Read O Debleskro Drom - I Bibla an o Romano Rakepen 2021 2. Familjakro liil 22 Bible Online

2. Familjakro liil 22 - O Debleskro Drom - I Bibla an o Romano Rakepen 2021 bible

2. Familjakro liil 22

¹Har o Joram meras, lan i menshe an o foro Jerusalem leskro ternester tchawes, o Ahasja, te well lo o baro rai pal leskro dadeste. Glan i tsiro wan Arabarja ap i lurdengri platsa, kai i lurde dran Juda his, un peran pral lende. Lentsa khetne wan randepangre lurde un maran kol tsele phureder tchawen o Joramestar. Doleske was o Ahasja o baro rai pral Juda.

²Biish-te-dui (22)[30] bersha his o Ahasja, har was lo baro rai. Un job his jek bersh baro rai, un djiwas an ko tsiro an o foro Jerusalem. Leskri dai kharas Atalja, lakro dad his o Omri.

³Ninna job djiwas jaake har o Ahabeskri familja, un putchas gar pal o baro Debleste. Leskri dai kamas kowa jaake un penas leske kowa ninna.

⁴Jaake kras lo, hoi glan o baro Debleskre jaka tchilatcho hi, jaake har kran kowa leskre menshe dran o Ahabeskro kheer. Pal o merepen leskro dadestar penan jon leske, hoi te krell lo. Un kowa his leskri bibacht.

⁵Jaake har jon leske penan, djas lo khetne o Israeleskro rajeha, o Joram, koleskro dad o Ahab his, an o kurepen an o foro Ramot an o them Gilead, te kurell lo pes o baro rajeha pral o them Syria. Leskro lab his Hasael. Kol Syrarja dan o Jorames jaake,

⁶te djas lo pale an Jesreel, te well leskro dukepen pale sasto, hoi kol Syrarja les an o foro Rama dan, har job pes ko baro rajeha pral Syria, o Hasael, kuras. Un o Ahasja, koleskro dad o Joram his, was tele pash leste an Jesreel, kai o Joram dukedo tchiddo his.

⁷O Dewel kamas kowa jaake, te djal o Ahasja pash o Joram, te well lo kote maredo. Un har job koi was, djan kol dui, o Ahasja un o Joram pash o Jehu, koleskro dad o Nimshi hi. Koles rodas o baro Dewel win, te well lo baro rai un marell o Ahabeskri tseli familja.

⁸Jaake was, har o Jehu i phagi pral o Ahabeskri familja anas, hatsas lo ninna pralstune lurden dran Juda, un kol tchawen o Ahasjeskre phralendar. Kolla budran pengro kakeske, o Ahasja. Kolen mukas o Jehu te marell.

⁹Palle rodas lo o Ahasja. Un jon tapran les an o foro Samaria, kote khatras lo pes. Un jon anan les pash o Jehu. Kote maran le les. Un jon paskran les doleske, kai o Josafat leskro papo his. Kowa rikras pes peskro tselo djijeha ap o baro Debleste. Kanna his buder kek koi dran o Ahabeskri familja, kai doha soor an leste wals, te nai wals lo baro rai.

¹⁰Har o Ahasja meras, stas leskri dai, i Atalja, pre, te marell li hakenes, kai o baro rajeha pral Juda dran jek familja was.

¹¹Jek kol tchendar o baro rajestar — lakro lab hi Josheba — tchoras o tikno tchawes peskro phralestar Ahasja mashkral dran o rajeskre tchawende, kai wenn marede. O tikno tchawo kharas Joash. Un i Jocheba anas les un koi djuwel, kai das ap leste garda, an i tchibjengri isema. Jaake khatras li les i glan i Atalja, te was lo gar maredo. I Josheba his i tchai o baro rajestar, o Joram, un i romni o rashajestar, o Jojada. O Ahasja his lakro phraal.

¹²Un o Joash his pash lende khatedo an o baro Debleskro kheer shob bersha. An ko tsiro his i Atalja i rani pral o them.