Read O Debleskro Drom - I Bibla an o Romano Rakepen 2021 2. Samuel 22 Bible Online

2. Samuel 22 - O Debleskro Drom - I Bibla an o Romano Rakepen 2021 bible

2. Samuel 22

¹O David rakras glan o baro Debleste kol laba koi giljatar an ko tsiro, kai o baro Dewel les win las dran i wasta lauterendar, kai kaman les te marell, ninna dran o Sauleskre wasta. Un job penas:

²Baro Dewel, tu hal mange har i baro sorelo bar, kai nai khatrau man, har i sorelo kheer, kai nai krell kek mange tchilatchepen.

³Miro Dewel, tu hal kowa, pash koleste nai wau un man khatrau. Tire wasta rikreh tu pral mande. Tu hal ko sorelo ap miri rig, un hal mange har i sorelo kheer pral ap i berga. Tu kreh miro djipen sasto, un kreh, te dukrell man kek.

⁴Me sharau o baro Debles! Te dau ap leste gole, lell lo man win dran i wasta kolendar, hoi mange tchilatchepen kamenna.

⁵O merepen pandas man an peskre shelle, un merepaskri daar djas pral mande har sorele panja.

⁶I mulengro them pandas peskre shelle trul mande, un o merepaskre shelle tserdan man tele.

⁷An miri daar kharom ap o baro Debleste. Awa, bari gole dom ap miro Debleste. An peskro railo kheer shunas lo man, un miri gole was glan leskre kanda.

⁸Koi trissas i phub, pral un tele djas o bolepen o Debleskri bari choljatar.

⁹Jagakro ducho djas dran leskro nak pre, baro tatepen was dran leskro mui win, ninna jag das karje lestar win.

¹⁰Un job tserdas o bolepen ap i rig, un was tele. Kali rat his tel leskre herja.

¹¹Un job beshas ap i cherub[18] un hadas pes har i tchirklo; awa, job mukas pes te hidjrell ap i mussja o duchestar.

¹²Kali rat his leskro ripen. Pesse kale wolke his trul leste.

¹³Dran o railepen glan leste peran barra hoi chatchran.

¹⁴Un o baro Dewel mukas o bolepen bari gole te dell, awa, o Dewel pral halauter mukas pes te shunell bari goljah.

¹⁵Un job das jag karje dran o bolepen kate te kote, un tradas i wolke krik.

¹⁶Kote was o telstunepen tel i panja diklo, un i telstuni phub was pre-tchakedo, har tu, baro Dewel, tchingral un trad dal an tiri choli.

¹⁷Dran o bolepen tapras man tiro wast, un tserdas man dran o baro pani win.

¹⁸Tu lal man win dran o wast kol sorelendar, kai kaman miro merepen, awa, dran ko wast kolendar, kai his jaake chojedo ap mande un bud sorleder har me.

¹⁹Ap o diwes, kai i bibacht pral mande was, peran le pral mande. Koi was o baro Dewel ap miri rig.

²⁰Job las man win dran lengre wasta un anas man an i buchlo them. Job kamell man, doleske kras lo kowa.

²¹O baro Dewel djinas, te homs an o tchatchepen tardo. Doleske kras lo mange latchepen. Kek doosh his ap mande. Doleske his lo mange latcho.

²²Me rikrom man ap i dromma o baro Deblestar, un mukom gar miro Debles.

²³Awa, leskro tselo tchatchepen hi glan mire jaka, un rikrau ap lauter, hoi job kamell, te krap.

²⁴Jaake te hatsell lo tchi ap mande, kai nai tchingrell lo mantsa, un dau jak, te well kek doosh ap mande.

²⁵Miro tchatchepen his glan leskre jaka. Un kek doosh his ap mande. Doleske kras o baro Dewel mange latchepen.

²⁶Tu rikreh ap koleste, kai ap tute rikrell, un kreh, hoi mishto hi koleske, kai krella, hoi tu lestar kameh.

²⁷Tu hal latcho ap koleste, kai hi latcho ap i wawarende un hal gosweder har kowa, kai ap bange dromma djal.

²⁸Tu weh ap i rig i tchorwelenge, un kol pre-phurden kreh tu tiknes.

²⁹Awa, tu baro Dewel, hal miri momeli, un kreh miri rati jaake har wals diwes.

³⁰Awa, khetne tuha nai djau me an o kurepen. Khetne miro Debleha nai stau me pral bare pre-tchidde barra.

³¹I tsele dromma, kai o Dewel man anella, hi latcho. Leskre laba hi latcho un tchatcho. Job rikrell peskro wast pral hakeneste, kai well pash leste.

³²Jek kokres hi o Dewel. Kowa hi o baro Dewel. Jek kokres hi har i baro sorelo bar menge, kai nai khatrah men. Kowa hi maro Dewel.

³³Job hi kowa, kai dell man soor un krell i latcho drom glan mande.

³⁴Job krell mire herja jaake sik, har te wans le i herja i wesheskri grumjatar, te wap soreles tardo ap i pralstune berge.

³⁵Job sikrell man, har mire wasta hunte kurenn pen, un har miri mussi rikrell o sasterno bogo.

³⁶Baro Dewel, tu rikreh tiro wast pral mande, te dukrell man kek. Tu dikeh latches ap mande un kreh man bares.

³⁷Tu kral, te nai stakrau soreles pre, un kral mange o drom dur pre.

³⁸Me lom kolen palla, kai ap mande pre djan, un wom sorleder har jon, un mukom gar tele, bis te his le mulo dino.

³⁹Me marom len jaake, te nai stan le gar buder pre, un stakrom len tel mire herja.

⁴⁰Tu dal man i soor, te nai kurom man lentsa un witsral kolen ap i phub glan mande, kai hadan pen ap mande.

⁴¹Tu kral, te hunte nashan le mandar. Jaake nai marom kolen, kai mange tchilatchepen kaman.

⁴²Jon dikan pal jekeste, kai lenge ap i rig well. Un kek his koi. Ap o baro Debleste dan le gole, un job rakras gar pale ap lende.

⁴³Un me dom len khetne, dom len tiknes har tchik, hoi i baro ducho[19] krik phurdell. Awa, har ap tchik ap i dromma stakrom len khetne.

⁴⁴Tu lal man win dran o tchingepen mire menshentsa, un kral man o rai pral i menshende dran wawar themma, Menshe, kolen me gar prindjrom, budrenn mange.

⁴⁵I wi-themarja rakrenn shukar ap mande, un shunenn ap mande un krenn sik, hoi penau.

⁴⁶Len hi buder kek soor an pende. Darjah wenn le dran pengre sorele rajengre khera win.

⁴⁷O baro Dewel djiwella! Les sharau: har i baro sorelo bar hi lo mange. Miro Debles hadau: job mukell man gar — hako tsiro dell lo jak ap mande,

⁴⁸un kras man sorleder har kolla, kai kuran pen mantsa, un witsras i menshen dran wawar themma tel mande.

⁴⁹Tu lal man win dran i wasta kolendar, kai kaman miro merepen. Tu hadal man pral kolende, kai hadan pen ap mande, un mukal man gar an i tchilatche wasta.

⁵⁰Doleske sharau tut mank kolende, kai hi gar tire menshendar, baro Dewel, un giwau gilja tuke.

⁵¹Tu kreh baro koowa o Davideske, koles tu wi-rodal, te well lo o baro rai. Un hal jaake latches ap leste un kolende, kai lestar wenn. Tiro kamlepen lenge atchell hako tsireske.