Read O Debleskro Drom - I Bibla an o Romano Rakepen 2021 1. Mose 45 Bible Online

1. Mose 45 - O Debleskro Drom - I Bibla an o Romano Rakepen 2021 bible

1. Mose 45

¹Koi rikras pes nai o Josef buder gar pale glan lauterende, kai trul leste tardo hi. Un job bitchras i tsele Egiptarjen win. Un kek his pashel, har job penas, kai job lengro phraal hi.

²Un job rowas soreles. Un i Egiptarja shunan kowa, ninna i menshe an o kheer o baro rajestar.

³Un o Josef penas ap peskre phralende: “Me hom o Josef. Djiwell miro dad?” Leskre phrala penan nai tchi ap leste. Lenge atchas o rakepen krik i trashatar.

⁴Koi penas o Josef ap peskre phralende: “Awenn pash mande!” Un jon djan pash leste. Un job penas pale: “Me hom o Josef, tumaro phraal, kowa, kai bikran tumer ap i parepangre, kai anan man an o them Egiptia.

⁵Kanna hunte khaitell tumen kowa gar, kai bikran man! Choirenn tumen gar pral kowa! O Dewel bitchras man glan tumende kai, te merenn i menshe gar i bokatar.

⁶Dui bersha bokan le an kau them. Un pantch bersha hi glan lende, kai tchiwrenn le nai kek djob an i phub, witar gar anenn le djob dren.

⁷Un o Dewel bitchras man glan tumende an kau them, te lell job tumen dran i bari bok win, te atchenn tumer un tumare tchawe djido ap i phub.

⁸Jaake han gar tumer, kai anan man kate. O Dewel anas man kai. Un job kras man dad pral o baro rajeste an o them Egiptia un rai pral koleskro tselo kheer un pral o tselo them Egiptia.

⁹Kanna, djan sik pash miro dadeste pale un penenn leske: ‘Jaake penell tiro tchawo Josef: O Dewel kras man rai pral o tselo them Egiptia. Kanna am pash mande! Am sik!

¹⁰Tu djiwess an o them Gosen, hoi hi gar dur mandar: tu un tire tchawe un tire tchawengre tchawe, ninna tire bakre un busja, tire grumja un halauter, hoi tut hi.

¹¹Un me dau tut halauter, hoi tut hunte well djipaske. Jaake te wess gar tchorwelo, tu un tiri familja un lauter hoi tut hi. Pantch bersha hi glan mende, kai hi i menshen tchi te chal.’

¹²Tumer dikenn tumare jakentsa, ninna miro phraal Benjamin dikell, kai tchatchepah me hom, kai rakrell tumentsa.

¹³Penenn miro dadeske, hawo railepen man hi an o them Egiptia. Penenn leske halauter, hoi dikan! Un anenn les kai! Anenn les sik!”

¹⁴Un job peras peskro phraleske Benjamin trul i meen un rowas. Un ninna o Benjamin rowas ap leskro betch.

¹⁵Un job tchumras peskre tsele phralen un rowas ap lengro betch. Un koi pal rakran leskre phrala leha.

¹⁶An o kheer o baro rajestar shunan le, kai o Josefeskre phrala wan. Un kowa his mishto o baro rajeske un i pralstunenge an leskro kheer.

¹⁷Un o baro rai penas ap o Josefeste: “Pen tire phralenge: ‘Krenn jaake: Tchiwenn tumaro koowa ap tumare vieche un djan an o them Kanaan!

¹⁸Un lenn tumaro dades un tumare tsele menshen, un awenn pash mande! Un kamau te dap tumen o feteder kotar them an o them Egiptia, te chan tumer o latcheder chapen ko themestar.’

¹⁹Ap tute penau, te dess len wurdja dran o them Egiptia lengre tchawenge un romjenge, te lenn le pengro dades kai!

²⁰Pen lenge, len hunte khaitell kowa gar, te mukenn le lauter tchiddo. O feteder an o them Egiptia lenn jon.”

²¹Un o Israeleskre tchawe kran jaake. O Josef das len wurdja, jaake har o baro rai leske penas, ninna chapaske ap o drom.

²²Hakenes das job jek shukar ripen. O Benjamin las triin-sheel rupene kotja lowe un pantch shukar ripja.

²³Un peskro dadeske bitchras job deesh burike, — kolla hidjran o feteder dran o them Egiptia; un deesh wawar burike. Kolla hidjran djob un maro un chapaske leskro dadeske ap o drom.

²⁴Un job bitchras peskre phralen khere. Un penas ap lende: “Ma tchingrenn tumen ap o drom!”

²⁵Un jon djan dran o them Egiptia un wan an o them Kanaan pash lengro dadeste Jakob.

²⁶Un jon penan ap leste: “O Josef djiwella. Un job hi o rai pral o tselo them Egiptia.” Koi atchas leskro dji tardo. Un job patsas len gar.

²⁷Un jon penan leske lauter, hoi o Josef penas. Un har job dikas kol wurdja, hoi o Josef bitchras leske, was lo pale soreles.

²⁸Un o Israel penas: “Kanna hi doha! Me patsau tumen! O Josef, miro tchawo, djiwella. Me djau kote, te dikap les glan miro merepen.”