Read O Debleskro Drom - I Bibla an o Romano Rakepen 2021 2. Samuel 21 Bible Online

2. Samuel 21 - O Debleskro Drom - I Bibla an o Romano Rakepen 2021 bible

2. Samuel 21

¹An ko tsiro, kai o David djiwas, was i bari bok pral o them, un i menshen his triin bersh tchi te chal. Un o David putchas o baro Deblestar, hoske kowa jaake hi. Un o baro Dewel penas: “Ap o Saul un ap leskro kheer hi i rateskri doosh tchiddo, doleske, kai o Saul das kol Gibeonarjen mulo.”

²[I Gibeonarja his gar kol menshendar Israel. Jon atchan pral fun i Amorarja. Un i Israelitarja kran lentsa win, te mukenn le len djido. Har kuras pes o baro rai Saul peskri tseli sorjah peskro themeske Israel un Juda, kamas lo ninna i tsele Gibeonarjen te marell.] Kanna mukas o baro rai David kol Gibeonarjen gole te dell, un rakras lentsa,

³un penas ap lende: “Hoi krap me tumenge? Un har nai krau me kowa pale mishto, hoi ap tumende kerdo was? Kamau, te dikenn un rakrenn tumer pale latches ap i menshende o baro Deblestar.”

⁴Kol Gibeonarja penan ap leste: “Mer lah kek rup un kek sonakai o Sauleskre menshendar. Un men hi gar ko tchatchepen, te das jekes mulo an Israel.” Putchas o David lendar: “Hoi kamenn tumer, te krap tumenge?”

⁵Penan le ap leste: “Ko mursh, kai maras men, un kai kamas te atchell mendar kek djido an o tselo Israel,

⁶dran leskro kheer denn men efta murshen, te bladas len pre glan o baro Debleste an o foro Gibea, hoi o foro o Saulestar hi, koles o baro Dewel win rodas.” Penas o David: “Me dau len tumende.”

⁷Un job rodas efta murshen win. O Mefi-Boshet, koleskro dad o Jonatan his un koleskro papo o Saul his, kowa his gar mank kolende. Glan i tsiro das o David glan o baro Debleste o Jonataneske i sowel, te mukell lo leskre tchawen djido.

⁸Kanna las o baro rai David kol dui mursha Armoni un Mefi-Boshet, kolengri dai o Sauleskri romni, i Rizpa hi. Kolakro dad his o Aja. Ninna las lo kol pantch mursh tchawen, kai o Sauleskri tchai, i Merab, ap i phub anas. Lengro dad his o Adrijel, koleskro dad his o Barsillai dran Mehola.

⁹Un o David das len an kol wasta i Gibeonendar. Kolla bladan len pre ap koi berga glan o baro Debleste. Jaake wan kol efta ap jek kopo maredo. Kowa his an kol diwessa, kai was o djob tele tchinlo.

¹⁰Koi las i Rizpa, kolakro dad o Aja his, i gono un tchiwas kowa ap i baro bar, un beshas pes koi pre un atchas kote jaake rah har jon o djob tele tchinan, bis te peras o brishino dran o bolepen ap kol mulende, kai koi bladedo his. Un ap o diwes mukas li gar kol tchirklen ap lende te well, witar gar rati i wesheskre viechen.

¹¹Un o Davideske was penlo, hoi kras o Sauleskri duiti romni, i Rizpa, kolakro dad o Aja his.

¹²Un o David djas koi, un las o Sauleskre kokale un kol kokale peskro tchawestar Jonatan, hoi pash kol menshende Jabesh an Gilead his. Kolla lan len tchorchanes krik kotar, kai i Filistarja len pre bladan ap i platsa an Bet-Shean, pal kowa, kai jon len maran ap koi berga Gilboa.

¹³Un o David anas len fun kotar koi pral. Un ninna lan le kol tsele kokale kolendar khetne, kai wan pre-bladedo.

¹⁴Un jon paskran len khetne i kokale o Saulestar un leskro tchawestar Jonatan an ko them Benjamin, an o gab Zela, an o mulengro kheer peskro dadestar Kish. Un jon kran lauter jaake har o baro rai David penas. Pal kowa his o baro Dewel pale kamlo ap ko them.

¹⁵Pale kran kol Filistarja kurepen i Israelentsa. Un o David djas peskre lurdentsa tele, te kurenn le pen kol Filistarentsa. Un o David was khino.

¹⁶Koi his mank i Filistarja i baro mursh, bareder har i wawar. Leskro lab his Jishbi-Benob. Koleskri lengsti tchuri his budeder har triin kilogramme pharo. Ninna his les i newo charo dran saster. Kowa kamas o Davides mulo te dell.

¹⁷O Abishai, koleskri dai i Zeruja his, was leske ap i rig, un das kol Filistares mulo. Koi dan o Davideskre lurde les sowel, un penan: “Tu djas mentsa gar buder an o kurepen, te djal koi momeli an Israel gar win!”

¹⁸Koi pal was i wawar kurepen kol Filistarentsa pash o foro Gob. Koi das o Sibbechai dran o gab Husha i wawar murshes kol bare menshendar mulo. Koleskro lab his Saf.

¹⁹Pal kowa was pale i kurepen pash o foro Gob. Koi das o Elhanan, koleskro dad o Jair his, dran o foro Betlehem o Goliates dran Gat mulo. Koles his i lengsto witsepaskro tchuri. Koja his jaake baro har i tikno ruk.

²⁰Pal kowa was pale i kurepen pash o foro Gat. Mank i Filistarja his i wawar baro mursh. Koles his shob gushte ap hako wast, un shob tsebe ap hako piro.

²¹Un job praassas o Israel. Un o Jonatan, koleskro dad o Shimea his, das les mulo. O Shimea his i phraal o Davidestar.

²²Kolla star his bare mursha un djiwan an o foro Gat. Un kolla wan mulo dino o Davidestar un leskre lurdendar.