Read O Debleskro Drom - I Bibla an o Romano Rakepen 2021 2. Rajengro liil 18 Bible Online

2. Rajengro liil 18 - O Debleskro Drom - I Bibla an o Romano Rakepen 2021 bible

2. Rajengro liil 18

¹O Hoshea, koleskro dad o Ela his, his an o triinto bersh o baro rai pral o them Israel, har was o Hiskija o baro rai pral o them Juda. Leskro dad his o Ahas.

²O Hiskija his 25 (biish-te-pantch) bersh phuro, har lo baro rai was; un 29 (biish-te-enja) bersha his lo baro rai un djiwas an kau tsiro an o foro Jerusalem. Leskri dai kharas Abi, lakro dad his o Secharja.

³Un job kras, hoi glan o baro Debleskre jaka mishto hi, har leskro phuro dad, o David, ninna kras.

⁴O Hiskija kras kol mulne platse[12] paash, kai le i mule deblen an-mangan. Job mukas kol bare barra an kotja te phagell, hoi le lenge pre-tchiwan, un mukas koi kashteni debletsa Ashera trujel te dell. Un job das ko sasterno sap paash, hoi mukas o Mose te krell. Glan ko tsiro, kai o Hiskija kowa kras, chatchran i Israelitarja sungepaskro koowa glan ko sap, un dan leste ko lab Nehushtan.

⁵O Hiskija patsas o baro Debleske, kai o Israeleskro Dewel hi. Mank i tsele bare rajende pral o them Juda his kek, kai patsas jaake soreles o baro Debleske har o Hiskija, kek kai glan leste baro rai his, un witar kek kai pal leste baro rai was.

⁶Job rikras pes ap o baro Debleste un mukas lestar gar tele, un rikras pes ap leskre tsele laba, kai o baro Dewel o Moseske penas.

⁷O baro Dewel his leha, un halauter hoi lo peske glan las, djas leske mishto. Un job peras tele o baro rajestar pral o them Assur, un mukas koles buder gar peskro rai te well.

⁸O Hiskija kuras pes ninna i menshentsa dran o them Filistia un las len palla bis pash Gaza un ko them trujel. Un las i tikne gaba un i sorele forja dren.

⁹O Hiskija his an o starto bersh o baro rai pral o them Juda, — ko his ko eftato bersh, kai o Hoshea o baro rai pral Israel his. Koleskro dad his o Ela. Koi djas o baro rai pral o them Assur, o Salmanassar, peskre lurdentsa pral an Israel un tchiwas pes trul o foro Samaria un pandas o fores dren.

¹⁰Un pal triin bersh las lo ko foro peske dren. Kowa his an o shobto bersh, kai o Hiskija o baro rai his, un an o enjato bersh, kai o Hoshea o baro rai pral Israel his.

¹¹Un o baro rai pral o them Assur mukas i menshen dran Israel krik te anell an o them Assur, un mukas len te djiwell an o them Halach un pash o pani Habor an o them Gosan, un an i forja, kai i Medarja djiwenn.

¹²Kowa lauter was pral i Israelitarja doleske, kai jon gar shunan ap i laba lengro baro Deblestar, un rikran pen gar ap kowa, hoi job lentsa win kras; un ap halauter, hoi o Mose, o baro Debleskro budepaskro lenge penas, jon shunan gar koi pre, un djiwan gar koi pal.

¹³O Hiskija his an o 14. (deesh-te-starto) bersh baro rai pral o them Juda, koi djas o baro rai pral o them Assur, o Sanherib, an o them Juda un las i tsele sorele forja peske dren. Kote bitchras o Hiskija murshen pash o baro rajeste pral o them Assur. Kowa his an o foro Lakish, un mukas leske te penell: “Me anom doosh pral mande. Dja mandar krik! Hoi tu mandar kameh, ko kamau te plaissrell.” Kote mangas o Sanherib lestar triin-sheel zentnarja rup un trijanda zentnarja sonakai.

¹⁵Jaake das leste o Hiskija ko tselo rup, hoi hatsas pes an o baro Debleskro kheer un an o baro rajeskro kheer.

¹⁶An ko tsiro phagas o Hiskija ninna o sonakai tele i wudjendar an o baro Debleskro kheer, hoi mukas lo glan i tsiro pre te krell, un das les o baro rajestar pral o them Assur.

¹⁷Un o baro rai pral o them Assur bitchras peskre triin pralstune murshen pash o Hiskija: o Tartan, o Rabsaris un o Rabshake. Kolla djan bud lurdentsa dran o foro Lakish pre an o foro Jerusalem. Un har le koi wan, atchan le pral tardo pash o panjeskro drom, kai nashell o pani an o foro Jerusalem. Kowa hi pash koi platsa, kai i djuwja pengre koola thowenna.

¹⁸Kote mukan le o baro rajes te kharell. Un o Hiskija bitchras pash lende triin murshen: o pralstunes pral peskro kheer, o Eljakim, leskro dad hi o Hilkija, un o Shebna, kowa kai tchinell i lila, un o moskro Joach, koleskro dad o Asaf hi.

¹⁹Un jek kol triin pralstunendar dran o them Assur penas ap lende: “Penenn tumaro rajeske Hiskija: Jaake rakrell o baro rai, ko rai pral o them Assur: Har nai patseh, te hals soreles doha te kuress tut mantsa?

²⁰Patseh tchatchepah, tire labentsa nai weh o gosweder un o sorleder an i kurepen? Ap koneste dikeh, te well lo tuke ap i rig, kai peral mandar tele un hadal tut pral mande?

²¹Patseh, te well o them Egiptia tuke ap i rig? Kowa wals, har te lals tu i shilftikro khass an o wast, te rikress tut soreles ap leste. Ko shilftikro khass phagals un dals tut an o wast tchurje. Jaake hi o Farao, ko rai pral o them Egiptia lauterenge, kai leske patsenna.

²²Kamenn tumer mange te penell: ‘Maro baro Dewel well menge ap i rig!’ Bistran tumer, kai job kowa hi, koleskre mangepaskre platse o Hiskija krik las, ninna leskre chatchepangre[13]? Un o Hiskija mukas i menshenge an o them Juda un an o foro Jerusalem te penell: ‘Kokres glan koi chatchepaskri, kai an o foro Jerusalem tardo hi, hunte witsrenn tumen tele.’

²³Un kanna krau tuha win an o lab miro rajestar, ko baro rajestar pral o them Assur: Me kamau tuke 2.000 (dui serja) graja te dell, te nai hatseh 2.000 mursha, kai klissenn[14] len?

²⁴Har kameh tu jek kol tikneder lurdendar miro rajestar pale te tradell. Tu rikreh tut kokres ap i Egiptarja un patseh, te bitchrenn le tuke kurepangre wurdja un klissepangre.

²⁵Patseh, kai djoms me kokres mandar kai pral, te marap halauteren, kai kate djiwenn? Na-a, o baro Dewel penas les mange: Dja pral an kau them un mare halauteren!”

²⁶Kote penas o Eljakim, koleskro dad o Hilkija hi, un o Shebna un o Joach ap ko pralstuneste, kai pash lende bitchedo was: “Mo rai, rake mentsa aramtikes! Mer nai haiwah ko rakepen. Un ma rake mentsa hebretikes, te shunenn kowa i menshe gar, kai kate ap i massuri[15] tarde hi.”

²⁷O pralstuno penas ap lende: “Bitchras man miro rai kokres pash tiro rajeste un pash tute koi, te rakrap kal laba? Na-a, ninna pash i murshende, kai ap i massuri tarde hi, bitchras lo man, te chan le tumentsa khetne pengro ful un pijenn pengro mutepen.”

²⁸Un ko pralstuno djas glan un das gole an o hebretikro rakepen: “Shunenn ko lab o baro rajestar, ko rajestar pral o them Assur!

²⁹Jaake rakras o baro rai: Ma mukenn tumen o Hiskijestar te chochell! Les hi gar koi soor, te lell lo tumen win dran miro wast.

³⁰Ma mukenn tumen dren te rakrell, te dikenn ap o baro Debleste! Te penell o Hiskija tumenge: ‘O baro Dewel kurell pes menge un tserdell men kote win, un kau foro well gar dino an o wast o baro rajestar pral o them Assur’, ma patsenn kowa!

³¹Ma shunenn ap o Hiskija! Shunenn ap mande: O rai pral o them Assur penell tumenge: Was men khetne mala, un awenn pash mande win! Palle nai chal hakeno peskre molengre drake un faige peskre rukendar, un nai pijell peskro pani dran peskri brunna,

³²bis te me wau un lau tumen mantsa, un anau tumen an i wawar them, hoi hi jaake har tumaro them. An ko them hi doha djob, mool, maro, drakengre ruka, djeteskre ruka un gwin. Palle nai atchenn djides un hunte merenn gar. Shunenn gar ap o Hiskija! Job chochell tumen, te penell lo ap tumende: ‘O baro Dewel lell men dran lengre wasta win.’

³³Nai lan i debla wawar themendar pengre menshen win dran o wast o baro rajestar pral o them Assur?

³⁴Kai hi kanna kol debla dran i forja Hamat un Arpad? Kai hi kanna i debla dran i forja Sefarwajim, Hena un Awa? Kai hi kanna i debla dran Samaria? Lan le Samaria win dran miro wast?

³⁵Kai hi jek dewel mank i tsele debla an i wawar themma, kai peskro them dran mire wasta nai win tserdell? Patsenn tchatchepah, te nai tserdell kokres o baro Dewel o foro Jerusalem win dran miro wast?”

³⁶Un i menshe shunan, har lengro baro rai penas “Ma penenn tchomone!” Un atchan pokones, un penan kek lab.

³⁷Un kol triin pralstune, kolen o Hiskija bitchras, o Eljakim, ko pralstuno pral leskro kheer, koleskro dad o Hilkija hi, un o Shebna, kai tchinas i lila, un o moskro Joach, koleskro dad o Asaf hi, jon kran pengre koola paash i dukatar un djan pash o Hiskija un penan leske kol laba, kai ko pralstuno dran o them Assur ap lende penas.