Read O Debleskro Drom - I Bibla an o Romano Rakepen 2021 2. Rajengro liil 1 Bible Online

2. Rajengro liil 1 - O Debleskro Drom - I Bibla an o Romano Rakepen 2021 bible

2. Rajengro liil 1

¹Har o baro rai Ahab mulo his, kaman i menshe an o them Moab buder gar, te well o Israel o rai pral lende, un peran lestar tele.

²Ko baro rai, kai pal o Ahab was, his o Ahasja. His i diwes, har his lo an peskri pralstuni isema an o foro Samaria, koi peras lo tele dran i wochni un dukras pes. Un job bitchras murshen an o foro Ekron un penas ap lende: “Djan koi un putchenn o deblestar Baal-Sebub, — kowa hi o dewel o forestar Ekron: Wau me pale sasto?”

³Koi penas o baro Debleskro bolepaskro ap o Elija, — kowa his dran Tishbe: “Dja pash kol bitchepangre o baro rajestar dran Samaria, un pen ap lende: ‘Hi kai kek Dewel an Israel? Hoske djan tumer, te putchenn kol deblestar dran Ekron, o Baal-Sebub?

⁴Doleske penell o baro Dewel: Tu weh gar buder tiro tchiben tele, kai tut pre tchiwal. Tchatchepah tu mereh.’” Un o Elija djas kote.

⁵Un har kol bitchepangre pale pash o baro rajeste wan, putchas job: “Hoske wan tumer pale?”

⁶Jon penan ap leste: “Koi was i mursh pash mende, har mer ap o drom hams, un penas ap mende: ‘Djan pale pash o baro rajeste, kai bitchras tumen, un penenn ap leste: Kowa penell o baro Dewel: Hi kai kek Dewel an Israel? Hoske bitchreh murshen pash o Baal-Sebub, ko dewel pral Ekron, te putchess lestar? Doleske weh tu gar buder tiro tchiben tele, kai tu pre tchiddo hal. Tchatchepah tu mereh.’”

⁷Job putchas lendar: “Har dikas ko mursh win, koles dikan ap o drom, un ko tumenge kowa penas?”

⁸Jon penan ap leste: “Les his i plaashka ap leste dran viechengro bal. Un i ledertikro pereskri dori his trul leste pandlo.” Koi penas job: “Kowa hi o Elija dran Tishbe.”

⁹Un o baro rai bitchras pash o Elija i pralstuno lurdes. Koles his penepaske pral paash-sheel lurdende. Un kol paash-sheel las job peha. Har kolla pash o Elija wan, his kowa ap i berga beshdo. Ko pralstuno lurdo penas ap leste: “Debleskro mursh, o baro rai penell, te wess koi pral tele.”

¹⁰O Elija penas ap ko pralstuno lurdeste: “Te hom me i Debleskro mursh, jaake mu perell jag dran o bolepen un chal tut un tire paash-sheel lurden pre.” Koi peras jag dran o bolepen un chas les un kol paash-sheel murshen pre.

¹¹Un o baro rai bitchras pale i wawar pralstuno lurdes pash leste, kai his les penepaske pral paash-sheel lurdende. Un kol paash-sheel las job peha. Un kowa was pash leste un penas: “Debleskro mursh, o baro rai penell: ‘Am sik pral tele!’”

¹²O Elija penas: “Te hom me i Debleskro mursh, jaake mu perell jag dran o bolepen un chal tut un tire paash-sheel lurden pre.” Koi peras o Debleskri jag dran o bolepen un chas les un kol paash-sheel murshen pre.

¹³Koi bitchras o baro rai pale o triinto kopo i pralstuno lurdes, kai his les penepaske pral paash-sheel lurdende. Un kolla wan leha. Har kowa pash o Elija was, djas job glan o Elija ap peskre tchanga, mangas lestar peskro djipen un penas: “Debleskro mursh, muk te well miro djipen kutch glan tire jaka, ninna o djipen kal paash-sheel murshendar.

¹⁴Tu djineh, jag peras dran o bolepen un chatchras kol dui pralstunen pre pengre lurdentsa, kai wan glan mande pash tute. Kanna muk man ap o djipen, te djal mange gar har lenge!”

¹⁵Koi penas o baro Debleskro bolepaskro ap o Elija: “Dja leha tele, un ma traash!” Un job djas leha tele pash o baro rajeste,

¹⁶un penas ap leste: “Kowa penas o baro Dewel: Tu bitchral bitchepangren pash o Baal-Sebub, ko dewel an Ekron, te putchess lestar i lab, har te wals kek Dewel an Israel, kai nai putcheh i lab. Doleske weh tu gar buder tiro tchiben tele, kai tu pre tchiddo hal. Tchatchepah tu mereh.”

¹⁷Un o Ahasja meras. Kowa was jaake har o baro Dewel rakras, un o Elija ap o Ahasja penas. Les his kek tchawo. Doleske was pal leste leskro phraal, o Joram, o baro rai. Leskro dad his o Josafat. An ko tsiro his o Joram an o duito bersh baro rai pral o them Juda.

¹⁸Ko wawar koowa, hoi o Ahasja lauter kras, kowa hi tchinlo an i familjakro liil i bare rajendar pral o Israel.