Read O Debleskro Drom - I Bibla an o Romano Rakepen 2021 1. Mose 49 Bible Online

1. Mose 49 - O Debleskro Drom - I Bibla an o Romano Rakepen 2021 bible

1. Mose 49

¹Un o Jakob das peskre tchawen gole un penas: Awenn khetne! Me penau tumenge, hoi tumenge djala an ko tsiro, kai wella.

²Tumer, o Jakobeskre tchawe, awenn un shunenn! Shunenn, hoi tumaro dad, o Israel[73], tumenge penell!

³Tu, o Ruben, miro phureder tchawo hal, miri soor hi an tute. Har homs terno un sorelo, wom tiro dad. Tu hal bareder un sorleder har tire phrala.

⁴Diwjo har i pani hals, pash jekate miri romjendar sowal. Ap tiro dadeste i ladj anal. Doleske buder gar ko pralstuno hal.

⁵O Simeon un o Levi hi phrala. Lengre charentsa maran le.

⁶Kamau gar te wap jek lendar, har krenn le tchilatcho koowa win. Kamau gar te wap pash lende, kai jon khetne wenna. I choljatar dan le murshen mulo un dan gurma[74] bango tchitcheske.

⁷Lengri choli chatchrell sik baro. An lengri choli krenn le sawo tchilatcho dareno koowa. Doleske wenn le praassedo! Kamau te wenn le jaake tradedo, te atchenn le buder gar khetne an Israel. Awa, kate te kote an o tselo them hunte djiwenn lengre tchawen, kai pal lende wenna.

⁸Tu, o Juda hal kowa, kones leskre phrala sharenna. Tiro wast hi soreles ap o shero kolendar, kai kamenn tuke tchilatchepen. Glan tute witsrenn pen tele tire phrala.

⁹Miro tchawo, tu hal sorelo har i terno lewo, kai hi tchalo o viechestar, hoi maras lo, un djal pale, kai lo khere hi, beshell pes un tchiwell pes tele. Un hakenes hi daar, te taprell lo les an.

¹⁰Hako tsiro well o baro rai dran o kheer Juda, un jek leskre menshendar rikrell o rajeskro kasht an o wast jaake rah, bis te well kowa, kai tchatchepah o baro rai hi. Ap koleste shunenn i natsjone ap i phub.

¹¹Job pandell peskri burika[75] ap i drakengro ruk. Un lakro ternepen pandell lo ap o latcho drakengro ruk. Peskro ripen thowell lo an mool, peskri baja an loli mool.[76]

¹²Leskre jaka hi kalo i moljatar. Leskre danda hi parno i thudatar.

¹³O Sebulon djiwell pash o baro pani, kote, kai i shiffe tchiddo hi. Leskro them djal bis pash o foro Sidon.

¹⁴O Issachar hi har i soreli burika[77], kai tchiddo hi mashkral dui gone.

¹⁵Job dikas, har shukar leskri platsa hi un har kamlo o them hi, un tchiwas peskro phiko tele, te hidjrell lo pharo koowa un budrell i wawarenge.

¹⁶O Dan dell jak, te well o tchatchepen dren rikedo pash peskre menshende. Doleske sharenn les leskre phrala an Israel.

¹⁷O Dan hi har i sap ap o drom, hoi dandrella o grajes an i herja. Un kowa, kai hi beshdo ap o grai, perell tele.

¹⁸Baro Dewel, ab ap miri rig!

¹⁹O Gad, bud lurde tradenn les. Un job rissrell pes trujel un lell len palla.

²⁰O Asser, ap leskro them well latcho djob baro, leskri phub anell shukar chapen win — chapen, hoi i bare raja chana!

²¹O Naftali hi har i wesheskri grumni, hoi nashell trujel un lell shukar terne.

²²O Josef hi har i terno ruk pash o pani, hoi hidjrell bud rukengre. Leskre kashta wenn baro un djan pral i pre-tchidde barra, kai lo tardo hi.

²³I kurepangre his chojedo ap leste. Ninna te dan le ap leste karje un lan les palla,

²⁴his leskro bogo soreles an leskro wast, un leskre mussja his soreles kerdo, o Jakobeskro sorelo Dewel das les soor. Job dell garda ap o Israel har i bakrengro ap peskre bakre, un dell len gar pre.

²⁵Tiro dadeskro Dewel well ap tiri rig. Job hi o sorelo Dewel. Job dell tut brishin dran o bolepen un pani dran i phub, ninna bud tchawe un vieche.

²⁶Dik i berge, hoi djan pral bis an o bolepen un atchenna hako tsiro! Tiro brawlepen well bareder har kolla. Awa, bareder har ko latcho koowa ap i berge, hoi atchenna hako tsiro. Kowa lauter lell o Josef, kai hi o wi-rodedo mank leskre phralende.

²⁷O Benjamin hi har i diwjo djuklo, kai marella. Taissarlakro chal lo kowa, hoi dandras job an kotja. Un rati dell job i wawaren kolestar, hoi pral atchas.

²⁸Kolla lauter hi i deesh-te-dui bare familje, hoi wenna o Israeleskre deesh-te-dui tchawendar. Kol labentsa penas lenge lengro dad, har lenge djala an ko tsiro, kai wella. Hakeneske his les i wawar lab.

²⁹Un o Jakob penas soreles ap lende: “Te wau me paskedo, paskrenn man pash mire phurende an koi grotta, hoi hi ap ko kotar phub, hoi o Hetares Efron his.

³⁰Koi grotta hi pash Mamre ap ko kotar phub, hoi kharella Machpela an o them Kanaan. Ko kotar phub ginas o Abraham o fun o Hetari, o Efron, te well kote peskri familja paskedo.

³¹Kote paskran le o Abrahames un leskri romjat Sara. Kote paskran le ninna o Isaakes un leskri romjat Rebekka. Un kote paskrom miri romjat Lea.

³²Ko kotar phub, kai i grotta tchiddo hi, hi maro. Mer ginam les fun i Hetarja.”

³³Har o Jakob kowa peskre tchawenge penas, tserdas job peskre herja ap o tchiben un meras.