Read O Debleskro Drom - I Bibla an o Romano Rakepen 2021 1. Familjakro liil 14 Bible Online

1. Familjakro liil 14 - O Debleskro Drom - I Bibla an o Romano Rakepen 2021 bible

1. Familjakro liil 14

¹O baro rai pral o foro Tirus, o Hiram, bitchras murshen pash o Davideste, kai anan leske zedertikro kasht, ninna budepangren, kai haiwan mishto i barrentsa un o kashteha te budrell. Kolla kran o Davideske i shukar baro kheer.

²O David haiwas, te kras o baro Dewel, te well un atchell job baro rai pral Israel. Kowa kras job peskre menshenge, i Israelenge.

³Un o David las peske budeder romja an o foro Jerusalem, Un leske wan budeder tchawe un tcha boldo.

⁴Kalla hi kol laba kol tchawendar, kai wan an o foro Jerusalem boldo: o Shamua, o Shobab, o Natan, o Salomo,

⁵o Jibhar, o Elishua, o Elpelet,

⁶o Noga, o Nefeg, o Jafia,

⁷o Elishama, o Beeljada, un o Elifelet.

⁸Har kol Filistarja shunan, kai was djet pral o Davideskro shero tchoredo, te well job baro rai pral Israel, djan jon lauter koi, te rodenn le les. Har o David kowa shunas, djas job win te kurell lo pes leha.

⁹Un i Filistarja wan, un his an koi tseli tala Refajim.

¹⁰O David putchas o baro Deblestar: “Djap me pral pash kol Filistarja? Kameh len an mire wasta te dell?” Un o baro Dewel penas ap o Davideste: “Dja pral! Me dau kol Filistarjen an tire wasta.”

¹¹Un o David was an Baal-Perazim, un kote das lo i Filistarjen, un penas: “Jaake har i sorelo pani peske i drom krell, kras mange o baro Dewel i drom mashkral kolende, kai kaman mange tchilatchepen.” Doleske kharell koi platsa “Baal-Perazim[9].”

¹²Har i Filistarja nashan penge, lan le pengre chochene deblen gar pentsa. Un o David penas, te wenn kolla chatchedo.

¹³Kol Filistarja djan pale koi pral, un his an koi tseli tala.

¹⁴Un o David putchas pale o Deblestar, un o Dewel penas ap leste: “Tu djas gar pral pal lende. Tu wess koi wawar rigjatar pral lende, koi rigjatar, kai i balsamtikre ruka tchidde hi.

¹⁵Tu te shuneh i gole, har te djal jek pral an i ruka, palle am win! Palle djal o Dewel glan tute, te marell job i Filistarengre lurden.”

¹⁶Un o David kras jaake, har o Dewel leske penas. Un jon dan kol Filistarjen un tradan len pale o tselo drom dran Gibeon bis pash o foro Geser.

¹⁷Un o David his i sharedo mursh an i tsele themma. Un o baro Dewel kras, te was i traash glan leste ap i tsele themma.