Read O Debleskro Drom - I Bibla an o Romano Rakepen 2021 2. Rajengro liil 2 Bible Online

2. Rajengro liil 2 - O Debleskro Drom - I Bibla an o Romano Rakepen 2021 bible

2. Rajengro liil 2

¹O diwes was, kai kamas o baro Dewel o Elijas an i sorelo phurdepen an o bolepen te lell. O Elija un o Elisa djan dran Gilgal krik.

²Un o Elija penas ap o Elisa: “Atch tu kai, o baro Dewel bitchras man an o foro Betel.” O Elisa penas: “Me dau man sowel pash o djido Debleste. Jaake har tchatcho hi, kai tu djiweh, me mukau tut gar kokres.” Un har jon an Betel wan,

³djan o Debleskre rakepangre, kai kote djiwan, win pash o Elisa, un penan ap leste: “Djineh tu ninna, kai o baro Dewel kau diwes tiro rajes tutar krik lella?” Koi penas job: “Kowa djinau me. Atchenn!”

⁴Un o Elija penas ap leste: “Elisa, atch tu kai, man bitchras o baro Dewel, te djap an Jericho.” Job penas: “Me dau man sowel pash o djido Debleste. Jaake har tchatcho hi, kai tu djiweh, me mukau tut gar kokres.” Un har jon an Jericho wan,

⁵wan kol Debleskre rakepangre, kai kote djiwan, win pash o Elisa, un penan ap leste: “Djineh tu ninna, kai o baro Dewel kau diwes tiro rajes tutar krik lella?” Koi penas job: “Kowa djinau me. Atchenn!”

⁶Un o Elija penas ap leste: “Atch tu kai, man bitchras o baro Dewel pash o pani Jordan.” Koi penas job: “Me dau man sowel pash o djido Debleste. Jaake har tchatcho hi, kai tu djiweh, me mukau tut gar kokres.” Un kol dui djan ko drom khetne.

⁷Har his le pash o Jordan tardo, wan paash-sheel Debleskre rakepangre koi un atchenn i kotar dur krik tardo.

⁸Koi las o Elija peskri plaashka, tchiwas lat khetne un das koi peha ap o pani. Koi djas o pani ap dui rigja, jaake kai kol dui ap truk phub wergel djan.

⁹Un har jon wergel wan, penas o Elija ap o Elisa: “Mang mandar, hoi krap tuke, glan te wau tutar krik lino!” O Elisa penas: “De man dui kotja tiri Debleskri sorjatar.”

¹⁰O Elija penas: “Tu mangal pharo koowa. Te dikeh tu, har me krik lino wau, leh tu kowa. Te dikeh man gar, leh tu kowa gar.”

¹¹Un har jon jaake djan un khetne rakran, koi was i jagakro wurdin i grajentsa dran jag un djas mank lende. Un i phurdepen hidjras o Elija an o bolepen.

¹²O Elisa dikas kowa un das gole: “Miro dad, miro dad, tu baro kurepaskro i Israelenge!” Un dikas les gar buder. Koi tapras job peskre koola un phagas len an dui kotja,

¹³un hadas o Elijeskri plaashka pre, hoi peras lestar tele, djas pale pale pash o Jordan,

¹⁴un las koi plaashka, das ap o pani un penas: “Kai hi kanna o baro Dewel, ko Dewel, koleske o Elija budras?” Un das ap o pani. Koi djas o pani ap dui rigja, un o Elisa djas ap i wawar rig.

¹⁵Un har dikan kowa kol Debleskre rakepangre, kai ap i wawar rig pash Jericho his, penan jon: “Koi soor o Elijestar hi ap o Elisa tchiddo.” Un jon djan pash leste un peran glan leste tele ap i phub.

¹⁶Un penan ap leste: “Mer ham tire budepangre. Mashkral mende hi paash-sheel sorele mursha. Kolen muk te djal, te rodenn le tiro rajes. Kowa nai was jaake, kai las o baro Debleskro ducho les un witsras les ap i berga oder an i tala.” Koi penas job: “Na-a, mukenn len gar te djal!”

¹⁷Jon rakran i sorjah ap leste dren, bis te job palla das un penas: “Muk len koi te djal!” Un jon bitchran kol paash-sheel murshen koi. Un kolla rodan triin diwessa pal o Elija, un hatsan les gar.

¹⁸Un jon wan pale an o foro Jericho, kai o Elisa gomme his. Un job penas ap lende: “Penom me tumenge gar, te djan gar koi?”

¹⁹Un kol mursha an ko foro Jericho penan ap o Elisa: “Maro rai, tu dikeh, an kau foro djiwah nai mishto. Kokres o pani hi gar mishto, un krell, te wenn i tchawe mules boldo.”[1]

²⁰Koi penas job: “Anenn mange i newo tcharo un tchiwenn loon dren!” Un jon anan leske kowa.

²¹Koi djas job win pash ko pani, tchiwas ko loon dren un penas: “Jaake penell o baro Dewel: ‘Me krom ko pani djudjo, un kek merell buder koi pre un kek tchawe wenn buder mules bolde.’”

²²Jaake was ko pani djudjo bis kau diwes, jaake har o Elisa kowa penas.

²³Un job djas pre an o pralstuno them pash Betel. Koi wan tikne mursh tchawe dran ko foro, san pral leste un dan ap leste gole: “Nango shero, am kai pral, nango shero am pral!”

²⁴Job rissras pes trujel, un har job len dikas, praassas job len an o baro Debleskro lab. Koi wan dui bere[2] dran o weesh un dandran star-deesh-te-dui kol mursh tchawendar an kotja.

²⁵Kotar djas job dureder un was ap koi berga Karmel. Palle djas lo pale pale an o foro Samaria.