Read O Debleskro Drom - I Bibla an o Romano Rakepen 2021 2. Familjakro liil 14 Bible Online

2. Familjakro liil 14 - O Debleskro Drom - I Bibla an o Romano Rakepen 2021 bible

2. Familjakro liil 14

¹Un o Asa kras, hoi mishto his un glan i jaka leskro baro Deblestar latcho his.

²Job mukas i chatchepangre[20] paash te krell, hoi ap i mulne platse[21] tardo his, un kai viechen i mule deblenge chatchedo wan. Un kol bare barra, hoi le lenge pre-tchiwan, mukas lo an kotja te phagell, un i figure, hoi i Ashera sikrenn, das lo tele.

³Un job penas i menshenge an o them Juda, te hunte rodenn le o baro Debles, ko Dewel lengre phurendar, un te djan le ap leskro drom un djiwenn pal leskre laba.

⁴Un an i tsele forja an o them Juda, kras lo i mulne platse paash, kai viechen i mule deblenge chatchedo wan, ninna i boba, kai lenge sungepaskro koowa chatchedo was. An leskro tsiro his kek kurepen an o them.

⁵Un i menshe an o them Juda nai djiwan an o latchepen kol thementsa trul lende. O baro Dewel kras kowa, te was kek kurepen an kal bersha. Jaake mukas o Asa i forja soreles te krell an o them Juda.

⁶Un job penas ap i menshende an o them Juda: “Mer krah kal forja soreles, un krah massurja trul lende un turme un bare wudja un sorele pandepangre, jaake rah har o them maro hi. Mer rodam o baro Debles, kai maro Dewel hi, un job kras, te nai djiwas an o latchepen kal thementsa trul mende.” Un jaake kran le pen ap i budi. Un lenge djas mishto, te krenn le i forja soreles.

⁷Un o Asa, les his bud lurde: dran o them Juda 300.000 (triin-sheel-serja) mursha, kolen his bare shilte un witsepangre tchurja; un dran o them Benjamin 280.000 (dui-sheel-ochta-deesh-serja) mursha, kolen his tikne shilte un nai dan karje i bogentsa. Kolla halauter his sorele kurepangre mursha.

⁸Un o Serach, ko Kushari, was peskre lurdentsa te kurell lo pes lentsa. Les his 1.000 (jek-sero) kope 1.000 lurde, un 300 (triin-sheel) kurepangre wurdja. Un job was jaake dur har o foro Maresha tchiddo hi.

⁹Un o Asa peskre lurdentsa was win glan leste, un jon lan i kurepangro tardepen dren an o telstuno them Zefata pash o foro Maresha.

¹⁰Un o Asa das gole ap peskro baro Debleste un penas: “Baro Dewel, tuke hi gar phares, te wess koles ap i rig, kai kek soor an leste hi, te nai kurell lo pes koleha, kai sorleder hi har job. Ab ap mari rig, maro baro Dewel, mer rikrah men ap tute. Un an tiro lab wam mer kate khetne, te kuras men kal bud murshentsa. Baro Dewel, maro Dewel hal tu. Kek mensho nai krell tchomone, tu te kameh les gar.”

¹¹Un o baro Dewel das i Kusharja glan o Asa un i menshende dran Juda jaake, kai jon nashan penge an i daar.

¹²Un o Asa un i tsele lurde, kai pash leste his, lan len palla bis pash o foro Gerar. Un i Kusharja wan jaake dino, te nai kurenn le pen buder gar. O baro Dewel kras, te wan le khetne dino leskre lurdendar dran Juda. Un kalla lan lendar bud kutch koowa pentsa.

¹³Un pral kol tsele forja trul o foro Gerar was i bari traash o baro Deblestar. Jaake nai lan i lurde dran Juda ninna kal tsele forja dren, un tchoran i tsele forja win, un hatsan kote bud kutch koowa.

¹⁴Ninna djan le ap i plachtene khera pre, kai kolla djiwan, kai dan garda ap pengre vieche, un lan bud bakre un khamele pentsa. Pal kowa djan le pale an o foro Jerusalem.