Read O Debleskro Drom - I Bibla an o Romano Rakepen 2021 1. Mose 40 Bible Online

1. Mose 40 - O Debleskro Drom - I Bibla an o Romano Rakepen 2021 bible

1. Mose 40

¹Pal ko tsiro anan dui pralstune budepangre an o baro rajeskro kheer doosh ap pende. Kol dui his i pralstune pral o pipen un o pral o maro.

²Un o baro rai was an i bari choli pral kol dujende,

³un tchiwas len stildo an ko kheer o pralstunestar i lurdendar. An ko stilepen his ninna o Josef.

⁴Un ko pralstuno lurdo bitchras lenge o Josefes, te well job lenge koi. Un jon his i tsiro an o stilepen.

⁵Jek rati dan kol dui suni, o pralstuno pral o pipen un o pralstuno pral o maro. Hakeno das suni. Un koi suni kamas lenge tchomone te penell.

⁶Taissarlakro was o Josef pash lende un dikas, kai djal lenge gar mishto.

⁷Koi putchas job kol dujendar: “Hoske djal tumenge gar mishto?”

⁸Penan jon ap leste: “Mer dam suni. Un kek hi koi, kai penell nashte, hoi mare sunja menge penenna.” Penas o Josef ap lende: “O Dewel penell nai, hoi kol sunja penenna. Penenn tumare sunja mange!”

⁹Koi penas o pralstuno pral o pipen peskri suni o Josefeske un penas: “An miri suni dikom i drakengro ruk glan mande tardo.

¹⁰Ap ko drakengro ruk his triin kashta. Kolla wan senelo un lan blume. Un jaake sik har blume koi his, djan le pre un drake wan baro ap lende.

¹¹Man his o baro rajeskro khoro an miro wast, tchiwom i mool dran kol drake an o baro rajeskro khoro, un dom les o baro rajeste te pijell.”

¹²Un o Josef penas ap leste: Kai suni penella: “Kol triin drakengre kashta hi triin diwessa.

¹³An triin diwessa mukell tut o baro rai dran o stilepen win un dell tut pale tiri budi. Un tu deh o baro rajeste pale te pijell, jaake har tu kral, har tu o pralstuno pral leskro pipen hals.”

¹⁴O Josef penas dureder: “Te djal tuke mishto, biste man gar! Rake mange latcho pash o baro rajeste! Un an man dran kau kheer win!

¹⁵Hom tchoredo dran o them, kai djiwenn i Hebrearja. Un kate krom me witar tchi, kai hunte djap an o stilepen.”

¹⁶Har o pralstuno pral o maro dikas, kai kowa latcho his, hoi ko wawar suni das, penas job ap o Josefeste: “Me dom ninna suni: Ap miro shero his triin tchare pherdo mare.

¹⁷An o pralstuno kashteno tcharo his lauter latcho peklo koowa o baro rajeske. Un tchirkle wan un chan lauter dran o tcharo ap miro shero krik.”

¹⁸Penas o Josef: “Kai suni penell menge: Kol triin tchare hi triin diwessa.

¹⁹An triin diwessa mukell tut o baro rai dran o stilepen win un bladell[65] tut ap i kasht. Un i tchirkle chan tiro mass tutar krik.”

²⁰Ap o triinto diwes his o diwes, kai was o baro rai i bersh phureder. Un job kras i baro chapen kol tsele pralstunenge, kai leske budran, un mukas kol dujen, ko pralstunes pral o pipen un o pralstunes pral o maro, dran o stilepen win.

²¹Un job das o pralstunes pral o pipen pale leskri budi, te dell job o baro rajes pale te pijell.

²²Un o pralstunes pral o maro mukas job te bladell[66] ap i kasht, jaake har o Josef lenge glan-wi penas.

²³Un o pralstuno pral o pipen bistras o Josefes. Un job was leske buder gar an o shero.