Read O Debleskro Drom - I Bibla an o Romano Rakepen 2021 2. Samuel 4 Bible Online

2. Samuel 4 - O Debleskro Drom - I Bibla an o Romano Rakepen 2021 bible

2. Samuel 4

¹Har shunas o Sauleskro tchawo, o Ish-Boshet, kai o Abner an o foro Hebron maredo was, peras leskro dji an peskre cholopja, un ap o tselo Israel was traash.

²Dui leskre murshendar his pralstune pral i lurdende. Ko jek kharas Baana, ko wawar Rechab. Lengro dad his o Rimmon dran o foro Beerot dran o kheer Benjamin. O foro Beerot his ninna an o them Benjamin.

³Kolla kai glan lende an Beerot djiwan, nashan penge an Gittajim, un his koi wi-themarja bis kai diwes.

⁴Ninna o Sauleskro tchawes, o Jonatanes, his i tchawo. Kowa his bango ap hake dui herja. Job his pantch bersh har leskro papo, o Saul, un leskro dad, o Jonatan, marede wan an Jesreel. Har kowa leskri familja shunas, hadas les koi djuwel pre, kai ap leste jak das, un nashas peske. Un har joi sik krik nashas, peras job, un his bango fun ko tsiro. Job kharell Mefi-Boshet.

⁵Koi djas o Rechab un o Baana, kolengro dad o Rimmon hi, dran o foro Beerot, un wan pash ko kheer, kai o Ish-Boshet djiwell. His ko tsiro, kai o diwes tateder hi. Un o Ish-Boshet sowas pal o chapen ap peskro tchiben.

⁶Un jon djan mashkral an o kheer har te lans le djob,

⁷un hatsan o Ish-Boshetes ap peskro tchiben tchiddo an peskri isema. Un jon dan les mulo tchurje, dan leskro shero tele, un lan leskro shero, un djan i tseli rati an o telstuno them, kai o pani Jordan nashell.

⁸Un anan ko shero pash o baro rajeste, o David, an o foro Hebron, un penan ap leste: “Dik, kawa hi ko shero fun o Ish-Boshet. Leskro dad, o Saul, kras tuke tchilatchepen un kamas tut te marell. Kau diwes das o baro Dewel o Sauleskre menshende pale, hoi o Saul ap tute, maro baro rajeste, kras.”

⁹Koi penas o David: “Me dau man sowel pash o djido Debleste, kai las man win dran hako tchilatchepen:

¹⁰Ko bitchepaskro, kai mange penas: ‘O Saul hi mulo’, un patsas, kai job latche labentsa was, koles dom mulo an o foro Ziklag. Jaake plaissrom les peskre latche labenge.

¹¹Tumer tchilatche menshe kran i djungleder koowa har kowa kras! Tumer dan i murshes mulo, kai pal o tchatchepen djiwas, un dan les mulo an leskro kheer ap leskro tchiben. Tumer hunte plaissrenn leskro rateske! Tumer han buder gar moldo te djiwenn ap kai phub.”

¹²Un o David penas ap peskre lurdende: “Denn len mulo!” Kolla dan len mulo, un dan lengre wasta un herja tele. Un pandan len pre pash o pani an o foro Hebron! O shero fun o Ish-Boshet lan jon un paskran kowa an o mulengro kheer, kai o Abner paskedo hi an o foro Hebron.