Read O Debleskro Drom - I Bibla an o Romano Rakepen 2021 2. Samuel 17 Bible Online

2. Samuel 17 - O Debleskro Drom - I Bibla an o Romano Rakepen 2021 bible

2. Samuel 17

¹Pal kowa penas o Ahitofel ap o Absalom: “Me kamau 12.000 (deesh-te-dui-serja) murshen win rodell, un lau o Davides palla an kai rati.

²Un me kamau pral leste te perell, jaake rah har job khino hi, un an leskro dji kek soor buder hi. Palle lell lo traash, un kol tsele lurde, kai pash leste hi, nashenna. Un me kamau o baro rajes kokres mulo te dell,

³un kol tsele lurden pale pash tute te anell, jaake har i terni djuwel pash peskro romeste pale djala. Tu rodeh jek murshes kokres. Ma an tchingepen pral kol tsele wawar murshende!”

⁴Ko rakepen his mishto an o Absalomeskre jaka un glan i jaka kol tsele phurendar an Israel.

⁵O Absalom penas: “Denn ninna o Hushajes gole, kol menshendar Arki, te shunas mer, hoi job koi pre penella!”

⁶Un o Hushai was pash o Absalom dren. Un o Absalom penas leske, hoi o Ahitofel rakras, un putchas lestar: “Kras mer kowa? Pen tu les menge!”

⁷Koi penas o Hushai ap o Absalom: “Kowa his kek latcho lab, hoi das kau kopo o Ahitofel.

⁸Tu prindjreh tiro dades un leskre lurden, kai hi sorele kurepangre un chojedo har i diwjo dajengro viecho an o weesh, koleske jek i ternen krik las. Ninna hi tiro dad i lurdo, kai prindjrell o kurepen. Job sowell gar pash i wawar lurdende.

⁹Shun, kowa hi nai jaake, kai khatras job pes mank bare barra oder an i wawar khatepen. Palle, te well kowa jaake, kai tire lurdendar maredo wenna, nai wals penlo, kai o Absalomeskre tsele lurde maredo wan.

¹⁰Palle lell hakeno daar, ninna te hi lo i kurepaskro, un les i dji hi har i lewo. O tselo Israel djinella, kai tiro dad i tchatcho mursh hi, un leskre lurde tchatche kurepangre hi.

¹¹Doleske penau tuke: Le tuke kol tsele murshen dran Israel khetne mank Dan un Beersheba. Kolla hi jaake bud har i santa pash o baro pani. Kolentsa djas tu tuke an o kurepen.

¹²Un kote, kai hatsah les, perah pral leste jaake har o brishino ap i phub perella. Un mer mukah lestar un leskre lurdendar kekes pral, gar jek.

¹³Job te tserdell pes an i sorelo foro pale, hunte tchiwenn i tsele Israelitarja shelle trul ko foro, un tserdenn ko foro tele an i tala, te atchell lestar kek bar buder pale.”

¹⁴Koi penas o Absalom un hakeno an Israel: “Kowa hoi o Hushai penas, hi feteder har kowa, hoi o Ahitofel penas.” Jaake kras o baro Dewel, kai kek kowa kras, hoi o Ahitofel an leskro goswepen penas. O baro Dewel kamas i bibacht pral o Absalom te anell.

¹⁵Un o Hushai penas ap kol rashajende, o Zadok un o Abjatar, hoi o Ahitofel penas o Absalomeske un kol phurenge an Israel. Palle penas lo: “Me penom lenge, te krenn jon kowa wawartchandes.

¹⁶Jaake bitchrenn sik jekes koi, te penell lo o Davideske: ‘Miro baro rai, ma atch an o mulo them ap kai rig o panjestar Jordan kai rati! Dja kanna wergel, te wess tu gar maredo, un kol tsele menshe, kai pash tute hi, witar gar.’”

¹⁷O Jonatan un o Ahimaaz his tardo pash o pani[13], hoi kharell Rogel. Jon nai mukan pen gar an o foro te dikell. Un i budepaskretsa was pash lende un penas lenge, hoi jon hunte penenn o Davideske.

¹⁸Koi dikas len i terno tchawo, un penas kowa o Absalomeske. Koi djan kol dui sik krik, un wan an ko kheer i murshestar an Bahurim. Koles his i brunna pash peskro kheer. Koi dren djan le tele.

¹⁹Un koi djuwel las i plachta un tchiwas lat pral koi brunna, un tchiwas gib koi pre, te dikell kek tchomone.

²⁰Un o Absalomeskre mursha wan pash kol djuwjate an o kheer un putchan latar: “Kai hi o Ahimaaz un o Jonatan?” Penas li ap lende: “Jon djan dureder pash o pani.” Un har kol mursha len rodan un len gar hatsan, djan jon pale an o foro Jerusalem.

²¹Un har jon krik his, wan kol dui dran i brunna win, un djan koi, un penan kowa o baro rajeske David. “Dja sik wergel o pani”, penan le, un ginan leske dren, hawe laba o Ahitofel penas, hoi te krenn le o Davideha.

²²Koi djas o David un kol tsele menshe, kai pash leste hi, wergel o pani Jordan. Un har taissarlakro was, his le lauter ap i wawar rig. Kek lendar atchas pale.

²³O Ahitofel shunas, kai was kowa gar kerdo, hoi job penas. Koi tchiwas lo i ledertikri plachta ap peskri burika[14], beshas pes koi pre un klissas khere an peskro foro. Kote penas lo i menshenge an peskro kheer, hoi te krenn le pal leskro merepen. Palle bladas lo pes pre, un meras. Un job was paskedo an o mulengro kheer peskro dadestar.

²⁴Un o David was an o foro Mahanajim. O Absalom djas wergel o pani Jordan, un kol tsele mursha dran Israel djan leha.

²⁵Un o Absalom tchiwas o Amasa pral peskre lurdende. Glan kowa his o Joab lengro pralstuno. O Amasa his o tchawo i murshestar ko labeha Jeter, i Israelitari[15]. Leskri dai his i Abigail. Lakro dad his o Nahash. Lakri pheen his i Zeruja, kolakro tchawo o Joab hi.

²⁶Un o Absalom djas i murshentsa ap i berga Gilead. Un kote tchiwan le pengre plachtene khera pre.

²⁷Har o David an o foro Mahanajim was, koi wan pash leste: o Shobi, koleskro dad o Nahash hi, dran o foro Rabba, kai i Ammonarja djiwan; o Machir, koleskro dad o Ammijel hi dran o foro Lo-Dabar; un o Barsillai dran o foro Roglim dran o them Gilead.

²⁸Kolla anan tchibja, pirja, tchare, gib un djob, jarro, peklo djob, bohne, linse,

²⁹gwin[16], khil, grumjengro kiral un bakrengro kiral. Kowa dan le o Davideske un kol menshenge, kai pash leste hi, te atchenn jon soreles. Kol triin penan penge: “Kol menshen hi bok un trush, un jon hi khino an kau mulo them.”