Read O Debleskro Drom - I Bibla an o Romano Rakepen 2021 1. Familjakro liil 4 Bible Online

1. Familjakro liil 4 - O Debleskro Drom - I Bibla an o Romano Rakepen 2021 bible

1. Familjakro liil 4

¹O Juda: leskre tchawe his: o Perez, o Hezron, o Karmi, o Hur un o Shobal.

²O Shobaleskro tchawo his o Reaja. Koleskro tchawo his o Jachat. Koleskre tchawe his o Achumai un o Lahad. Kolla lauter hi i menshe dran o kheer Zora.

³O Hur his o phureder tchawo o murshestar Kaleb un leskro romjatar Efrata. Leskre tchawe kran o foro Betlehem. O Hur, les his triin tchawe: o Etam, o Penuel un o Eser. O Etam, les his triin tchawe: o Jesreel, o Jishma, o Jidbash. Un lengri pheen his i Hazlelponi. O Penuel kras o foro Gedor, un o Eser kras o foro Husha.

⁵Un o Ashhur, kowa, kai kras o foro Tekoa, koles his dui romja: i Hela un i Naara.

⁶Un i Naara anas leske o Ahussam ap i phub, ninna o Hefer un o Temni un o Ahashtari ap i phub.

⁷Un i Hela las: o Zeret, o Zohar, un o Etnan.

⁸O murshestar Koz was o Anub un o Zobeba, ninna i menshe dran o kheer Aharhel, koleskro dad o Harum his.

⁹Un o Jabez his an-dikleder har leskre phrala. Har lo boldo was, das les leskri dai ko lab Jabez[3], un penas: ‘Me anom les bud dukentsa ap i phub’.

¹⁰Un o Jabez das gole ap o Israeleskro Debleste un penas: Tchip tiri bacht ap mande, un kre miro them bareder har lo kanna hi. Ab mantsa, un rike tiro wast pral mande, te well nai kek duk pral mande! Un o Dewel mukas te well, hoi job putchas peske lestar.

¹¹Un o Kelub, koleskro phraal o Shuha his, las i tchawo. Kowa his o Mehir. Leskro tchawo his o Eshton.

¹²Koleskre tchawe his: o Bet-Rafa, un o Paseach un o Techinna. O Techinna kras o foro Nahash. Kolestar wan i mursha, kai djiwan an Reka.

¹³O Kenas, les his kal tchawe: o Otnijel un o Seraja. I tchawe o murshestar Otnijel his: o Hatat un o Meonotai.

¹⁴Un o Meonotai was o dad o murshestar Ofra. O Seraja was o dad o murshestar Joab. Job kras ko gab, hoi well kharedo: Tala kolendar, kai budrenn o kashteha. Jon his lauter latche wastengre budepangre.

¹⁵O Kaleb, koleskro dad o Jefunne his, las kal tchawe: o Iru, o Ela, un o Naam. Un o Ela was o dad o murshestar Kenas.

¹⁶O Jehallelel, les his star tchawe: o Sif un o Sifa, o Tirja un o Asarel.

¹⁷O Esra, les his star tchawe: o Jeter, un o Mered, un o Efer, un o Jalon. Un o Mered romedineras i Bitja, kolakro dad o baro rai pral Egiptia his. Un len his jek tchai, i Mirjam, un dui mursh tchawe, o Shammai un o Jishbach. O Jishbach kras ko foro Eshtemoa. O Mered romedineras ninna i romjat dran o them Juda. Un khetne lah his les triin tchawe: o Jered, o Heber un o Jekutijel. O Jered kras o foro Gedor. O Heber kras o foro Socho. Un o Jekutijel kras o foro Sanoach.

¹⁹Un o Hodija romedineras koi pheen o murshestar Nacham. Lendar wan i Garmarja, kai djiwenn an o foro Kehila, un i Maachatarja, kai djiwenn an o foro Eshtemoa.

²⁰O Shimon, leskre tchawe his: O Amnon un o Rinna, o Ben-Hanan, un o Tilon. O Jishi, leskre tchawe his: o Sohet un o Ben-Sohet.

²¹O Shela, koleskro dad o Juda hi, leskre tchawe his: o Er, kowa kras o foro Lecha, un o Lada, kai kras o foro Maresha, ninna i menshe, kai djiwan an Ashbea. Kolla kran latcho laintikro than.

²²O murshestar Shela wan ninna o Jokim un i mursha dran Koseba, ninna o Joash un o Saraf, kolla, kai pralstune his pral o them Moab. Kote djiwan le jek tsiro un wan pale pale an Betlehem, — jaake well penlo.

²³Jon kran pirja un djiwan an i forja Netajim un Gedera pash o baro rajeste un budran leske.

²⁴O Simeon, leskre tchawe his: o Jemuel, un o Jamin, o Jarib, o Serach, o Shaul,

²⁵koleskro tchawo his o Shallum, koleskro tchawo his o Mibsam un koleskro tchawo his o Mishma.

²⁶Un i tchawe o murshestar Mishma his: o Hamuel, koleskro tchawo his o Sakkur, koleskro tchawo his o Shimi.

²⁷Un o Shimi, les his deesh-te-shob mursh tchawe un shob tcha. Leskre phralen his gar jaake bud tchawe. O kheer Simeon was gar jaake baro har o kheer Juda.

²⁸Kol menshe, kai wan o Simeonestar djiwan an i forja Beersheba, Molada un an Hazar-Shual,

²⁹an Bilha, Ezem un Tolad,

³⁰an Betuel, Horma un an Ziklag,

³¹an Bet-Markabot, Hazar-Susim, Bet-Biri un an Shaarajim. Kolla his lengre forja, bis te was o David lengro baro rai.

³²Ninna his lenge kol pantch forja Etam, Ajin, Rimmon, Tochen un Ashan,

³³koi pashel kol tsele gaba trul lengre forja bis pash Baal. Jaake hi pre-tchinlo an kol lila, kai lengre familjengre laba dren tardo hi.

³⁴Lengre pralstune pral i familje his: o Meshobab, un o Jamlek un o Josha, koleskro dad o Amazja his,

³⁵un o Joel un o Jehu, koleskro dad o Joshibja his, koleskro dad o Seraja, koleskro dad o Asijel his;

³⁶ninna o Eljoenai un o Jakoba un o Jeshochaja un o Asaja un o Adijel un o Jesimijel un o Benaja;

³⁷un o Sisa, koleskro dad o Shifi his, koleskro dad o Allon his, un koleskro dad o Jedaja his, un koleskro dad o Shimri his, un koleskro dad o Shemaja his.

³⁸Kal mursha, kolengre laba pre tchinlo hi, his i pralstune pral pengre menshende. Un lengre familje wan baro un bareder.

³⁹Un jon djan dur an i tala ap koi rig an i tala, kai o kham pre djal, bis pash Gedor, te nai hatsenn le senlepen lengre bakrenge un busjenge.

⁴⁰Un kote hatsan le latcho pesso senlepen. Un ko them his buchlo ap hake dui rigja, un shukar. Kek kurepen his koi. Kol menshe, kai glan lende koi djiwan, his sawe, kai wan o murshestar Ham.

⁴¹Un an ko tsiro, kai o Hiskija o baro rai pral Juda his, wan kolla, kai o labeha pre tchinlo his, un djan ap kol menshende Ham pre, kai kote an pengre plachtene khera djiwan, un ninna pral i Meunarja, kai kote djiwan. Un jon maran len lauteren. Jaake djiwenn jon kote bis ap kau diwes. Kote his bud senlepen lengre bakrenge un busjenge.

⁴²Mank kolende, kai wan pal o Simeon, his ninna sawe — jaake pantch-sheel mursha — kolla djan pash i berga Seir: Lengre pralstune his o Pelatja un o Nearja un o Refaja un o Usijel, kolengro dad his o Jishi.

⁴³Un jon maran kolen, kai atchan pral kolendar dran Amalek, kai nashan penge kote. Un kate djiwenn le gomme kau diwes.