Read O Debleskro Drom - I Bibla an o Romano Rakepen 2021 1. Familjakro liil 13 Bible Online

1. Familjakro liil 13 - O Debleskro Drom - I Bibla an o Romano Rakepen 2021 bible

1. Familjakro liil 13

¹Un o David beshas pes khetne kol pralstunentsa pral i sero lurdende un kolentsa pral sheel lurdende un kol wawar bare lurdentsa un rakras lentsa.

²Palle penas lo ap i tsele Israelitarja, kai kote his: “Te hi tumenge mishto, un latcho glan maro baro Debleskre jaka, palle bitchras mer bitchepangre pash mare phralende an i tsele kotja o themestar Israel, ninna pash i rashajende un i Levitarja, kote kai jon djiwenn. Un mer mukah lenge te penell, te wenn le pash mende khetne.

³Mer khetne kamah ko mochton, kai o Debleskre deesh laba dren hi, pale pash mende te lell. An ko tsiro, har o Saul djiwas, putcham gar pal leste.”

⁴Kote penan i tsele Israelitarja, kai kote khetne his: “Kowa hi mishto. Mer krah kowa.”

⁵Jaake mukas o David i tsele Israelitarjen khetne gole te dell, kotar, kai o pani Sihor hi an o them Egiptia, bis kotar, kai djal pash o foro Lebo-Hamat, te lenn le ko mochton o deesh labentsa o Deblestar dran o foro Kirjat-Jearim.

⁶Un o David djas i tsele Israelentsa pral an o foro Baala. Kawa hi i wawar lab o foreske Kirjat-Jearim, un hi an o them Juda tchiddo. Kote his o mochton tardo o baro Deblestar, kai beshdo hi pral i bolepangre, kai kharenna Cherubim, un kai well job an-mangedo.

⁷Un jon mukan ko mochton ap i newo wurdin dran o kheer te anell, kai o Abinadab djiwell. Un o Usa un leskro phraal djan o wurdineha un dan ap leste jak.

⁸O David un i tsele menshe an Israel khelan bachteles glan o Debleste, giwan gilja, un kran bashepen ap dorjengre bashepangre, ap pauke, ap phurdepangre un wawar bashepangre.

⁹Har wan le pash ko djobeskri platsa o murshestar Kidon, kaman i grumja win te phagell, un o Usa rikras o mochton, te perell lo gar.

¹⁰Kowa hunte krals lo gar. Job hunte tapras gar o Debleskro mochton an.[7] Koi was o baro Debleskri choli pral o Usa. Un o Dewel maras les koi. Un job meras kote glan o Debleste.

¹¹Koi was o David chojedo, kai o baro Dewel o Usaes jaake krik las. Doleske kharell koi platsa ‘Perez-Usa’[8] gomme kai diwes.

¹²Un o David trashas o Deblestar ap ko diwes, un penas: “Har nai lau me o Debleskro mochton pash mande?”

¹³Un job mukas les gar pash peste te anell an o Davideskro foro. Na-a, job mukas les an ko kheer te anell, kai djiwell o Obed-Edom. Kowa his i mursh dran o foro Gat.

¹⁴Jaake atchas o baro Debleskro mochton triin tchon an koleskro kheer. Un o baro Dewel tchiwas peskri bacht un soor ap leste un ap halauter, hoi les his.