Read O Debleskro Drom - I Bibla an o Romano Rakepen 2021 2. Rajengro liil 9 Bible Online

2. Rajengro liil 9 - O Debleskro Drom - I Bibla an o Romano Rakepen 2021 bible

2. Rajengro liil 9

¹Un o Debleskro rakepaskro, o Elisa das jekes kol terne Debleskre rakepangren gole, un penas ap leste: “Tchip i pereskri dori trul tute, un le ko khoro, kai djet dren hi, tuha, un dja an ko foro Ramot an Gilead!

²Te weh tu koi, hatseh ko murshes Jehu, koleskro dad o Josafat hi, un koleskro dad o Nimshi hi. De les win gole dran kolende, kai pash leste hi! Un dja leha an i palstuni isema!

³Le ko khoro, kai djet dren hi, tchore kowa pral leskro shero un pen: ‘Jaake penell o baro Dewel: Me makau tut kau djeteha, te wess baro rai pral o Israel.’ Koi pal kre o wudar pre un naash tuke jaake sik har djala!”

⁴Un ko terno Debleskro rakepaskro djas an o foro Ramot an o them Gilead.

⁵Un har job koi was, his kol pralstune kol lurdendar koi khetne beshdo. Un job penas: “Tu pralstuno, tuke kamau tchomone penell.” Koi putchas o Jehu: “Koneske mendar?” Kowa penas: “Tuke, pralstuno!”

⁶Koi stas job pre un djas an o kheer dren. Un o Debleskro rakepaskro tchoras ko djet ap leskro shero un penas ap leste: “Kowa penell o baro Dewel, ko Dewel pral o Israel: Me makau tut kau djeteha dren, te wess baro rai pral mire menshende, i Israelende.

⁷Un tu maress kol menshen, kai wenna tiro rajestar Ahab. Jaake dau len i phagi ko rateske, hoi ratas, har maras i Isebel mire budepangren, mire rakepangren un kol tsele wawaren, kai mange koi his.

⁸Awa, kamau, te wenn kol tsele mursha maredo, kai wenna pal o Ahab, i terne har i phure.

⁹Un me kamau, te djal i menshenge, kai wan pal o Ahab, jaake har kol menshenge, kai wan pal o Jerobeam, koleskro dad o Nebat his, un har kol menshenge, kai wan pal o Baasha, koleskro dad o Achija his.

¹⁰Un i Isebel, i djukle chan lat pre ap ko kotar them pash Jesreel un kek hunte paskrell lat.” Un har job kowa penas, kras lo o wudar pre un nashas peske.

¹¹Un har o Jehu win djas pash kol menshende leskro rajestar, putchan le lestar: “Hi tchomone? Hoske was ko dinelo pash tute?” “Tchi”, penas job. “Tumer prindjrenn kol murshes, kowa rakrell dinelo koowa.”

¹²Jon penan: “Tu chocheh men. Pen menge o tchatchepen!” Koi penas job lenge, hoi o Debleskro mursh leha rakras, un har lo penas: “Jaake penell o baro Dewel: ‘Me makom tut kau djeteha dren, te wess baro rai pral o Israel.’”

¹³Koi las sik hakeno peskri plaashka, tchiwas lat glan leste ap kol pralstune barra ko dromestar. Jon phurdan an i phurdepaskri un dan gole: “O Jehu hi baro rai!”

¹⁴Un o Jehu, koleskro dad o Josafat un koleskro papo o Nimshi hi, hadas pes pral o baro rai Joram un kamas gar, te atchell o Joram baro rai. [Glan jek tsiro djas o Joram khetne kol tsele lurdentsa dran Israel pash ko foro Ramot an Gilead, te kurell lo pes o baro rajeha pral o them Syria, o Hasael.

¹⁵An ko kurepen was o baro rai Joram ratles dino. Doleske was job pale an o foro Jesreel, te mukell lo pes sasto te krell kol dawendar, hoi kol Syrarja les dan.] Un o Jehu penas: “Te kamenn tumer pash mande rikrell, palle mukenn kekes dran o foro te nashell, te nai djal job an o foro Jesreel un penell kote, hoi kai djas.”

¹⁶Un job djas ap peskro wurdin un uleras an o foro Jesreel. Kote his o Joram tchiddo. Un o Ahasja, ko baro rai pral Juda, was tele, te djal lo pash o Joram.

¹⁷Pral ap ko turmo an Jesreel his jek tardo, kai dell jak. Kowa dikas kol kurepangre wurdja, kolentsa o Jehu was, un penas: “Me dikau lurden.” Koi penas o Joram: “Bitche i klissepaskres pash lende, te putchell job: ‘Awenn tumer an o latchepen?’”

¹⁸Un ko klissepaskro klissas koi un penas: “O baro rai putchell: ‘Awenn tumer an o latchepen?’” O Jehu penas: “Hi kowa tiro koowa? Dja pal mande un am mantsa!” Kowa, kai jak das, penas: “Ko bitchepaskro was pash lende koi un well gar pale.”

¹⁹Koi bitchras o Joram o duito klissepaskro. Har kowa pash lende was, penas job: “O baro rai putchell: ‘Awenn tumer an o latchepen?’” O Jehu penas: “Hi kowa tiro koowa? Dja pal mande un am mantsa!”

²⁰Pale penas kowa, kai jak das: “Job was pash lende un well gar pale. Un koi hi jek, kai ulerell har i diwjo, har o Jehu, koleskro dad o Nimshi hi.”

²¹Koi penas o Joram: “Tchiwenn i graja glan o wurdin!” Un jon tchiwan i graja glan leskro wurdin. Un kol dui bare raja, o Joram, ko rai pral Israel, un o Ahasja, ko rai pral Juda, uleran hakeno ap peskro wurdin pash o Jehu. Un jon tapran pen ap ko kotar them, hoi his o Nabotes dran Jesreel.

²²Har o Joram o Jehu dikas, putchas job: “Awenn tumer an o latchepen?” Koi penas lo: “Hoi — an o latchepen? Har nai wah an o latchepen jaake rah har tiri dai, i Isebel, sharell mule deblen un krell bengeskro koowa?”

²³Koi rissras pes o Joram trujel, das an i herja un das gole ap o Ahasja: “Phukepen, Ahasja!”

²⁴O Jehu tapras peskro bogo un das o Jorames mashkral i phika karje, jaake kai djas ko failo an leskro dji. Un o Joram phagas khetne an peskro wurdin.

²⁵O Jehu penas ap peskro lurdeste, o Bidkar: “Le les pre un witse les ap ko kotar them, hoi his ko murshes Nabot dran Jesreel! Mange was an o shero, hoi o baro Dewel ap o Jorameskro dad, o Ahab, penas, har uleram mer dui ap i wurdin pal leste.

²⁶O baro Dewel penas leske: ‘Me dikom har taissar o Nabot un leskre tchawe mulo dino wan. Kate ap leskro kotar them dau tut pale, hoi tu leske kral.’ Doleske penau tuke: Le les un witse les koi! Jaake well kowa, har o baro Dewel penas.”

²⁷Har o Ahasja, ko baro rai pral Juda dikas, hoi djas, nashas job pash o foro Bet-Gan. O Jehu las les palla un mukas les ninna te marell ap o wurdin. Un jon dan ap leste karje ap ko drom pash o foro Gur, kai pash o foro Jibleam tchiddo hi. Un job nashas peske an Megiddo un meras koi.

²⁸Un leskre lurde anan les an Jerusalem un paskran les an leskro mulengro kheer pash leskre phurende an o Davideskro foro.

²⁹Har o Joram, o Ahabeskro tchawo, an o deesh-te-jekto bersh baro rai pral o Israel his, was o Ahasja baro rai pral o them Juda.

³⁰Har o Jehu an o foro Jesreel was, un i Isebel kowa shunas, kras joi peskre jaka shukar un peskre balla ap o shero railes, un dikas dran i wochni win.

³¹Un har o Jehu tel ko foreskro wudar was, penas joi: “Djal mishto, tu Simri, kai peskro rajes mulo das?”

³²Job dikas pral pash i wochni un das gole: “Koon hi ap miri rig?” Koi dikan dui, triin pralstune budepangre ap leste tele.

³³“Witsrenn la tele”, penas job. Koi witsran le i Isebel tele. Un lakro rat peras ap i massuri un ap i grajende. Un job uleras pral late.

³⁴Palle djas job dren, chas un pijas. Pal o chapen penas lo: “Dikenn pal koi bibachtliate un paskrenn lat! I baro rajeskri tchai hi li.”

³⁵Har jon kote djan, te paskrenn le lat, hatsan jon latar tchi har i kokale o sherestar, i herjendar un i wastendar.

³⁶Un jon wan pale un penan kowa ap o Jehu. Koi penas job: Kowa was jaake, har mukas o baro Dewel peskro budepaskres glan-wi te penell. Job, o Elija dran Tishbe, penas: “Ap o kotar them glan Jesreel chan i djukle i Isebelakro mass.

³⁷Un joi well har viechengro ful ap o them pash Jesreel. Kek penell nai buder: Kowa hi i Isebel.”