Read O Debleskro Drom - I Bibla an o Romano Rakepen 2021 2. Familjakro liil 32 Bible Online

2. Familjakro liil 32 - O Debleskro Drom - I Bibla an o Romano Rakepen 2021 bible

2. Familjakro liil 32

¹Har o Hiskija kowa lauter kras, un jaake sikras, te rikrell lo pes peskro tselo djijeha ap o Debleste, koi was o Sanherib, ko baro rai pral o them Assur, un peras peskre lurdentsa an o them Juda dren. Un jon tchiwan pen trul i sorele forja, te lenn le len penge dren.

²Un har o Hiskija dikas, kai o Sanherib peskre lurdentsa was, te kurell lo pes o foreha Jerusalem,

³rakras lo kol pralstunentsa an peskro them un kol sorele kurepangren, un putchas lendar, te wals gar mishto, te tchakrenn le kol tsele tikne panja, hoi win glan o foro hi; un jon dikan kowa ninna jaake.

⁴Un jaake wan bud menshe khetne un tchakran kol tsele tikne panja un ninna ko lengsto pani, hoi nashas tel i phub. Jon penan penge: “Te wenn kol bare raja dran o them Assur, nai hatsenn le kek pani kate pash mende.”

⁵Un o Hiskija rikras pes mishto un mukas kol massurja trul o foro, kote kai le tele phagedo his, newes te krell. Un kol turme kras lo bareder, un mukas win i duiti massuri pre te tchiwell. Ninna mukas lo o Millo[42] sorleder te krell an o Davideskro foro, un mukas bud witsepaskre tchurja un shilte te krell.

⁶Un job tchiwas pralstune murshen pral i tsele kurepangre, un das len khetne gole pash peste ap i platsa glan o foreskro wudar, un rakras lenge an o dji un penas:

⁷“Awenn sorelo, un ma trashenn! Ma darenn tchi! Ma trashenn o baro rajestar dran o them Assur un leskre tsele lurdendar, kai pash leste hi! Mentsa hi i bareder har leha hi.

⁸O baro rai dran Assur rikrell pes ap i menshengri soor. Pash mende hi o baro Dewel, kai maro Dewel hi. Job well menge ap i rig un kurell pes menge.” Un i menshe rikran pen ap kol laba, hoi lengro baro rai, o Hiskija, lenge penas.

⁹Pal i tsiro, har his ko baro rai pral o them Assur, o Sanherib, peskre lurdentsa pash o foro Lakish tardo, bitchras lo peskre pralstune murshen an o foro Jerusalem pash o Hiskija, ko baro rajeste pral o them Juda, un mukas leske un kol tsele menshenge dran Juda, kai an Jerusalem his, te penell:

¹⁰Kawa penell o Sanherib, ko baro rai pral o them Assur: “Tumer, kai han an Jerusalem, mire lurde hi trul tumaro foro tardo! Koon, patsenn tumer, nai well tumenge ap i rig?

¹¹O Hiskija penell tumenge chochene laba, te penell lo tumenge: ‘O baro Dewel hi maro Dewel, job lell men win dran o wast o baro rajestar pral o them Assur.’ Tchatchepah, job mukell tumen i bokatar un i trushatar te merell.

¹²O Hiskija hi kowa, kai mukas kol mangepaskre platse un chatchepangre krik te lell, kai leskro Debleske vieche chatchedo wan. Un ap tumende an o them Juda un an o foro Jerusalem penas lo: ‘Kokres glan jek chatchepaskri djan ap i tchanga, un chatchrenn viechen o Debleske!’

¹³Djinenn tumer gar, hoi me un mire phure kram i menshentsa an i wawar themma? Nai lan lengre debla pengro them win dran miro wast?

¹⁴Kek kol tsele deblendar an kol themma, hoi dan mire phure khetne, nai las peskre menshen dran miro wast. Har nai penenn tumer, kai tumaro Dewel tumen dran miro wast nai lella?

¹⁵Ma mukenn tumen o Hiskijestar te chochell un dinelo koowa dren te rakrell! Patsenn leske kek lab! Kek dewel dran kol tsele wawar themma nai las peskro them win dran mire phurengre wasta un dran miro wast. Palle nai lell witar gar tumaro Dewel tumen dran miro wast.”

¹⁶Un kol bitchepangre penan budeder tchilatche laba pral o baro Debleste, kai o tchatcho Dewel hi, un pral o Hiskija, kai leskro Debleske koi his.

¹⁷Ninna tchinas o Sanherib i liil, kai lo o baro Debles, ko Dewel pral Israel, praassas, un penas: Jaake har i debla an i wawar themma pengre menshen gar dran miro wast nai lan, jaake nai lell o Dewel fun o Hiskija peskre menshen witar gar dran miro wast.

¹⁸Un i bitchepangre dan i bari gole an o rakepen har lo an o them Juda rakedo well, ap i menshende, kai an o foro Jerusalem djiwan, un ap o foreskri massuri tardo his, te krenn le len traashnes un darenes. Un jaake kaman le o foro dren te lell.

¹⁹Un jon rakran djungele laba pral o Debleste, kai an o foro Jerusalem djiwell, har te wals lo i dewel har kolla, kai i menshengre wastentsa kerdo hi, un kolen i menshe an wawar themma an-mangenn.

²⁰Un o baro rai, o Hiskija, un o Debleskro rakepaskro, o Jesaja, koleskro dad o Amoz his, dan gole ap o baro Debleste an o bolepen, te well lo lenge ap i rig.

²¹Kote bitchras o baro Dewel i bolepaskres. Kowa maras i tsele lurden, ninna lengre pralstunen un bare lurden ap i lurdengri platsa o baro rajestar dran o them Assur. Un i ladjatar djas lo pale an peskro them. Har job an o kheer leskro deblestar was, maran les leskre tchawe o chareha.

²²Un jaake las o baro Dewel o Hiskija un kolen kai an o foro Jerusalem djiwan dran o wast o baro rajestar dran Assur — leskro lab his Sanherib — un dran o wast i tsele wawarendar. Un i menshe nai djiwan an o latchepen kolentsa, kai an i themma trul lende djiwenn.

²³Bud menshe anan tchomone o baro Debleske an o foro Jerusalem un shukar un kutch koowa o baro rajeske an Juda, o Hiskija. Kau tsirestar his lo bares an-diklo kol menshendar an i tsele wawar themma.

²⁴An kol diwessa was i merepaskro nasslepen ap o Hiskija; un job mangas o baro Debles. Un kowa rakras leha un das les i sikepen, te well lo sasto.

²⁵Har o Hiskija sasto was, was lo pre-phurdo un das o baro Debleste ko latchepen gar pale, hoi kowa ap leste kras. Doleske was o baro Dewel chojedo pral leste un pral o them Juda un pral o foro Jerusalem.

²⁶Koi khaitas o Hiskijes, kai phurdas lo pes pre. Job un i menshe an Jerusalem dikan pengri doosh dren. Doleske was koi choli o baro Deblestar gar pral lende jaake rah, har o Hiskija djiwas.

²⁷O Hiskija his latches an-diklo, un les was bud un budeder brawlepen. Un job kras peske khera, kai was pre-hadedo leskro rup, sonakai, kutch barra, sungepaskro djet, shilte, un wawar kutch koowa.

²⁸Un job kras djobengre khera, ninna khera i moljake un o djeteske, un stanje[43] hake viechenge un platse, kai i bakre dren pandlo his.

²⁹Un job kras peske forja. Un les his bud bakre un grumja. Ko tselo brawlepen das les halauter o Baro Dewel.

³⁰O Hiskija his kowa, kai mukas o pralstuno kotar o panjestar Gihon te tchakrell, un o pani dureder tel i phub te nashell an o Davideskro foro, ap koi rig, kai o kham tele djal. Halauter, hoi o Hiskija kras, djas leske mishto.

³¹An ko tsiro, kai bitchran i pralstune dran o them Babilonia bitchepangren pash o Hiskija, te putchenn le lestar, hoi an o them djas, har o Dewel sawo baro koowa kras, hoi kek wawar nai krella, kote mukas les o Dewel kokres, te dikell lo, hoi an leskro dji hi, un hoi krals lo.

³²Ko tselo wawar koowa, hoi pral o Hiskija penepaske hi, un har rikras lo pes ap o Debleste, kowa hi tchinlo an o liil, hoi o Debleskro rakepaskro, o Jesaja, tchinas, koleskro dad o Amoz hi, un an o liil i bare rajendar pral Juda un Israel.

³³Un o Hiskija meras, un jon paskran les ap jek kol feteder platse an o mulengro kheer, kai i bare raja dran o Davideskro kheer paskedo his. Un i tsele menshe an o them Juda un an o foro Jerusalem, sharan les pash peskro paskepen. Un leskro tchawo, o Manasse, was o baro rai pal leste.