Read O Debleskro Drom - I Bibla an o Romano Rakepen 2021 2. Rajengro liil 4 Bible Online

2. Rajengro liil 4 - O Debleskro Drom - I Bibla an o Romano Rakepen 2021 bible

2. Rajengro liil 4

¹Kote his i djuwel, kolakro rom his i Debleskro rakepaskro. Koja das pal o Elisa gole un penas: “Tiro budepaskro, miro rom, meras. Un tu djineh, kai lo ap o baro Debleskro drom djas. Un kanna well ko mursh, kai miro romes sijaan hi pash leste, un kamell mire dui tchawen te lell, te wenn le leskre ginle budepangre.”

²O Elisa penas ap late: “Hoi krap me tuke? Pen mange, hoi hi tut an o kheer!” Joi penas: “Man hi tchi har i khoro djet.”

³Job penas: “Dja pash kolende, kai djiwenn trul tute, un le khore lendar, kai tchi dren hi! Le jaake bud khore har nai leh!

⁴Un dja an o kheer, un klide o wudar tele pal tute un tire tchawende! Un tchore djet an kol tsele khore! Un te kral tu len pherdo, tchip len ap i rig!”

⁵Joi djas koi, un kras kowa jaake, un klidewas o wudar tele pal peste un lakre tchawende. Kolla anan lake kol khore, un joi tchoras djet dren.

⁶Un har kol khore pherdo his, penas joi ap peskro tchaweste: “An mange i wawar khoro!” Job penas: “Hi kek khoro buder koi.” Koi atchas o djet tardo.

⁷Un joi djas pale pash o Elisa un penas kowa o Debleskro mursheske. Job penas: “Dja un bike ko djet un plaisse tiri sijaan ap koleste, kai patsal! Tu un tire tchawe, nai djiwenn kolestar, hoi pral atchas!”

⁸His i diwes, kai djas o Elisa an o gab Shunem. Koi his i braweli djuwel. Koja mangas lestar, te chal job pash late. Un hako kopo, har was job an ko gab, djas job pash late un chas koi.

⁹Joi penas ap peskro romeste: “Me haiwau, kai kawa mursh i Debleskro mursh hi, kai hako kopo pash mende chal, te well lo an o gab.

¹⁰Mer kras leske i tikni isema pral un tchiwah i tchiben, i chapaskri, i beshepaskri, un i momeli dren, te nai djiwell lo koi, te well job kai pash mende!”

¹¹His i diwes, kai was o Elisa pale an Shunem un djas pral an peskri isema un sowas.

¹²Pal kowa penas job ap peskro budepaskro, o Gehasi: “De koi djuwel gole!” Un har was li glan i isema,

¹³penas o Elisa ap o Gehasi: “Pen lake: ‘Tu kral tuke jaake bud budi menge. Hoi krap tuke? Kameh, te rakrap tuke pash o baro rajeste oder pash o pralstuno lurdeste?’” Joi penas: “Na-a, mange djal mishto, me djiwau kate pash mire menshende.”

¹⁴O Elisa putchas: “Krau tuke nai wawartchandes?” O Gehasi penas: “Ach, lat hi kek tchawo, un lakro rom hi phuro.”

¹⁵Job penas: “De lat gole, te well li kai!” Un har job lat gole das, was joi un his an o wudar tardo.

¹⁶Un job penas: “Wawar bersh an kau tsiro rikreh tu i tchawo an tiri mussi.” Koi penas joi: “Ach, miro rai, tu Debleskro mursh, kre mange tchi glan!”

¹⁷Un koi djuwel was an wawar koowa, un las i tchawo o wawar bersh an ko tsiro, har o Elisa kowa lake penas.

¹⁸Har ko ternepen baro his, was i diwes, kai djas job pash peskro dadeste, kai win pash i tchinepangre hi,

¹⁹un penas ap peskro dadeste: “Miro shero, miro shero!” Leskro dad penas ap peskro budepaskro: “An les pash leskri date!”

²⁰Un kowa las les un anas les dren pash leskri date. Koja beshas les ap lakre herja bis mashkral-diwes. Koi meras job.

²¹Joi djas pral un tchiwas les ap o Debleskro mursheskro tchiben, klidewas tele un djas win,

²²das peskro romes gole un penas: “Bitche mange jek budepaskro un i burika! Me djau sik pash ko Debleskro mursheste un wau sik pale.”

²³Koi penas job: “Hoske kameh tu pash leste te djal? Kai diwes hi kek ‘newo-tchon’, witar kek Debleskro diwes.” Koi penas joi: “Muk lauter jaake!”

²⁴Un joi tchiwas i ledertikri plachta ap i burika, beshas pes pre, un penas ap o budepaskro: “Kre, te djal li jaake sik har djala, un muk gar tele, bis te penau les tuke!”

²⁵Jaake djas joi pash ko Debleskro mursheste ap koi berga Karmel. Har ko Debleskro mursh dikas, kai joi was, penas job ap peskro budepaskro, o Gehasi: “Dik, koi djuwel dran Shunem hi koi.

²⁶Dja pash late un putch: Djal tuke mishto? Djal tiro romeske un tiro tchaweske mishto?” Joi penas: “Mishto!”

²⁷Har joi pash o Debleskro mursheste ap koi berga was, tapras joi leskre herja trujel. O Gehasi was, te dell lo lat i spildini[3]. Koi penas o Debleskro mursh: “Muk lat! Lake hi ropaske, un me djinau gar hoske. O baro Dewel penas mange tchi, hoi djas.”

²⁸Joi penas: “Mangom me tutar, miro rajestar i mursh tchawo, te dess tu man? Na-a, me penom tuke, te kress mange tchi glan!”

²⁹O Elisa penas ap o Gehasi: “Tchip tiro pereskri dori trul tute, un le miro lengsto kasht an tiro wast, un dja an Shunem! Te tapreh jekes ap o drom, atch gar tardo, te rakress leha! Un te kamell jek tuha te rakrell, le tuke kek tsiro leske! Un tchip miro lengsto kasht ap ko tchaweskro mui!”

³⁰“Na-a”, penas o tchaweskri dai: “Me dau man sowel glan o djido Debleste un glan tute: Me mukau tut gar kate te atchell.” Koi stas job pre un djas lake pal.

³¹O Gehasi djas glan win, un tchiwas ko lengsto kasht ap ko tchaweskro mui. Un tchi djas: kek gole un kek ducho. Koi djas job pale pash o Elisa un penas leske: “Ko tchawo djangras gar pre.”

³²Un har o Elisa an o kheer was, his ko tchawo mulo ap o tchiben tchiddo.

³³Un job djas dren, pandas o wudar pal peste, un mangas o baro Debles,

³⁴djas ap o tchiben un tchiwas pes ap ko tchaweste, tchiwas peskro mui ap leskro mui un peskre jaka ap leskre jaka un peskre wasta ap leskre wasta, un tchiwas pes jaake ap ko ternepaste, te well kowa pale tato.

³⁵Palle stas job pre, djas an o kheer kate te kote, un tchiwas pes pale ap leste. Koi nisewas ko ternepen efta kope. Koi pal kras job i jaka pre.

³⁶Un o Elisa das pal o Gehasi gole un penas: “De o tchaweskri dai gole!” Har job lat gole das, was joi dren pash o Elisa. Koi penas job: “Ake, le tiro tchawes!”

³⁷Koi was joi, witsras pes glan leskre herja tele bis ap i phub, las peskro tchawes un djas win.

³⁸Har o Elisa pale an Gilgal was, his i menshen tchi te chal an ko them. Un har kol Debleskre rakepangre glan leste beshdo his, penas job ap peskro budepaskro: “Le i bari piri un kere lenge i summi chapaske.”

³⁹Koi djas jek win ap o them, te rodell lo senlepen, un hatsas diwje kürbisse, las len tele un hidjras len an peskri plaashka, tchinas kolla an kotja un tchiwas kowa an i piri. Kek djinas, hoi kowa his.

⁴⁰Un tchiwas kowa glan kol murshende chapaske. Un har job chan, dan jon gole un penan: “Debleskro mursh, o merepen hi an i piri!” Un jon chan kowa gar.

⁴¹Job penas: “Anenn jarro!” Un job tchiwas jarro an i piri un penas: “Anenn kowa i murshende chapaske!” Koi nai chan jon kowa. Koi his o tselo chapen latcho.

⁴²Koi was i mursh dran o them Baal-Shalisha un anas ko Debleskro mursheske maro dran newo djob: biish mare, un ninna newo djob an i gono. Un o Elisa penas ap peskro budepaskro: “De kowa i menshende chapaske!”

⁴³Koi penas leskro budepaskro: “Kowa hi gar doha sheel murshenge!” O Elisa penas: “De les lenge, te chan le. O baro Dewel penell: ‘Jon chan, un atchell tchomone pral.’”

⁴⁴Un job anas lenge kowa, te chan le. Un atchas tchomone pral, jaake har o baro Dewel kowa penas.