Read O Debleskro Drom - I Bibla an o Romano Rakepen 2021 2. Samuel 1 Bible Online

2. Samuel 1 - O Debleskro Drom - I Bibla an o Romano Rakepen 2021 bible

2. Samuel 1

¹O David shunas, kai o Saul meras, har was lo dran o kurepen kol Amalekentsa pale pale, un atchas dui diwessa an o foro Ziklag.

²Koi was o triinto diwes i mursh o Sauleskre lurdendar. Koleskre koola his paash, un tchik his ap leskro shero. Un har job pash o Davideste was, witsras job pes glan leste ap i phub, un sharas les.

³O David putchas lestar: “Kai weh tu?” Job penas ap leste: “Me hom o Israeleskre lurdendar un nashom mange.”

⁴O David penas ap leste: “Pen mange, har djal lenge koi.” Kowa penas: “Kol lurde nashan penge dran o kurepen, un bud kol murshendar meran. Ninna o Saul un leskro tchawo Jonatan hi mulo.”

⁵Koi penas o David ap ko terno mursheste, kai penas leske kowa: “Har djineh tu, kai o Saul un leskro tchawo Jonatan mulo hi?”

⁶Ko terno mursh penas: “Me wom ap koi berga Gilboa. Koi dikom, har o Saul paash ap peskro witsepaskro tchuri pre-tchiddo his. Un kol kurepangre, kai ap kol wurdja tardo his, djan soreles ap leste.

⁷Job rissras pes trujel, un dikas man, un das man gole. Koi penom: ‘Kate hom!’

⁸Un job putchas mandar: ‘Koon hal tu?’ Me penom ap leste: ‘Me hom i Amalekari.’

⁹Un job penas ap mande: ‘Ab pash mande un de man mulo! Mange well kalo glan i jaka, miro djipen hi gomme an mande.’

¹⁰Koi djom pash leste, un dom les mulo. Me djinom, te nai djiwell job buder gar, jaake phares his lo dukedo. Un me lom leskri rajeskri stadi lestar tele, ninna ko sonakai ap leskri mussi, un anom kowa pash tute, miro rai.”

¹¹Koi tapras o David ap peskre koola, un kras len paash i dukatar. Un kol mursha, kai pash leste his, kran kowa ninna jaake.

¹²Jon rowan o tselo diwes. Un chan tchi bis te was i rati. Pral o Sauleste rowan le, un pral leskro tchaweste Jonatan, un pral o baro Debleskre menshende, i Israelitarja, kai wan maredo i chareha.

¹³O David putchas ko terno murshestar, kai penas leske kowa: “Kai weh tu?” Koi penas job: “Miro dad hi i wi-themari. Me hom i Amalekari.”

¹⁴O David penas ap leste: “Trashal tu gar, te hadess tiro wast, te dess koles mulo, kai was o baro Deblestar wi-rodedo?”

¹⁵Un o David das jek peskre lurden gole, un penas: “Am kai un de les mulo!” Un kowa das les mulo.

¹⁶Glan kowa penas o David ap o Amalekari: “Tu anal leskro rat ap tute. Doleske meress! Tiro mui phukras ap tute, har tu penal: ‘Me dom koles mulo, koles o baro Dewel win rodas, te well lo baro rai.’”

¹⁷O David giwas i ropaskri gili pral o Sauleste un pral leskro tchaweste Jonatan.

¹⁸Un penas, te well kol menshenge an o them Juda koi gili siklo, te haiwenn le lat giwell. I laba hi dren tchinlo an o liil ‘Jashar’. Un koi gili kharell bogeskri gili.

¹⁹Israel, kol feteder mursha wan ap tire berge maredo! Har nai well kowa, te wan i sorleder kurepangre mulo dino?

²⁰Penenn kowa gar an ko foro Gat, un rakrenn gar koi pral ap i dromma an Ashkelon, te wenn gar bachtelo i djuwja an Filistia, te denn le gar gole i bachtjatar, kolla tcha kolendar, kai gar tchinle hi ap pengro mass!

²¹Tumer berge Gilboa: Kek sapanepen[1] un kek brishin te well ap tumende! Kek djob te well baro ap tumari phub! Kol shilte mare tchatche murshendar hi kote tchiddo. Awa, o Sauleskro shilto hi buder gar dren maklo o djeteha.

²²Te das o Jonatan karje, djan peskre faile hako tsiro kote, kai job kamas. Te das o Saul peskro chareha, maras lo tchatche murshen. Un leskro charo his pherdo rat lendar.

²³O Saul un o Jonatan, an lengro djipen kamam len un lengro baro dji. An lengro merepen hi le khetne. Jon his sikeder har i tchirklo un sorleder har i lewo.

²⁴Tumer tcha an o Israel, rowenn pral o Saul, kai das tumen kutch ripja, un ninna sonakai, te krenn tumen shukar.

²⁵Kol feteder kurepangre hi mulo, — maredo an o kurepen. Maredo pral an i berge hi o Jonatan.

²⁶Miro phraal Jonatan, miro kamlo maal, me rowau pral tute. Man his bari bacht pral tute. Tiro malengro kamlepen his mange feteder har i djuwjengro kamlepen.

²⁷Kal feteder kurepangre hi mulo. Lengre chare molenna buder tchi!