Read O Debleskro Drom - I Bibla an o Romano Rakepen 2021 2. Familjakro liil 24 Bible Online

2. Familjakro liil 24 - O Debleskro Drom - I Bibla an o Romano Rakepen 2021 bible

2. Familjakro liil 24

¹O Joash his efta bersh, har was lo baro rai. Un job his star-deesh bersha baro rai an o foro Jerusalem. Leskri dai kharas Zibja, un was dran o foro Beersheba.

²Un o Joash kras, hoi glan o baro Debleskre jaka mishto hi jaake rah, har o rashai Jojada djiwas.

³Un o Jojada rodas leske dui djuwjen win, te romedinerell lo len. Un o Joashes his tchawe un tcha lentsa.

⁴Pal i tsiro las peske o Joash glan, te krell lo kowa newes, hoi an o baro Debleskro kheer paash djas un djungelo was.

⁵Un job mukas i rashajen un i Levitarjen khetne te well, un penas ap lende: “Djan an i tsele forja an o them Juda, un anenn lowe dran o tselo them Israel, te nai krah mer hako bersh kowa pale newes, hoi ap o Debleskro kheer paash djas. Krenn kowa sik!” I Levitarja lan penge bud tsiro un kran kowa gar.

⁶Kote mukas o baro rai o pralstuno rashajes, o Jojada, te kharell, un penas ap leste: “Hoske dal tu gar jak, te lenn i Levitarja kol menshendar an o them Juda un an o foro Jerusalem kol lowe o Debleskro khereske dren, jaake har penas glan i rah tsiro o Mose, koles o baro Debleskro wast his, te anenn i Israelitarja lowe o baro Debleskro plachteno kheer.

⁷I Atalja, koi djungeli, un lakre tchawe mukan o Debleskro kheer tele te well. Un halauter, hoi i menshe o baro Debleske leskro khereske dan, anan jon pash o mulo debleste Baal.”

⁸Un o baro rai penas, te well i mochton kerdo. Un kowa was win glan o wudar glan o baro Debleskro kheer tchiddo.

⁹Un jon mukan win gole te dell an o them Juda un an o foro Jerusalem, te anell hakeno kol lowe o baro Debleske, jaake har i Israelitarja kowa kran an o mulo tato them, har penas lenge kowa o Mose, koles o baro Debleskro wast his.

¹⁰Un kau lab his shukar i tsele menshenge un lengre pralstunenge. Un bachteles anan le lowe un witsran len an o mochton, bis te lo pherdo his.

¹¹Hako diwes anan i Levitarja ko mochton pash kol pralstunende o baro rajestar. Jon te dikan, kai bud lowe dren his, palle was ko mursh, kai tchinas i lila o baro rajeske. Un leha khetne was o bitchepaskro o baro rashajestar. Un jon tchoran kol lowe win. Un palle was o mochton pale glan o baro Debleskro kheer anlo. Jaake anan le bud lowe khetne.

¹²Un o baro rai un o Jojada dan kol lowe i pralstunende pral i budepangre, kai budran an o baro Debleskro kheer. Un kolla lan penge budepangre, kai tchinenn i barra, un budrenn o kashteha un o sasteha un o lolo sasteha, te well kowa newes kerdo, hoi paash his ap o baro Debleskro kheer.

¹³Un kol pralstune budepangre dan jak koi pre, te nashell koi budi mishto. Un jaake kran le o Debleskro kheer pale jaake shukar un sorelo, har lo an o phuro tsiro his.

¹⁴Un har jon halauter kran, hoi hunte was kerdo, anan jon kol lowe, hoi pral atchan, o baro rajeske un o rashajeste Jojada. Kal lowentsa kran le tchare un wawar rupene un sonakangre koola i budjake an o baro Debleskro kheer, te wenn vieche chatchedo o Debleske. Un jaake rah har o Jojada djiwas, anan le viechen o Debleske, hoi wan leske tseles chatchedo.

¹⁵Un o Jojada his phuro, les his i lengsto djipen. 130 (jek-sheel-trijanda) bersha his lo, har lo meras.

¹⁶Un doleske, kai lo bud latcho koowa kras i Israelenge, o Debleske un o Debleskro kheer, paskran le les an o Davideskro foro pash i bare rajende.

¹⁷Un har o Jojada mulo his, wan i pralstune dran o them Juda un witsran pen glan o baro rajeste ap i phub. Koi shunas job ap kowa, hoi jon leske penan, te krell lo.

¹⁸Jaake was, te djan i menshe an leskro them buder gar an o kheer o baro Deblestar, kai o Dewel lengre phurendar his. Jon mangan i figuren an, hoi i debletsa Ashera sikrenn un wawar mule deblen. Jaake anan le doosh ap pende glan o baro Debleste. Un leskri choli was pral o them Juda un pral o foro Jerusalem.

¹⁹Un o baro Dewel bitchras peskre rakepangren pash lende, te wenn le pale pale pash o baro Debleste. Ninna te dan kolla len trad, shunan i menshe gar ap lende.

²⁰Un o Debleskro ducho was pral o Secharja, koleskro dad o rashai Jojada his. Job djas glan i menshende un penas ap lende: “Kawa penell o Dewel: Hoske rikrenn tumen gar ap kowa, hoi penom? Doleske djal kowa gar mishto, hoi krenna. Tumer mukan o baro Debles. Doleske mukell job tumen ninna.”

²¹Koi rakran le pen mank pende tele, te marenn le les, un witsran les i barrentsa mulo ap i glanstuni platsa glan o baro Debleskro kheer. Jaake penas les lenge o baro rai, o Joash.

²²Un o Joash bistras har bud latchepen o Jojada ap leste kras, koleskro tchawo o Secharja his, koles job mukas te marell. Har o Secharja meras, penas lo: “O baro Dewel dikell kowa, un job dell pale pale, hoi le ap mande kran.”

²³Un har kau bersh trujel djas, wan i lurde dran o them Syria an o them Juda un an o foro Jerusalem, un maran o tsele pralstune murshen an o them. Un halauter, hoi jon tchoran, bitchran jon pash o baro rajeste an o foro Damaskus.

²⁴Ninna te his gar bud lurde, kai wan dran o them Syria, das o baro Dewel bud bud lurden dran o them Juda an lengro wast. Kowa kras lo doleske, kai mukan i menshe an o them Juda les, o baro Debles, ko Debles lengre phurendar. Un jaake anan jon i phagi pral o Joash.

²⁵Har i Syrarja penge djan, mukan le o Joashes bares dukedo pal pende. Kol pralstune an leskro kheer kran win, te marenn le les, te denn le les pale, hoi job ap o tchaweste o rashajestar Jojada kras. Un jon maran les an peskro tchiben. Un job meras un was paskedo. Ninna te was lo paskedo an o Davideskro foro, was lo gar paskedo pash i wawar bare rajende.

²⁶Un kolla, kai kran pen tchorchanes khetne, te marenn le les his: o Joashar, koleskri dai i Shimat hi, koja his dran o them Ammon, un o Josabad, koleskri dai i Shimrit hi, koja was dran o them Moab.

²⁷I laba leskre mursh tchawendar, un kitse lowe job dren las i menshendar, un hawi budi job ap o baro Debleskro kheer kras, kowa hi halauter pre-tchinlo an o liil i bare rajendar. Un leskro tchawo, o Amazja, was o baro rai pal leste.