Read O Debleskro Drom - I Bibla an o Romano Rakepen 2021 1. Rajengro liil 6 Bible Online

1. Rajengro liil 6 - O Debleskro Drom - I Bibla an o Romano Rakepen 2021 bible

1. Rajengro liil 6

¹An o starto bersh, har o Salomo o baro rai pral Israel his, an o tchon Siw, kowa hi o duito tchon an o bersh, kran pen i budepangre o Salomestar ap i budi, te krenn le o baro Debleskro kheer. Kowa his 480 (star-sheel-te-ochta-deesh) bersha pal kowa, kai i Israelitarja dran o them Egiptia djan.

²Un o kheer, hoi kras o baro rai Salomo o baro Debleske, his trijanda metarja lengsto, un deesh metarja buchlo un deesh-te-pantch metarja baro.

³Un job mukas i glanstuni halla glan o kheer te krell: Koja his jaake buchlo har ko kheer, deesh metarja, un pantch metarja lengsto.

⁴Un job kras wochja an o kheer un kras sasterne kashta glan koi.

⁵Win trul o kheer ap kol dui rigja un ap i palstuni massuri mukas lo rigjengre iseme te krell. Kolla djan ap triin dromma[10] jek pral o wawar trul o kheer.

⁶Telstunes his koi isema 2,5 metarja buchlo. Koi pral his koi isema 3 metarja buchlo. Un koi pral his koi isema 3,5 metarja buchlo. Jaake nai tchiwan le i kashta ap kol kashta koi tel, un hunte tchiwan i kashta gar an i barra o kherestar dren.

⁷I barra ko khereske wan dino, glan te was o kheer kerdo. Jaake was kek sasterno depaskro shunlo, kek tower, witar kek wawar sasterne koola, an ko tselo tsiro, har o Debleskro kheer kerdo was.

⁸Ap i tchatchi rig o kherestar his i wudar an i rigjakri isema[11]. Kote djas i treppa pre an i isema koi pral, un kotar dureder an koi pralstuni isema.

⁹Jaake kran o Salomeskre budepangre ko tselo kheer. Un ap o kheer mukas lo zedertikre kashta te tchiwell, jek langs o wawar.

¹⁰Koi rigjakri isema djas trul o tselo kheer. Fun tel bis pash o mashkralstunepen his li dui-te-paash metarja baro. Un fun o mashkralstunepen bis pral his li ninna dui-te-paash metarja baro. Un zedertikre kashtentsa his li pandlo ap o kheer.

¹¹Un o baro Dewel penas ap o Salomo:

¹²“Tu te kreh, hoi tutar kamau un djiweh pal miro tchatchepen un rikreh mire tsele laba, palle well miro lab tchatcho an tiro djipen, ko lab, hoi me rakrom tiro dadeha, o Davideha,

¹³un me kamau te djiwap an kau kheer, hoi tu mange kreh, mank i Israelitarja, un kamau mire menshen Israel gar kokres te mukell.”

¹⁴Un o Salomo kras ko tselo kheer jaake. Har i massurja kerdo his,

¹⁵tchakras lo i massurja fun dren i zedertikre kashtentsa, hoi djan fun tel bis pral. Un i phub tchakras lo kashtentsa kol rukendar, hoi kharenn zipresse.

¹⁶Un deesh metarja glan i palstuni massuri kras job i wawar massuri dran zedertikre kashta. Kai massuri djas fun tel bis pral. Jaake kras lo an o kheer i kutch isema o baro Debleske, hoi leske kokres his.

¹⁷Un biish metarja his koi isema glan koi kutch isema.

¹⁸Fun dren his ko tselo kheer zedertikro kashteha win tchiddo. Kek bar nai was diklo. Un an o kasht his rukengre un shukar blume dren tchinlo.

¹⁹Un mashkral an o kheer kras lo koi isema, kai te well koi mochton tchiddo, kai o baro Debleskre deesh laba dren his.

²⁰Koi isema his deesh metarja lengsto, deesh metarja buchlo, un deesh metarja bis pral. Un pral i massurja his latcho sonakai maklo. O Salomo kras ninna i bob dran zedertikro kasht, te well kote sungepaskro koowa chatchedo o Debleske, un tchiwas ko bob glan o kutch isema,

²¹un makas sonakai koi pral. Un dren an o kheer makas lo latcho sonakai pral i massurja, un kras sonakangre shelle, hoi glan koi kutch isema pandle wan. Jaake his ko tselo kheer dren mit latcho sonakai pral-maklo.

²³Un job mukas dui bolepangre[12] te krell, te wenn le an kai kutch isema tardo. Kolla his pantch metarja baro un his kerdo dran olivtikro kasht.

²⁴Len his mussja har tchirkle. Haki mussi his dui-te-paash metarja bares. Dui mussja buchles kerdo his khetne pantch metarja buchles jek rigjatar ap i wawar.

²⁵Un ko duito bolepaskro his jaake baro har ko wawar un dikas win har ko wawar.

²⁶Hake dui his pantch metarja baro.

²⁷Un o Salomo tchiwas len mashkral an i kutch isema, jek langs i wawar. Un lengre mussja his jaake buchles, te djas koi mussi jekestar bis ap koi jek massuri un koi mussi o wawarestar bis pash koi wawar massuri. Mashkralstunes wan i mussja khetne.

²⁸Un job tserdas latcho sonakai pral i bolepangre.

²⁹Un an i tsele massurja an o Debleskro kheer mukas lo dren un win shukar koowa dren te tchinell, hoi win dikas har bolepangre, palmtikre ruka un blume.

³⁰Un pral o kasht ap i phub an o Debleskro kheer mukas lo sonakai te tserdell.

³¹Un o wudar an o kutch isema his dran dui kotja dran olivtikro kasht. I pesse kashta, hoi tchatches un serwes pash o wudar his, kolen his pantch rigja.

³²Ninna an kol dui kotja an o wudar mukas lo shukar koowa dren te tchinell: bolepangre un palmtikre ruka un blume; un mukas sonakai koi pral te tserdell.

³³Un jaake kras lo ninna o wudar glan o Debleskro kheer: I pesse kashta, hoi serwes un tchatches lestar hi, his dran olivtikro kasht, un len his star rigja.

³⁴Un mank lende his dui wudja dran zipresstikro kasht, hakeno dran dui kotja, hoi nai rissrenn pen.

³⁵Un an kol wudja mukas lo pale shukar koowa dren te tchinell: bolepangre, palmtikre ruka un blume, un tserdas pral halauter sonakai.

³⁶Job mukas ninna i glanstuni platsa trul o Debleskro kheer te krell. Trul i platsa kras lo i massuri, kai triin kope barra ap barra tchiddo wan, un ap i triinte barra wan zedertikre kashta tchiddo.

³⁷An o starto bersh, har o Salomo baro rai his, wan i telstune barra o khereske o baro Deblestar tchiddo. Kowa his an o tchon Siw.

³⁸Un an o deesh-te-jekto bersh an o tchon Bul, — kowa hi o ochtato tchon — his o kheer kerdo. Un lauter his jaake har hunte wals kowa. Un jon budran efta bersha ap leste.