Read O Debleskro Drom - I Bibla an o Romano Rakepen 2021 1. Rajengro liil 8 Bible Online

1. Rajengro liil 8 - O Debleskro Drom - I Bibla an o Romano Rakepen 2021 bible

1. Rajengro liil 8

¹Kote mukas o baro rai Salomo i phureden an Israel pash peste well an o foro Jerusalem: kolla, kai his i pralstune pral i deesh-te-dui bare khera o Jakobeskre deesh-te-dui tchawendar, un i pralstune pral lengre tsele familje. Khetne lentsa kamas job o baro Debleskro mochton, kai o Debleskre deesh laba dren tchiddo hi, an o Debleskro kheer te anell. Ko mochton his tchiddo an o Davideskro foro ap i berga Zion.

²Un i tsele mursha dran Israel wan khetne pash o baro rajeste, o Salomo, an kol bare diwessa[23] an o eftato tchon. Kowa hi o tchon, hoi kharell Etanim.

³Un har i tsele phureder dran Israel khetne his, hadan i rashaja o mochton kol deesh labentsa o baro Deblestar pre,

⁴un hidjran les an o Debleskro baro kheer. Ninna anan le o Debleskro plachteno kheer koi, un ko tselo Debleskro koowa, hoi koi dren his. Kowa kran i rashaja un i Levitarja.

⁵Un o rai Salomo un i tsele Israelitarja, kai wan khetne pash leste glan ko mochton, maran un chatchran bakren un grumjen o Debleske, jaake bud, kai kek djinas, har bud kolla his.

⁶Un i rashaja anan o mochton o Debleskre deesh labentsa ap peskri platsa an koi palstuni isema, hoi kharell Debleskri kutch isema. Jon tchiwan o mochton tel kol dui bolepangre figure[24], kai kharenn Cherubim, tel lengre tchirklengre mussja[25].

⁷Kal Cherubim kran pengre mussja buchles pral koi platsa, kai o mochton tardo his, un tchakran jaake o mochton un leskre hidjepangre kashta.

⁸Un i hidjepangre kashta his jaake lengsto, kai lengre palstune kotja nai diklo wan an koi glanstuni isema, hoi hi glan i palstuni isema. Fun win nai wan le gar diklo. Un kote his le bis ap kau diwes.

⁹Un an ko mochton his tchi dren, har kokres kol dui barra, hoi o Mose dren tchiwas pash i berga Horeb. An lende his o baro Debleskre deesh laba dren tchinlo, hoi i Israelitarja hunte rikrenn. Kowa kras lo lentsa win, har jon win wan dran o them Egiptia.

¹⁰Har i rashaja win djan dran o baro Debleskro kheer, his i wolka an o tselo kheer.

¹¹An koi wolka his o baro Debleskro railepen. O tselo kheer his pherdo railepen o baro Deblestar. Doleske nai atchan i rashaja gar koi, te krenn le pengri budi.

¹²Koi penas o Salomo: “Baro Dewel, tu penal: ‘Me kamau te djiwap an i kali wolka.’

¹³Un me mukom tuke kau railo kheer te krell, te djiwess koi dren un nai atcheh hako tsireske.”

¹⁴Un o rai Salomo rissras pes un dikas ap i menshende un rakras o Debleskri bacht win pral i tsele Israelitarjen, kai kote tarde his.

¹⁵Un job penas: “Sharedo well o baro Dewel, ko Dewel pral o Israel. Job mukas tchatches te well, hoi lo miro dadeske, o Davideske, penas, har penas lo:

¹⁶‘Ko tselo tsiro, har mire menshen Israel dran o them Egiptia win anom, rodom me kek foro win an o tselo them Israel[26], te krenn le mange kote i kheer, kai wap sharedo. Na-a, hi o David, koles win rodom, te well lo rai pral mire menshende Israel.’”

¹⁷Un o Salomo penas palle: “Miro dadeske, o Davideske his ap o dji tchiddo, te krell lo i kheer o baro Debleske, kai o Israeleskro Dewel hi.

¹⁸Un o baro Dewel penas ap miro dadeste, o Davideste: ‘Tu kral mishto, te kameh mange i kheer te krell.

¹⁹Kanna te wess tu gar kowa, kai krell miro kheer, na-a, tiro tchawo, kowa, kai well tuke boldo, kowa mu krell mange i kheer.’

²⁰Un o baro Dewel mukas peskro lab tchatches te well. Dikenn ap mande: Me wom pal miro dadeste kanna o baro rai pral o Israel, jaake har o baro Dewel penas. Un me mukom leske i kheer te krell, te well job, o Dewel pral o Israel, kote an-mangedo.

²¹Un me tchiwom kote ko mochton dren, kai kol dui barra dren hi, kai o Debleskre deesh laba dren tchinlo hi, hoi job mare phurende das, te rikrenn le pen ap lende. Kolen das lo len an ko tsiro, kai job anas len dran o them Egiptia win.”

²²Un o Salomo djas glan koi chatchepaskri, kai o baro Debleske vieche chatchedo wenn. Un i tsele Israelitarja his ninna koi. Un job hadas peskre wasta pral an o bolepen,

²³un penas: Baro Dewel, tu o Dewel pral o Israel, kek dewel hi har tu pral an o bolepen, witar gar tele ap i phub. Tu rikreh tiro lab, hoi tire menshende dal, un hal lenge latches, kolenge, kai djiwenn glan tute pengro tselo djijeha.

²⁴Tu rikral tiro lab, hoi dal miro dadeske, o Davideske, kai tuke koi his. Tu kral, te was halauter jaake har tu penal. Halauter nai dikenn kowa ap kau diwes.

²⁵Kanna, baro Dewel, tu Dewel pral o Israel, rike ninna tiro wawar lab, hoi tu dal miro dadeske, o Davideske, kai tuke koi his. Tu penal, te well hako tsiro jek dran o Davideskri familja o rai pral o Israel. Kowa djal jaake rah, har denn leskre tchawe garda ap pengre dromma, te djiwenn le glan tute jaake, har o David glan tute djiwas.

²⁶Tu, o Israeleskro Dewel, kanna muk tiro lab tchatches te well, hoi tu penal miro dadeske, o Davideske, kai tuke koi his.

²⁷Nai well tchatcho, kai o Dewel kamell te djiwell ap i phub? O tselo bolepen hi gar bares doha leske. Har nai krals kowa kau kheer, hoi me mukom te krell?

²⁸Miro baro Dewel, tu hal miro rai. Shun, hoi tutar mangau kau diwes! Shun miro mangepen!

²⁹Rike tire jaka pre pral kau kheer an i rati un ap o diwes! De jak ap ko kotar phub, kolestar tu penal: Kote kamau te mangenn tumer man an. Shun man, miro rai, te rakrau kate tuha!

³⁰Shun miro mangepen un ninna ko mangepen tire menshendar Israel, te denn le gole ap tute kai ap kau kotar phub. Un tu te shuneh les an tiro kheer an o bolepen, palle ab kamles, un le koi doosh mendar krik.

³¹Un te anell jek i doosh ap i wawareste, un kowa well kate anlo glan koi chatchepaskri an tiro kheer, un dell pes sowel, te nai well i bibacht pral leste, te rakrell lo gar o tchatchepen,

³²palle shun an o bolepen, un kre o tchatchepen win pral tire budepangre. Kre te well o tchilatchepen, hoi jek kras, ap leskro shero. Un ko wawares, kai an o tchatchepen his, de les leskro tchatchepen, te well diklo, kek doosh hi ap leste.

³³Te mukenn tire menshen Israel tiro drom un wenn doleske i menshendar dran wawar themma khetne dine, un jon wenn pale pash tute un denn tiro lab an-gole un mangenn pen tele glan tute kate an kau kheer

³⁴palle shun len tu an o bolepen, un le lengri doosh lendar krik, un an len pale pale an ko them, hoi tu dal lengre phurende.

³⁵Te mukenn tire menshen Israel tiro drom, un tu rikreh doleske o brishin pale, un jon denn tut an-gole un rissrenn lengre muja ap koi rig, kai kau kheer tardo hi, un mangenn pen tele glan tute un mukenn o tchilatchepen, koleske tu len dal,

³⁶palle shun tu an o bolepen, un le ko tselo tchilatchepen krik, hoi jon un lengre raja kran. Sike lenge tiro latcho drom, te nai nashenn le ap leste! Un palle de len pale o brishin ap ko them, hoi tu lenge dal, te well lo lengro.

³⁷Nai well i bari bok pral kau them, ninna i djungelo nasslepen, i tsiro, kai dell kek brishin, i nasslepen ap o djob, bud stepangre un kirme, kai chan o tselo senlepen, lurde, kai wenn dran wawar themma un tchiwenn pen trul i forja un pandenn len dren — hawi bibacht un nasslepen ninna wella,

³⁸koon palle peskro tselo djijeha tutar mangella, nai well jek, nai wenn budeder, nai well o tselo Israel, un an peskro djijeskri duk rikrell lo peskre wasta ap kai rig, kai kau kheer hi,

³⁹palle shun tu, kai djiweh an o bolepen. Biste leskri doosh un ab ap leskri rig! De hakeneste pal kowa, har job djiwas. Tu prindjreh hakeneskre dromma, un tu kokres dikeh hakeneske an o dji.

⁴⁰Palle rikrenn le penge tut glan i jaka hako tsiro, jaake rah har jon an kau them djiwenn, hoi tu mare phurende dal.

⁴¹Ninna i menshe dran wawar themma, kai gar tire menshendar Israel hi, shunenn, har baro tu hal, un hawo baro sorelo koowa tu kral tire menshenge. Kanna, te well jek lendar dran i dur them, te mangell lo tut an kate an kau kheer,

⁴²

⁴³palle shun tu, kai djiweh an bolepen, un kre halauter, hoi ko wi-themari tutar mangell, te nai haiwenn i menshe an i tsele themma ap kai phub, koon tu hal, un mangenn tut an, jaake har tire menshe Israel. Palle djinenn le, kai tu djiweh an kau kheer, hoi tuke krom.

⁴⁴An ko tsiro, kai bitchreh tu tire menshen an i kurepen wawar menshentsa, un tire menshe mangenn tut, o baro Debles, te wess ap lengri rig, un rissrenn pen koi pashel kote, kai kau foro hi, hoi tu win rodal, un kai kau kheer hi, hoi tuke krom,

⁴⁵palle shun lengro mangepen! Awa, tu an o bolepen, shun un le lengro koowa an tiro wast!

⁴⁶Tu djineh, kai kek mensho djudjo hi an peskro dji un an peskro djipen glan tute. Doleske nai well, kai mukenn tire menshe tiro drom, un tu choireh tut pral lende un mukeh len an o wast wawar menshendar te well, te anenn jon len pandles an pengro them — kowa nai well dur oder gar jaake dur.

⁴⁷Un te lenn tire menshe les penge ap o dji an ko wawar them, kai jon pandle hi, un jon kamenn pale tiro drom te djal un mangenn pen tele glan tute un penenna: “Mer anam doosh ap mende un kram tchilatchepen un mukam tiro drom.”

⁴⁸Te wenn le pash tute pale pengro tselo djijeha un lengro tselo djipah, an ko them, kai jon pandle hi, un denn gole ap tute un rissrenn pen koi pashel ap koi rig, kai lengro them hi, kai tu dal lengre phurende, un kai ko foro hi, hoi tu tuke win rodal, un ko kheer, kai me mukom tuke te krell,

⁴⁹palle shun lengro mangepen! An o bolepen, kai tu djiweh, shun ap lende un le lengro koowa an tiro wast!

⁵⁰Un biste ko tchilatchepen, hoi jon ap tute kran, lengri tseli doosh, hoi anas len tiro dromestar tele. Kre, te wenn un dikenn kolla latches ap lende, kai len pandles rikrenn.

⁵¹Jon hi tire menshe, kai tu tuke wi-rodal, un win anal dran o them Egiptia, har dran an i bob, kai bud jag dren hi.

⁵²Baro Dewel, maro rai, dik hako tsiro latches ap tire menshende Israel un ap lengro baro rai, un shun lengro mangepen hako tsiro, kai mangenn le tut, te wess ap lengri rig! Tu rodal len win dran hake natsjone, te wenn le tire menshe, jaake har rakral dran o mui o Mosestar, koles tiro tchatcho wast his, an ko tsiro, kai anal mare phuren dran o them Egiptia.

⁵³

⁵⁴Un har o Salomo o baro Deblestar jaake mangas, his lo tchiddo ap peskre tchanga glan o Debleskri chatchepaskri un rikras peskre wasta an o bolepen. Har job halauter penas, hoi job kamas te penell, stas lo pre un las ninna peskre wasta pale tele.

⁵⁵Un rissras pes pash i menshende un rakras o Debleskri bacht win pral i tsele menshende an Israel, un penas bari goljah:

⁵⁶Sharedo well o baro Dewel! Job das peskre menshende i kotar phub, kai mer nai djiwah kek darjah, jaake har job kowa penas. Leskre tsele latche laba rikras job, har job penas menge dran o mui o Mosestar, koles leskro tchatcho wast his.

⁵⁷Mu atchell maro baro Dewel mentsa, jaake har job mare phurentsa his, te atchell lo pash mende un mukell men gar kokres!

⁵⁸Mu tserdell lo mare djia pash peste, te nai djas ap leskro drom, un te rikras leskre laba, un kras, hoi job mendar kamell, un djiwas pal leskre tchatchepaskre laba, hoi job mare phurende das.

⁵⁹Mu wenn kal laba un hoi lestar mangom, maro baro Debleske an o shero, ap o diwes un an i rati, te dell lo men tchatchepen hako tsiro, man, kai leskro budepaskro hom, un ninna leskre tsele menshende Israel.

⁶⁰Palle nai dikenn i menshe an i tsele wawar themma ap kai phub, kai o baro Dewel o tchatcho Dewel hi, job un kek wawar.

⁶¹Un tumer, atchenn tumaro tselo djijeha pash maro baro Debleste, un krenn, hoi job tumendar kamell, un rikrenn leskre laba, har tumer kau diwes krenn.

⁶²Un o baro rai un i tsele Israelitarja anan viechen o baro Debleske.

⁶³Un o Salomo mukas 22.000 (biish-te-dui-serja) grumjen un 120.000 (sheel-te-biish-serja) bakre te marell, te chan le len khetne glan o baro Debleste[27]. Jaake dan le o kheer o baro Debleste, te well les leskro kheer. Kowa kras o rai Salomo khetne i tsele Israelitarja.

⁶⁴Koi sasterni chatchepaskri his gar bares doha, te chatchrenn le kowa, hoi o Debleske dino was. Doleske las o baro rai Salomo ap ko diwes ninna o mashkralstuno kotar ap i platsa glan o Debleskro kheer chatchepaske. Kote mukas lo sawe viechen te chatchrell, hoi wan tseles o Debleske chatchedo, ninna jarro un ko thulepen kol viechendar, hoi chan le glan o baro Debleste.

⁶⁵Un ap ko tsiro his kol bare diwessa, kai djiwenn i Israelitarja an patjengre khera. Un o Salomo khetne kol tsele Israelentsa rikran kol bare diwessa. His bud menshe kote khetne dran o tselo them, fun Lebo-Hamat bis pash koi tala mank Israel un Egiptia. Efta diwessa his le khetne glan maro baro Debleste, un koi pal pale efta diwessa. Kolla his khetne deesh-te-star diwessa.

⁶⁶Un o wawar diwes mukas o Salomo i menshen khere te djal. Un jon parkran pen pash leste un djan bachteles khere. Lengro dji giwas pral ko tselo latchepen, hoi kras o baro Dewel ap leskro budepaskro, o Davideste, un ap peskre menshende Israel.