Read O Debleskro Drom - I Bibla an o Romano Rakepen 2021 2. Rajengro liil 22 Bible Online

2. Rajengro liil 22 - O Debleskro Drom - I Bibla an o Romano Rakepen 2021 bible

2. Rajengro liil 22

¹O Josia his ochta bersha, har was lo baro rai; un job his 31 (trijanda-te-jek) bersha baro rai an o foro Jerusalem. Leskri dai kharas Jedida, lakro dad his o Adaja dran Bozkat.

²Un job kras, hoi mishto hi glan o baro Debleskre jaka, un djas o drom, kai leskro phuro dad o David ninna djas, un peras gar kau dromestar tele, gar ap i tchatchi rig un witar gar ap i serwi rig.

³Un har o Josia an o deesh-te-ochtato bersh baro rai his, bitchras lo o Shafan, kai i lila tchinas, an o baro Debleskro kheer. O Shafaneskro dad his o Azalja un leskro papo his o Meshullam. Un o Josia penas:

⁴“Dja pral pash o baro rashajeste o Hilkija, te dikell lo palla, har bud kol lowe hi, hoi an o baro Debleskro kheer anlo was, hoi kol mursha, kai ap o wudar garda denna, i menshendar dren lan.

⁵Un o rashai mu dell kol lowe kol murshenge an o wast, kai pral i budepangre tardo hi, kai ap o baro Debleskro kheer budrenna, te krenn le kowa pale newes, hoi ap o kheer paash djas.

⁶Kal lowentsa hunte wenn kol mursha plaissedo, kai budrenn o kashteha, ninna kolla, kai tchiwenn i barra pre. Ninna kasht un tchinle barra wenna dre-ginlo kol lowentsa.

⁷Kol pralstune budepangre krenn pengri budi an o tchatchepen. Doleske hunte putchell o rashai lendar gar, hoi le kol tsele lowentsa kran.”

⁸Har o Shafan kowa lauter o baro rashajeha Hilkija rakras, penas kowa ap leste: “Me hatsom i liil an o baro Debleskro kheer, kai menge o Debleskro drom siklo wella.” Un o Hilkija das ko liil o Shafaneste, un kowa draweras les.

⁹Un djas pash o baro rajeste un penas leske, har halauter djas, un penas: “Tire budepangre, i rashaja, lan kol tsele lowe win, hoi an o baro Debleskro kheer his, un dan len kol murshenge ap o wast, kai pral kolende hi, kai budrenna an o baro Debleskro kheer.”

¹⁰O Shafan penas o baro rajeske ninna: “O rashai Hilkija das man i liil.” Un o Shafan draweras ko liil glan o baro rajeste.

¹¹Jaake was, har o baro rai i laba dran ko liil shunas, kras lo peskre koola paash, kai ap leste his.

¹²Un o baro rai kharas kol murshen khetne: o rashai Hilkija, o Ahikam, ko his i tchawo o Shafanestar, o Achbor, koleskro dad o Mikaja hi, o Shafan, kai tchinas i lila, un o Asaja, ko his i pralstuno an o baro rajeskro kheer. Un o baro rai penas lenge:

¹³“Djan koi un putchenn o baro Debles mange un i menshenge an o them Juda, pral kol laba an ko liil, hoi hatslo was. Mare phure shunan gar ap kol laba, hoi kote tardo hi, un djiwan gar jaake, har kote tele tchinlo hi. Doleske hi o baro Debleskri choli bares ap mende tchiddo.”

¹⁴Kote djan o rashai Hilkija, o Ahikam, o Achbor, o Shafan un o Asaja pash i Debleskri rakepaskretsa Hulda. Koja djiwas an o newo kotar o forestar Jerusalem. Lakro rom his o Shallum. Leskro dad his o Tikwa. Koleskro dad his o Harha. O Shallum das garda ap o ripjengro kheer. Un kol mursha rakran lah.

¹⁵Joi penas ap lende: Kawa penell o baro Dewel, ko Dewel pral o Israel: Penenn ko mursheske, kai tumen pash mande bitchras:

¹⁶Kawa penell o baro Dewel: “Me anau tchilatchepen pral kau foro un pral i menshende, kai kate djiwenn. Ko tselo koowa, hoi an ko liil tardo hi, un hoi mukas peske o baro rai pral Juda glan te drawerell, anau pral tumende.

¹⁷I menshe an Jerusalem mukan man un anan wawar deblenge viechen, te choirenn le man halautereha, hoi le pengre wastentsa kran; doleske well miri choli har i jag ap kau foro, un kek nai krell les win.”

¹⁸Ko baro rajeske pral o them Juda, kowa kai tumen pash mande bitchras, te putchenn o baro Debles, nai penenn: Kawa penell o baro Dewel, ko Dewel pral o Israel: “Tu shunal kol laba an kau liil.

¹⁹Un kral tiro dji lenge pre. Un kral tut tiknes glan o baro Debleste, har tu shunal, hoi me penom pral kau foro un kol menshende, kai kate djiwenna, te djal lenge jaake djungeles, te atchell wawar menshenge o rakepen krik i trashatar. Un kowa, kai kamell te well i bibacht pral i wawareste, penella: ‘Tuke te djal, har djas o foreske Jerusalem!’ Har tu kowa shunal, kral tire koola paash, kai ap tute his, un rowal glan mande. Doleske shunom me tut ninna”, penell o baro Dewel.

²⁰“Un anau kai bibacht gar pral kau foro jaake rah har tu djiweh. Tu dikeh lat gar tire jakentsa. Me mukau tut an o latchepen te merell. Un tu weh paskedo an o mulengro kheer tire phurendar.” Un kol mursha penan kal laba o baro rajeske.