Read O Debleskro Drom - I Bibla an o Romano Rakepen 2021 2. Samuel 8 Bible Online

2. Samuel 8 - O Debleskro Drom - I Bibla an o Romano Rakepen 2021 bible

2. Samuel 8

¹Pal jek tsiro kuras pes o David pale i Filistarentsa un was sorleder har jon, un las o Israel dran lengre wasta win, jaake te his kol Filistarjen buder gar penepaske pral lende.

²Job das ninna kol Moabarja un penas, te tchiwenn le pen ap i phub. Un dui i trinendar kras lo mulo, un jek i trinendar mukas lo djido. Jaake was o Davides penepaske pral kol Moabende. Un jon hunte dan les rup un sonakai.

³O David kuras pes ninna o baro rajeha pral o them Zoba. Leskro lab his Hadad-Eser, koleskro dad his o Rehob. Har o Hadad-Eser koi djas, te lell lo o them pash ko pani Eufrat pale dren, was o David peskre lurdentsa, un das les un leskre lurden.

⁴Un pandas 1.700 (jek-sero-efta-sheel) klissepangre, un 20.000 (biish-serja) lurden, un kras i tsele grajen bango. Kokres sheel lendar mukas lo pral.

⁵Koi wan kol Syrarja dran o them Damaskus pash o Hadad-Eser, ko baro rai pral o them Zoba, te wenn le leske ap i rig. Un o David maras lendar 22.000 (biish-te-dui-serja) murshen.

⁶Un job tchiwas moskre dren an lengro them. Un o Davides was penepaske pral i Syrarja, un jon hunte dan les rup un sonakai. Jaake his o baro Dewel o Davideske ap i rig, kai lo ninna djas.

⁷Kol lurden o baro rajestar Hadad-Eser his sonakangre shilte. Kolen anas o David an o foro Jerusalem.

⁸Un bud lolo saster las lo dran i forja Tebach un Berotai. Kol forja his an o them, kai his o Hadad-Eser o baro rai.

⁹Ko rai pral o foro Hamat — leskro lab his Toi, — his an o kurepen o rajeha Hadad-Eser. Har o Toi kanna shunas, kai maras o David koleskre tsele lurden, bitchras lo peskro tchawes, o Joram, pash o baro rajeste David, un parkras pes pash leste un mukas les te penell, te well les bud bacht, un anas peha rupene koola un sonakangre koola un sawe dran lolo saster.

¹¹Kowa lauter das o baro rai David o baro Debleste, un tchiwas kowa an leskro kheer, ninna ko rup un sonakai, hoi job kol menshendar las, pral kolende job o sorleder was un kanna o rai hi.

¹²Kolla his i menshe an i themma Edom, Moab, Ammon, Filistia, Amalek. Ninna kowa tchiwas lo an o Debleskro kheer, hoi las lo o rajestar pral o foro Zoba, o Hadad-Eser, koleskro dad o Rehob hi.

¹³Jaake was o Davideskro lab baro. Har was job dran o kurepen, kai das lo kol Syrarjen, djas lo pale win un kuras pes i Edomentsa an i Londi Tala. Un job maras an koi tala 18.000 (deesh-te-ochta-serja) lurden.

¹⁴Un job tchiwas moskre dren an hako foro an o them Edom. Un o Davides his penepaske pral o tselo them Edom. O baro Dewel his ap o Davideskri rig, kai job ninna djas.

¹⁵Jaake his o David baro rai pral o tselo them Israel, un kras, te lell hakeno peskro tchatchepen.

¹⁶O Joab, koleskri dai i Zeruja hi, his o pralstuno pral i tsele lurdende, un o Josafat, koleskro dad o Ahilud his, his o baro rajeskro rakepaskro.

¹⁷O Zadok, koleskro dad o Ahitub hi, un o Ahimelech, koleskro dad o Abjatar hi, his rashaja. O Seraja his kowa, kai tchinas i lila.

¹⁸O Benaja, koleskro dad o Jojada hi, his o pralstuno pral kol Kretarja un Pletarja, kai his trul o baro rajeste tardo, te denn le ap leste jak. Ninna o Davideskre tchawe his rashaja.