Read O Debleskro Drom - I Bibla an o Romano Rakepen 2021 1. Familjakro liil 27 Bible Online

1. Familjakro liil 27 - O Debleskro Drom - I Bibla an o Romano Rakepen 2021 bible

1. Familjakro liil 27

¹Kalla hi i mursha an Israel, kai djan o baro rajeske an o kurepen. Mank lende his familjengre pralstune, ninna lurdengre pralstune, kolla pral jek sero lurdende, un kolla pral jek sheel lurdende, ninna wawar bare lurde. Hako kopo djan 24.000 (biish-te-star-serja) lurde khetne. Jon hunte wenn jek tchon o baro rajeske koi. Hako tchon his wawar 24.000 mursha koi. Jaake djas kowa o tselo bersh.

²An o ersto tchon his o Jashobam, koleskro dad o Sabdijel his, o pralstuno pral 24.000 lurdende.

³Job was dran o kheer Perez, un his o pralstuno pral i tsele bare lurdende an o ersto tchon.

⁴An o duito tchon his o Dodai dran Ahoach o pralstuno pral 24.000 lurdende. Un o Miklot his o baro lurdo pral lende.

⁵An o triinto tchon his o Benaja, koleskro dad o baro rashai Jojada his, o pralstuno pral 24.000 lurdende.

⁶O Benaja his jek kol trijanda bareder lurdendar un o pralstuno lendar. Leskro baro lurdo his leskro tchawo Ammisabad.

⁷An o starto tchon his o Asahel, ko phraal o Joabestar, o pralstuno pral 24.000 lurdende. Un pal leste was leskro tchawo, o Sebadja, o pralstuno.

⁸An o pantchto tchon his o Shamhut dran o kheer Serach, o pralstuno pral 24.000 lurdende.

⁹An o shobto tchon his o Ira dran Tekoa, koleskro dad o Ikkesh his, o pralstuno pral 24.000 lurdende.

¹⁰An o eftato tchon his o Helez dran Pelon, dran o kheer Efrajim o pralstuno pral 24.000 lurdende.

¹¹An o ochtato tchon his o Sibbechai, dran o foro Husha dran o kheer Serach o pralstuno pral 24.000 lurdende.

¹²An o enjato tchon his o Abijeser dran o foro Anatot dran o kheer Benjamin o pralstuno pral 24.000 lurdende.

¹³An o deshto tchon his o Mahrai, dran o foro Netofa, dran o kheer Serach, o pralstuno pral 24.000 lurdende.

¹⁴An o deesh-te-jekto tchon his o Benaja dran o foro Piraton, dran o kheer Efrajim, o pralstuno pral 24.000 lurdende.

¹⁵An o deesh-te-duito tchon his o Heldai, dran o foro Netofa dran o kheer Otnijel, o pralstuno pral 24.000 lurdende.

¹⁶Kalla his i pralstune pral kol deesh-te-dui bare familje an Israel: pral i familja Ruben: o Elijeser, koleskro dad o Sichri his; pral i familja Simeon: o Shefatja, koleskro dad o Maacha his;

¹⁷pral i familja Levi: o Hashabja, koleskro dad o Kemuel his; pral i familja Aron: o Zadok;

¹⁸pral i familja Juda: o Elihu, jek o Davideskre phralendar; pral i familja Issachar: o Omri, koleskro dad o Michael his;

¹⁹pral i familja Sebulon: o Jishmaja, koleskro dad o Obadja his; pral i familja Naftali: o Jeremot, koleskro dad o Asrijel his;

²⁰pral i familja Efrajim: o Hoshea, koleskro dad o Asasja his; pral i paash familja Manasse: o Joel, koleskro dad o Pedaja his;

²¹pral i paash familja Manasse an o them Gilead: o Jiddo, koleskro dad o Secharja his; pral i familja Benjamin: o Jaasijel, koleskro dad o Abner his;

²²pral i familja Dan: o Asarel, koleskro dad o Jeroham his. Kolla hi i pralstune pral i khera Israel.

²³O David mukas gar i laba kolendar pre te tchinell, kai his terneder har biish bersha. O baro Dewel penas bud bersha glan kowa, te krell lo i Israelitarjen jaake bud har i momlia an o bolepen.

²⁴O Joab, koleskri dai i Zeruja his, kras pes ap i budi te tchinell i laba pre, un hunte mukas tele, har was o Debleskri choli doleske pral o Israel. Un jaake hi gar tchinlo an o familjakro liil o baro rajestar David, kitse mursha an o them Israel his, kai nai wenn lurde.

²⁵O pralstuno pral o rajeskro chapen his o Asmawet, koleskro dad o Adijel his. O pralstuno pral o chapen an o them, an i forja, gaba un lurdengre khera his o Jonatan, koleskro dad o Usija his.

²⁶O pralstuno pral i hachende, kai budran ap o baro rajeskri phub, his o Esri, koleskro dad o Kelub his.

²⁷O pralstuno pral i drakengre themma his o Shimi dran o foro Ramat. O pralstuno pral i mool ap i drakengre themma his o Sabdi dran o foro Shefam.

²⁸O pralstuno pral i djeteskre ruka un i faigetikre ruka an o bergetikro them his o Baal-Hanan dran o foro Geder. O pralstuno pral o djet his o Joash.

²⁹O pralstuno pral i grumjende an o them Sharon his o Shitrai, kai dran o them Sharon his. O pralstuno pral i grumjende an i telstune themma his o Shafat, koleskro dad o Adlai his.

³⁰O pralstuno pral i khamele his o Obil, ko Ismaelari. O pralstuno pral i burike his o Jechdeja dran o foro Meronot.

³¹O pralstuno pral i bakre his o Jasis, ko Hagarari. Kolla halauter his i pralstune pral o rajeskro koowa.

³²O Jonatan, o Davideskro kako, job his i gosewo un siklo mursh, kai djinas, hoi te krell. O Jehijel, koleskro dad o Hachmoni his, his pash o baro rajeskre tchawende.

³³O Ahitofel his ninna jek, kai penas o baro rajeske, hoi wals mishto te krell. O Hushai i menshendar Arki, his o baro rajeskro maal.

³⁴Har o Ahitofel meras, his dui mursha koi, kai penan o baro rajeske, hoi mishto wals te krell lo: Kolla his o Jojada, koleskro dad o Benaja his, un o Abjatar. O Joab his o pralstuno pral i lurdende.