rakepen 2021 bible

1. Mose 38

¹Ap ko tsiro mukas o Juda peskre phralen un djas tele pash i romeste dran Adullam. Leskro lab his Hira.

²Kote dikas o Juda jek tchat i murshestar, kai kharas Shua. Kowa his i Kanaanitari. Un o Juda romedineras lat un was lah khetne.

³Un joi was an wawar koowa un anas i tchawes ap i phub. Un job das les ko lab Er.

⁴Un joi was pale an wawar koowa un anas i tchawes ap i phub. Un joi das les o lab Onan.

⁵Un pale anas joi i tchawes ap i phub. Un joi das les o lab Shela. Ap ko tsiro, har ko tchawo boldo was, his o Juda an o foro Kesib.

⁶Un o Juda das peskro phureder tchaweste, o Er, i romjat. Lakro lab his Tamar.

⁷Un o Er his tchilatcho an o baro Debleskre jaka. Un o baro Dewel mukas les te merell.

⁸Koi penas o Juda ap o Onan: “Ab khetne koi romjah tiro phralestar, te well tiro phrales i tchawo, har pash mende kowa jaake hi.”

⁹O Onan djinas, kai kol tchawe gar leskre hi. Doleske kras job jaake, kai peskro phraleskri romni gar an wawar koowa wella, hako kopo har was lo lah khetne. Job kamas gar, te well i tchawo leskro phraleske boldo.

¹⁰Un kowa, hoi job kras, his tchilatcho an o baro Debleskre jaka. Un job mukas les ninna te merell.

¹¹Koi penas o Juda ap i Tamar, peskro tchaweskri romjate: “Atch kokres an tiro dadeskro kheer, jaake rah bis te miro tchawo, o Shela, baro was.” O Juda penas peske: Te merell job gar har leskre phrala! Un i Tamar djas peske un atchas pash peskro dadeste.

¹²Pal i rah tsiro meras i romni o Judaestar, kolakro dad o Shua hi. Un har o tsiro o ropaske trujel his, djas o Juda an o foro Timna pash peskre budepangre, kai tchinenn i bal i bakrendar. Leskro maal, o Hira dran Adullam, djas leha.

¹³Un was penlo ap i Tamar: “Ake, tiro romeskro dad djal an o foro Timna, te tchinell job i bal peskre bakrendar.”

¹⁴Joi djinas, kai o Shela baro was, un kai joi leste gar dino was, te well li leskri romni. Doleske riwas joi kanna kol ripja win, hoi i romni hidjrella, kolakro rom mulo hi. Un tchiwas i diklo pral peskro mui, jaake kai dikan le nai gar lakro mui. Un beshas pes pash o baro wudar glan o foro Enajim. Kowa hi tchiddo ap o drom an o foro Timna.

¹⁵Un o Juda dikas lat un patsas, kai joi i lubni hi. Joi his pash o drom beshdo un lat his i diklo glan o mui.

¹⁶Un job djas ap i rig pash late un penas: “Muk man pash tute te well!” Job djinas gar, kai joi leskro tchaweskri romni hi. Un joi penas: “Hoi deh man, te weh mantsa khetne?”

¹⁷Penas job: “Bitchrau tuke i terni busni — i mursh.” “De man tchomone”, penas joi, “hoi me nai rikrau, bis te man koi busni deh.”

¹⁸“Hoi dap tut?” putchas job. Koi penas joi: “Tiri gustri tiro labeha, un koi dori, kai i gustri pandlo hi, ninna tiro kasht, hoi an tiro wast hi.” Un job das kowa late un djas lah khetne. Un joi was lestar an wawar koowa.

¹⁹Un joi djas khere un las peskro diklo tele. Un riwas kol ripja ap peste, kai i romni hidjrella, kolakro rom mulo hi.

²⁰Un o Juda bitchras peskro males, ko Adullamari pash late, un das les i terni busni peha lake, te lell job kowa latar pale, hoi o Juda lat das. Un job hatsas lat gar.

²¹Koi putchas job i menshendar ko forestar: “Kai hi koi lubni, kai pash o foro Enajim ap o drom his?” Un jon penan: “Kek lubni his kai.”

²²Un job djas pale pale pash o Juda un penas: “Hatsau lat gar. Ninna i menshe kote penan: Kek lubni his kai.”

²³Koi penas o Juda: “Joi nai rikrell kowa, hoi me lat dom. Te rodah mer lat dureder, rakrenn i menshe pral mande. Mer kram, hoi nashte kram. Me bitchrom lake koi busni, un tu hatsal lat gar.”

²⁴Pal triin tchon was o Judaeske penlo: “I Tamar, tiro tchaweskri romni lubras pes trujel, un joi hi an wawar koowa.” Koi penas o Juda: “Anenn lat win, te well li pre chatchedo.”

²⁵Har joi win anlo was, mukas joi lakro romeskro dadeske te penell: “Ko murshestar hom me an o wawar koowa, koneske kawa hi. Prindjreh tu, koneskri gustri un dori un kasht kowa hi?”

²⁶Un o Juda prindjras kowa un penas: “Joi hi feteder an o tchatchepen tardo har me. Me dom lat gar miro tchaweste Shela. Doleske kras joi kowa.” O Juda was buder gar khetne lah.

²⁷Un joi las dui tchawe.

²⁸Un har jon boldo wan, tchiwas jek peskro wast win. Un i chatchedi gadji pandas i loli dori trujel un penas: “Kowa was glan peskro phraleste win.”

²⁹Un har job peskro wast pale tserdas, was leskro phraal win. Un joi penas: “Tu wal sorjah win.” Un leske was o lab Perez dino.

³⁰Un pal leste was leskro phraal win, kowa kai koi loli dori trul leskro wast his. Un jon dan les o lab Serach.