Read O Debleskro Drom - I Bibla an o Romano Rakepen 2021 1. Familjakro liil 23 Bible Online

1. Familjakro liil 23 - O Debleskro Drom - I Bibla an o Romano Rakepen 2021 bible

1. Familjakro liil 23

¹O Davides his i lengsto djipen, un his phuro, har kras lo peskro tchawes, o Salomo, o rai pral Israel.

²Un job mukas i tsele pralstunen dran Israel un i rashaja un i Levitarja khetne te well.

³Un job mukas pal te dikell, har bud mursha mank i Levitarjen his, kai hi trijanda bersha un phureder. Un kolla his khetne 38.000 (trijanda-te-ochta serja) mursha.

⁴Un kolendar las o David 24.000 (biish-te-star serja) mursha, te budrenn le ap o kheer o baro Debleske, un 6.000 (shob serja) mursha, te wenn le pralstune un tchatchepangre mursha.

⁵4.000 (star serja) mursha wan wudjengre mursha, kai hunte denn garda ap i wudja. Un 4.000 (star serja) mursha wan gipangre, kai giwenn gilja o baro Debleske, un bashrenn koi pashel ap kol bashepangre, hoi mukas o David koleske te krell.

⁶I Levitarja his i menshe, kai wan kol triin tchawendar o murshestar Levi: o Gershon, o Kohat un o Merari. Un o David tchiwas dran kol triin familja murshen khetne, te budrenn le khetne.

⁷O Gershon, leskre tchawe his: o Ladan un o Shimi.

⁸O Ladan, les his triin tchawe: o phureder his o Jehijel, palle was o Setam un o Joel.

⁹O Shimi, les his triin tchawe: o Shelomit, o Hasijel, un o Haran. Kolla his i pralstune pral i familje, kolengro phuro dad o Ladan hi.

¹⁰O Shimi, les his star tchawe: o Jahat, o Sina, o Jehush, un o Benja.

¹¹O Jahat his o phureder, un o Sisa his o duito. O Jehush un o Benja, kolen his gar bud tchawe. Doleske wan jon dikles har jek familja, kai khetne budrenn.

¹²O Kohat, les his star tchawe: o Amram, o Jizhar, o Hebron, un o Usijel.

¹³O Amram, leskre tchawe his: o Aron un o Mose. Un o Aron un leskre tchawe wan win rodedo, te wenn le rashaja hako tsireske. Jon kokres nai kran o baro Debleskri budi: nai chatchran viechen ap leskri chatchepaskri, un nai rakran o Debleskri bacht win pral i Israelitarja.

¹⁴I tchawe o Mosestar, ko Debleskro murshestar, wan pash o kheer Levi kharedo.

¹⁵Leskre tchawe his o Gershon un o Elijeser.

¹⁶O Gershon, leskro phureder tchawo his o Shubael.

¹⁷O Elijeser, les hi kokres jek tchawo, o Rechabja. Koles his bud tchawe.

¹⁸O Jizhar, leskro phureder tchawo his o Shelomit.

¹⁹O Hebron, leskro phureder tchawo his o Jerija, palle was o Amarja, o Jahasijel, un o Jekamam.

²⁰O Usijel, leskro phureder tchawo his o Micha, o duito his o Jishija.

²¹O Merari, les his dui tchawe: o Machli un o Mushi. o Machli, leskre tchawe his: o Eleasar un o Kish.

²²O Eleasar, les his kek tchawe, kokres tcha; un lengre nebude, kol tchawe lengro kakestar, o Kish, romedineran len.

²³O Mushi, les his triin tchawe: o Machli, o Eder un o Jeremot.

²⁴Kolla hi i tchawe o murshestar Levi, kai his biish bersh un phureder. Lengre laba his pre tchinlo pal lengre familjende, kolengre pralstune jon his. Jon wan win rodedo, te krenn le i budi an o baro Debleskro kheer.

²⁵Kolestar penas o David: O baro Dewel, kai o Israeleskro Dewel hi, das peskre menshen i them, kai le khere hi. Un job kamell hako tsiro an o foro Jerusalem te djiwell.

²⁶Jaake hunte hidjran i Levitarja buder gar o Debleskro plachteno kheer un halauter, hoi koi dren his, har glan kowa kerdo was.

²⁷I tsiro pal kowa, glan peskro merepen, penas o David, te wenn kol Levitarja pre tchinlo an i liil, kai hi biish bersh un phureder.

²⁸Jon te wenn o Aroneskre tchawende pash o wast, pash i budi an o baro Debleskro kheer, ap kol glanstune platse, un an i iseme. Jon hunte krenn ko tselo koowa djudjo, hoi o Debleske hi, un ninna wawar budi an o Debleskro kheer.

²⁹Lengri budi his, te dikenn le pal o Debleskre mare, pal ko latcho jarro, hoi leske chatchedo well, un pal o maro, hoi kek shutlo jarro dren hi, un pal o peklo chapen, kai djet dren hi. Ninna hunte dikenn le, kai kol barra, hoi ap waga tchiddo wenn, o tchatcho pharepen sikrenn, un kol kashta, hoi o lengstepen sikrenn, kowa tchatches krenna.

³⁰Un haki taissarla hunte wenn i Levitarja koi tardo, te giwenn le o baro Debleske gilja, un parkrenn pen pash leste. Un jaake hunte well ninna haki rati kerdo.

³¹Ninna hunte wenn le glan o baro Debleste tardo, an kol diwessa, kai marenn i rashaja o baro Debleske viechen, hoi leske tseles chatchedo wenn. Kowa his ap o Debleskro diwes, un ap ko diwes, kai o newo tchon diklo well, un ap i tsele wawar bare diwessa. Hako diwes hunte wenn jaake bud Levitarja glan o baro Debleste, har glan tchinlo hi.

³²Jaake hunte krenn jon pengri budi an o baro Debleskro plachteno kheer, un pal i tsiro an leskro baro kheer, hoi kerdo well, un hunte wenn i rashajenge ap i rig pash lengri budi an o baro Debleskro kheer. I rashaja hi lengre phrala dran o kheer Aron.