Read O Debleskro Drom - I Bibla an o Romano Rakepen 2021 1. Mose 44 Bible Online

1. Mose 44 - O Debleskro Drom - I Bibla an o Romano Rakepen 2021 bible

1. Mose 44

¹Un job penas ap koleste, kai ap leskro kheer garda das: “Kre i gone kol murshendar pherdo djob, jaake bud har dren djala. Un tchip hakeneskre lowe pral an lengre gone!

²Un miro rupeno khoro tchip khetne lengre lowentsa pral an o gono ko terneder murshestar!” Un ko rom kras, har o Josef leske penas.

³Taissarlakro djan i mursha pengre burikentsa penge.

⁴Har jon gar dur glan o foro his, penas o Josef ap koleste, kai ap leskro kheer garda das: “Le sik kol murshen palla! Te tapreh len, pen ap lende: Hoske kran tumer tchilatcho koowa ap miro rajeste? Job his latcho ap tumende.

⁵Tumer tchoran miro rajeskro rupeno khoro, dran koleste job pijell un durkrell. Hi gar mishto, hoi kran!”

⁶Un ko pralstuno pral o Josefeskro kheer las len palla, tapras len un penas kal laba ap lende.

⁷Kolla penan ap leste: “Hoske rakrell miro rai sawe laba? Sawo koowa kram mer gar.

⁸Kol lowe, hoi hatsam pral an mare gone, anam tuke pale dran o them Kanaan. Hoske tchorams dran tiro rajeskro kheer rup un sonakai?

⁹Miro rai, tu te hatseh ko khoro pash jekeste mendar, nai deh les mulo! Un mer wawar wah tire budepangre.”

¹⁰“Mishto”, penas job. “Mer krah jaake, har penan. Kowa well miro budepaskro, kai hatsau o khoro pash leste. Tumer wawar nai djana.”

¹¹Koi las hakeno sik peskro gono tele ap i phub un kras les pre.

¹²Un job rodas an o gono hakenestar: pash o phureder bis pash o terneder. Un job hatsas o khoro an o Benjamineskro gono.

¹³Koi kran le pengre koola an kotja i dukatar. Un hadan pengre gone pale ap i burike un djan pale an o foro.

¹⁴Un o Juda djas peskre phralentsa an o Josefeskro kheer. O Josef his gomme koi. Un jon witsran pen glan leste ap i phub.

¹⁵Un o Josef penas ap lende: “Hawo tchilatcho koowa kran tumer? Djinenn gar, kai i rom har man, durkrell nai?”

¹⁶Penas o Juda ap leste: “Hoi penas mer tuke, miro rai? Har nai sikrah, kai hi men kek doosh an kau koowa? O Dewel dell men i phagi. Miro rai, mer ham kanna tire budepangre: mer un kowa, kai hatsan o khoro pash leste.”

¹⁷Penas o Josef: “Sawo koowa krau gar. Ko rom, kai hatsan o khoro pash leste, hunte well miro budepaskro. Tumer wawar nai djan an o latchepen khere pash tumaro dadeste.”

¹⁸Koi was o Juda glan un penas ap leste: “Mangau tut, miro rai, muk man tuha te rakrell! Ab gar chojedo ap mande, miro rai! Tu hal jaake baro har o baro rai pral o them Egiptia.

¹⁹Tu, miro rai, putchal mendar, har hams o wawar kopo kai: ‘Hi tumen i dad, ninna i wawar phraal?’

²⁰Un mer penam ap tute, miro rai: ‘Men hi i phuro dad un i terno phraal, kai boldo was, har maro dad phuro his. Leskro phraal hi mulo. Un job kokres atchas pral peskri datar. Un leskro dad kamell les i djijestar.’

²¹Un tu, miro rai, penal ap mende: ‘Anenn les pash mande, te dikap les!’

²²Un mer penam ap tute, miro rai: ‘Ko tchawo mukell nai gar peskro dades. Mukell job les, merell leskro dad.’

²³Koi penal tu, miro rai, ap mende: ‘Te well gar tumaro terneder phraal tumentsa, kamau te dikap tumen gar pale.’

²⁴Har wam khere pash maro dadeste, penam leske tire laba, miro rai.

²⁵Har maro dad penas ‘Djan, ginenn menge chapaske’, penam mer:

²⁶‘Te well maro terneder phraal gar mentsa, nai djah gar. Te hi job gar pash mende, nai wah gar glan ko romeskre jaka.’

²⁷Un miro dad, penas ap mende: ‘Djinenn, kai miri romni anas mange dui tchawen ap i phub.

²⁸Ko jek djas peske mandar un me penom mange: I diwjo viecho maras les. Un me dikom les buder gar pale bis kanna.

²⁹Me hom i phuro rom. Te lenn tumer ninna o duites mandar un te taprels les i bibacht, merau me i dukatar.’

³⁰Un kanna, miro rai, te wau me pale pash miro dadeste, un job dikell, kai o tchawo gar pash mande hi, merell job i dukatar.

³¹Leskro dji hi pandlo ap ko tchaweste. Man wals doosh, te merals maro phuro dad i dukatar.

³²Miro rai, me dom miro wast koi pre, kai anau o tchawes pale. Me penom ap miro dadeste: ‘Te anau les tuke gar pale, well i doosh ap mande un atchell ap mande, jaake rah har djiwau!’

³³Doleske, muk man te wap tiro budepaskro, miro rai! Muk kol tchawes te djal peskre phralentsa!

³⁴Me nai djau gar pash miro dadeste, te hi ko tchawo gar pash mande. Me nai dikoms gar koi duk, hoi well ap miro dadeste, te hi ko tchawo gar pashel!”